Yubu 23 - Ngudradreadrekadhane Ka Sisiu 魯凱語聖經

¹ Twabalre ku Yubu:

² Pakeelanga kaikameane kiaecebeana naku ki Twaumase, akulisi kawriva, la pangicaaeme kaelaela pathavungu la dadangenga naku.

³ Anatumane la thingalaku ku amwane silape iniane, si thingale ku apiane kidringai ku taikaikaiyaneini.

⁴ Lri papiaku iniane pelaela ku patengatengane ka tangimiamiane, ngipapasikai pelaela ku kivuthali.

⁵ Lri thingalaku ku taturingaringavaneini, lai lri thingalaku ku tatubalreaneini nakwane ku vaga.

⁶ Ku Twaumase lri arakai ku maadrau ka pukuini si kidrikisi nakwane? Ini, lri tara kilalra ku tasidrurwaneli.

⁷ Patengatengaanaku, lri dulrwaku kidrikisi iniane; lri kamani ku twaringaringau, si pelaelaela patuthingale ka kadrwa ku pasalrivaneli.

⁸ Ai, papiaku tali talrawane silape, ku Twaumase kai yakai kwini; la papiaku tali talriwgane silape, la mialri kai maka kidringai iniane.

⁹ Ku Twaumase yakai tali lrawdru kauawngu, la kainaku maka drele iniane; la ikai tali dradha twatwatumane, la mialri kainaku maka drele iniane.

¹⁰ Wathingale sanaka tapudrapaalaneli; alaiyasi ana kilrialringau nakwane, nai thingale ala ka mabulaku.

¹¹ Twapapaalraku ku tapudrapalaneini; twapapalraku ku kadalrananeini, kainaku walreme thivalrau.

¹² Tapaluludaneli ku drekaseini, twapapalraku ku takidremedremaneini, si kai ngisasingikai ku ravane ki kidremedremeli.

¹³ Kwi lasu palralrawthu kai akabalrithi, kadrwa ku umawmase ku lri dulru inaku iya kiecebe iniane; kadrwa ku umawmase ku lri dulru telenge ku tangivelevelelaneini.

¹⁴ Lri pangimia ku takikakaneini nakwane; makaalra ku la miyaiya kai ku kikakeini.

¹⁵ Mwakuludraku ikai cucubungu iniane, sana kidremedremaku ngulringau iniane makiucaku.

¹⁶ Ku Twaumase wasuburu kabebetethe ku garanganeli; ku wadulru sanaka manemane ka Twaumase pamwakuludru nakwane.

¹⁷ Adravane pakamukici ki macali ku dradrimitane, kudra pamwakuludru nakwane yai Twaumase, kaika dradrimitane.