Yubu 20 - Ngudradreadrekadhane Ka Sisiu 魯凱語聖經

¹ La tarumara, avavaga ku Zupare ka swa Nama:

² Yubu, pakalrithavulusu kai takidremedremaneli, kainaku wabeserenga lri tara tubaalreaku muswane.

³ Kwi taiyanesu yai salrelremeane ka vaga, ai wathingalaku ku satubalreane.

⁴ Unu wathingalesu, twalai kunadruma, twalai sakipikai kai kawmasane kai umawmase pathagili,

⁵ Kai manganga ka umawmase kai lri tarathainu ku angikalrilrigwane, ku kai mwasakene ku umawmase kai lri kawlai ku akiraragadhane.

⁶ Adravane ngikalrilrigu kwi lasu, si kikalrumale ki subelebelenge ku abelengane, la takeela subelebelenge ku awlruini,

⁷ kwi lasu lu alikainga lri mia ki lriduku kiswape mwalra; kudra wathingathingale iniane ku umawmase kai lri thingalenga makanaelre iniane luka papinu.

⁸ Kwi lasu lri mia ki siipi kawlrau, lai kai pelanga kidrele palralrawthu; kwi lasu mia ki tangimiamiane ki maungu, kawlrau kai athingalane ku tapapiane.

⁹ Kudra nawadrelenga iniane ku umawmase lai kai lri pelanga drele iniane; kwi lasu lri twalai ki nataikaikaiyaneini kawlrau.

¹⁰ Ku lalalakeini lri papia ki matiakukuru ka umawmase akiciacia; kwi lasu lri ngikakamani sawlri baai kudra pangulravekane malra ku lawbubulu.

¹¹ Kwi lasu yacengecenge sapukwane, ai kailri tarathainunga lai lri adae.

¹² Kwi lasu malimeme amia ki ngialisiane, si pikai tailebe ki lridame,

¹³ kamwi pingududhane, palalava ku tasangumanemananeini;

¹⁴ ai kwini akaneane yakai ki ngudwi kapangelre, aduku ki siduduku ka sulrau.

¹⁵ Ku manganga ka umawmase pwauta ku kupaini ribici ku la tacekecekelane; ku Twaumase lri ribici sawlri, adravane ka yabarangane lri apeape malra.

¹⁶ Ku manganga ka umawmase wathepethepe ku duku ki siduduku ka sulrau; ku lridame ki siduduku ka sulrau wadilace papacai iniane.

¹⁷ Kwi lasu kai lri dulru panianiake si drele ku vaalru ka mwalwaludru ku lawlau ki ulrive, lai lri kai maka drele ku drakeakerale ka mwalwaludru ku mireke si valu.

¹⁸ Kwi lasu lri cilri ku nikwalriane si malra sanaka maneemane patuelre; kwi lasu kai lri maka kisupilri ku tacekecekelaneini,

¹⁹ asi lwiyane kwi lasu wadredrepete ki matiakukuru ka umawmase, la pasiwlri liniane, la ribici ku la tudaane ki palrapalra.

²⁰ Asi lwiyane ku ravaneini kadrwa ku taalikaiyane, sanaka kadalameini ku lamanemane kadrwa ku apasurane.

²¹ Wakane lrede patuelre, kadrwa kuna manemanenga ku nisurane, la kamani ku amusadhaneini kailri kawlai.

²² Kwi lasu lu ngulwalwalwaadhane kirararagai, ku la amatikurwane lri kelakelakeelanga mawbalribalrithi.

²³ Pangisasingikaiya iniane kane lrede; ku Twaumase lri papia iniane kalisi, lri mia ki umuku kela kabebetethe iniane.

²⁴ Kwi lasu kiasanu ubere ki adreme ka lrabu, ai ku lriwlu ka lraili walregese iniane.

²⁵ Ku lraili walregese ki kinawmasaneini, ku waelelethe ka dralisi ki lraili walrinini ku eraini; kwi lasu kiaruthuku ki kiwcane.

²⁶ Ku ruburubuini patuelre mamudunga; kaika alrima ki umawmase ka walama si lama iniane si wacekecekeleini makanaelre.

²⁷ Kai subelebelenge lri putaluvaivai ku pasalrivaneini; kai kadaengane patengane lri iya si kikaruburu iniane.

²⁸ Ikai ki lriau ka elathane ki Twaumase, ku tacekecekelaneini lri kakadruanga kuna vaevanga.

²⁹ Amani kikai ku lrika angimiane ki manganga ka umawmase, ka Twaumase ka wakelrete baai ka satwalrepengeini.