Yubu 21 - Ngudradreadrekadhane Ka Sisiu 魯凱語聖經

¹ Ku Yubu la tubalre:

² Pudriadringaadha kilalra kai vagali; kathane kikai ku adulrwane numi sasa nakwane.

³ Ala pakingi vaalaili pakawriva, lu maka kawrivanga naku, ulralrakadhanga pulrialrivale nakwane.

⁴ Kainaku lri kidrikisi ku vaga ki lri pacai ka umawmase; kainaku ka wavutha kasakwakwa ka kadrwa ku palululudane.

⁵ Drelaili, kaiyana makakelrete ku akasamaliane numi ucacireleke? Lri kasamali numi si nguvagaanenga!

⁶ Sana kidremedremaku kai takipadradresenganeli masamaliaku mukuludru, la manugiligiligili kakiwcu.

⁷ Ku Twaumase ani papanianiake ki manganga ka umawmase? Ani pakalraagi ku caili, pangiradhekane, paadili liniane?

⁸ La tathathatha ku lalalake si lagagane lini, la dreleana lu kadradrau ku lamwabaibalrithi.

⁹ La kasulivaliivate ku tacekecekelane lini, kadrwa ku ukulukuludru; ku sapathavuthavungane ki Twaumase ka ukudru kai makakaikai liniane.

¹⁰ Unu, ku sawvalai ka lwange lini lu paaba tara wasiku; ku ababai ka lwange lini lu tulalake kai kialribalribate.

¹¹ Ku lalalake lini mia ki lalrulai ka kiu katwase kivavange; ku lalalake lini waititituku dralradralrai.

¹² Kwini lalasu twapapapalra ki lasapasenasenadhane senasenai; twapapalra ki lingau ki ngiabulalrilalri kiraragai.

¹³ Ku tapanianianiakane lini masulivalivate, la kasuliivate mwadringi ki balriu.

¹⁴ Ku manganga ka umawmase pakiadaili ki Twaumase liniane; ku tapanianianiakane lini kai mwabangalre kipasilape kitubi ku takidremedremane ki Twaumase.

¹⁵ Kwi lalasu alu sukubane ki wadulru sanaka manemane ka Twaumase amia, lu inulriane papia iniane kadrwa ku akaesadhane amia.

¹⁶ Kwi lalasu lu kidremedreme ku asikwane ngiasasatalu ku puku madu amia; ai ku miyaiya kai ku takidremedremane kainaku palraingi.

¹⁷ Maedrepenga ku tinaki ki mangangace ka umawmase? Ikai liniane yakainga ku kiapadradresenge ku amatikurwane? Twaumase yakainga ku taikaiyane ki lisiane si pathavungu ki manganga ka umawmase?

¹⁸ Kwi lasu waipinga pasarau liniane, mia lu kivalrigi ku sangukimugiane? Kwi lasu wapalainga liniane, mia lu palai ki thuvugu ku valrigi?

¹⁹ Amia numi kai, ku Twaumase ngwalai ku tapasalrivane ki tama la pathavungu ki lalalake; lu kidremedremaku kai Twaumase naika pathavungu ki pasalriu ka umawmase, pangisasiamece ku pasalrivane lini.

²⁰ Ku pasalriu ka umawmase nai tarumara ku naika akipathavunganeini; kwi lalasu nai kilrialringau ku elathane ki wadulru sanaka manemane ka Twaumase.

²¹ Kai umawmase lulri pacainga ku taikaiyane kawmasane, makalithiana ku akaesadhane ki lalalakeini?

²² Ku Twaumase ka wadulru saibange ki abelenge ku taetalane ka umawmase, Kai umawmase lri dulrwana bulru ki Twaumase?

²³ Yakaai kai matiacaeme ku tacebeane ku takaumawmasane, si la kisupisupilri ku sulivatane si akaesadhane pakeela ki wapacai.

²⁴ Ku takilrisaisaneini sapukuane; la kaidelrethe ku culrale si lusuini.

²⁵ La ikaai ku umawmase ku kai maka kiararagai, ku tapanianiakane swaete ku akwalriane.

²⁶ Ai kai taidrusa mararaamau tara pacai, si kidralreke pikai adringi ki dae, mararaamau kisuete ki ekai.

²⁷ Wathingalaku kwi kidremedreme numi, la thingalaku kwi kisanu pasakalisilisi numi nakwane.

²⁸ Kiavaga numi: Yakainu kudra daane ki ngiakararakacane ka umawmase? Kudra tara kangangangace ka umawmase yakaikai inu?

²⁹ Kainu kiavaga ki walribalribate ka laumawmase? Kainu wathingale kudra mailuku lini ku sapelaelane?

³⁰ Ikai ki elathane si apathavungane ki Twaumase ka vai, ku mangangace ka umawmase malrabuthu kamani si mubere.

³¹ Aneane kulri icucubungu kaelaela kudra ki mangangace ka umawmase? Aneane ku ngwalai ki nganganeini si bilri iniane?

³² Kwi lasu lu kibulri putadralredralrekane, si kidralreke ikai ki mapangale ku wakadrekadrenge ka balriu,

³³ si kapangale matiisalru ku wasateatere, adravane ka dae kiararaakete ki kinawmasaneini.

³⁴ La kunumi? La kisanu arakaikaai numi ku kaika patengane ka vaga sasa nakwane! Kwi tubalrebalre numi kadrwa ku mamamwa ki kakudhane kuna vaevanga.