Yubu 22 - Ngudradreadrekadhane Ka Sisiu 魯凱語聖經

Mwasaka tulru ka tamatatubalreane (22.1–27.23)

¹ Ku Ilripaze ka swa Temange avavaaganga:

² Kai umawmase papia ki Twaumase yakai ku pacugane? Adravane ku malrilrigilinga ka umawmase papia ki Twaumase yakai ku akaesadhane?

³ Kwi dringelresane ki kakwakudhanesu papia ki wadulru sanaka manemane ka Twaumase yakai ku akaesadhane? Kwi thariranesu lri paralubu ki Twaumase?

⁴ Ku Twaumase kai lri ngwalai ku tamusakenanesu mukuludru iniane si kela kaelaela muswane, saibange muswane.

⁵ Ini, amani sakadrau turamuru kwi pasalrivanesu, amani sakakalra maikaikaai kwi pasalrivanesu.

⁶ Ngwalaisu ku amukiamane muswane ki betakanesu ku paisu, la mulaimaisu patuelre iniane, si pavilralrakane iniane.

⁷ Ku makadhakadhame ku umawmase kaisu paungulu ku acilai iniane; ku masilrasilrau ku umawmase la kaisu pakane ku aga iniane.

⁸ Arakaisu kwi puku ki takaumawmasane si taetalanesu si drikisi malra sanaka kadaengane.

⁹ Pasiaulrisu pamaliwnaunai ki lawalibakane ka ababai; wacelrasu ku alrima ki lapakulrulrulu.

¹⁰ Ngwalai kikai, laka lrubangenga kwi ngiathalringulu muswane; lri kipangitutulukusu kilritungu ki kiwcane.

¹¹ Ku dradrimitane lri kabungu muswane, lai kaisu dulru drele; ku telebe lai lri palrenepe muswane!

¹² Ku Twaumase kaika yakai kavai belenge ki sabebeelengenga? Kai ka paswalelebe drele ki yabelenge ki latariau?

¹³ La kivagaasu, “Manemane ku thingale ki Twaumase? Lri dulru twalai lrilrikudru ki ememe saibange mitane?” Iya

¹⁴ Paidringi iniane ka makudremelre ka ememe, lai kai maka dulru drele amiasu, ai ku patengatengane matwatwatwase ikai kai lepawngane si kawmasane.

¹⁵ Ku tangukakaiyanenga ki tangangangace ka umawmase ku kadalranane, lri tupapalrangasu ngukakai?

¹⁶ Kaiyana mwatakelane ku apacadhane lini, lai lri kialudrunga ki telebe.

¹⁷ Kwi lalasu amia kai ki Twaumase: Kusu katwasa naiane! Ku wadulru sanaka manemane ka Twaumase lri maka tumane naiane?

¹⁸ Ai, ku pangiaradhekane liniane yai Twaumase; ku takidremedremane ki tangangangace ka umawmase, kainaku maka pwalringalringau.

¹⁹ Kwi lalasu lu kipathavungu, masasa ku madringelrese ka umawmase, ku kia pasidralrili ku umawmase la mulrakai tukadrakadre.

²⁰ Ku tacekecekelane lini ki tangangangace lri kiamudu, ku tedrane lai ki lama patuelre.

²¹ Lakamani, Yubu, katharira ki Twaumase si kikadalru, luka ngimiyaiya kai, lri patarumara ku akaesadhanesu.

²² Tarumara ku sabulrwaneini, ku vagaini la pulringalringava pikai ki kidremedreme.

²³ Unu, ngisasangata si siwlri mwa ki wadulru sanaka manemane ka Twaumase, kwidra kai madringelrese ka kakwakudhane patuelre mwalra patwalai ki daanesu.

²⁴ Cilria kwi kingisu, kwini kakingiane cilria pwa ki takadrekarane ka vaalru.

²⁵ Ku wadulru sanaka manemane ka Twaumase lani kamaninga ku makuciacingalrenga ka kingisu, kamaninga ku lrawlrapungu ka gingisu, kabate kadrurudruru pasikai muswane.

²⁶ Luka ngimiyaiya kikai, lrika tasudralruanengasu ki wadulru sanaka manemane ka Twaumase, si thingale ku Twaumase ala ka berai ki akiragadhanesu.

²⁷ Lu papiasu iniane inulri, lri palraingi ku kitubisu; lai lri mialrisu pangibilri baai ku kiketeketengasu.

²⁸ Ku takaunganesu patuelre lai lri tara ngimiya patuelre; ku tangukakaiyanesu ku kadalranane lai lri tara ikaai ku ledra paledra.

²⁹ Ku Twaumase patwabakebake ki ngiakalrilrigu ka umawmase, palribulu ki ngiasasangate ngitatwalebe ka umawmase.

³⁰ Luka kia vuthasu, lri palribulu muswane; luka dringelrese kwi kakwakudhanesu, lri paralubu muswane.