Yubu 2 - Ngudradreadrekadhane Ka Sisiu 魯凱語聖經

Ku Satange peaelana kituthiathingale ki Yubu

¹ La ikai saka minakavalanenga, ku lalalake ki Twaumase la acegecegenga ikai cucubungu ki Tamatama, ku Satange la mialri ikai taelre liniane.

² Ku Tamatama la kivaga iniane, “Mwainiinusu?” Ku Satange la tubalre, “Wadadadavacaku kawmasane, mwa kidruanga.”

³ Ku Tamatama la kivaga, “Kiararaketesu drele ki sasiakawluli ka Yubu? Ikai kawmasane kadrwanga ku miyaiya iniane ku umawmase. Kwi lasu makalecege si kitulrepenge ku taka umawmase, la mwasakene mukuludru nakwane, sanaka malisi patueelre kai paiyaiya. Adravane iyaiyasu nakwane, ku apalrainganeli muswane vutha tulisi iniane, ai kwi lasu thadaalraneana ka patengatengane kasalru nakwane.”

⁴ Ku Satange la tubalre, “ ‘Lu arakaiyane ku lrangici balrithi ki lrangici kai asipunu’, kai umawmase ngwalai ku apalakebane ki niakeini, mwabangalre cilri ki drumane patuelre.

⁵ Kaiasasane ana dulasu ki kinawmasaneini, la dredrele iniane lu kai picucubungu muswane kaelaela pusu!”

⁶ La iya kai ku Tamatama ki Satange, “Mathariri, ka lasu yakai ki alrimasu, ai madha papacapacai iniane.”

⁷ Ku Satange la twalai cucubungu ki Tamatama katwase, si pathagili tulisi ki Yubu, kwi lasu la kipaka pu twalai ki awlru pakela ki drapaleini.

⁸ Ku Yubu la katwase mwa thili ki tabulubulwane nene, la malra ku vaeva ku sangu kapiciane ki didilrungu si kusukusukusu ki pu ki kinawmasaneini.

⁹ Ku taelrelreini la iya kai iniane, “Pakelanga kaiasasane lrika takasalruanesu ku kidremedremesu? Asu kai pusu ki Twaumase, si katwase pacai?”

¹⁰ Ku Yubu la tubalre, “Kusu ka ababai ka kawariiva cacapange! Ku Twaumase sa patarumara ku akaesadhane baai mitane, kiaragaita, sa pulebenga ku matikurwane, lai lri kalisita iniane?” Adravane sa kipadradresenge ku la akwalriane ku Yubu, thadaalrane kai avavaga pusu si kalisi ki Twaumase.

Ku latalragilragi ki Yubu wakela lrikape iniane

¹¹ Ku tatulru ka talragilragi ki Yubu yai Ilripaze ka swa Temange, Biledade ka swa Sua, si Zupare ka swa Nama. Kwi lalasu kialalra ku takipadradresengane ki Yubu ku la amatikurwane, la kalritheethe ku maredele katwase mwa lrikape iniane, si sasa iniane.

¹² Kwini lalasu la sadaaili drele ki Yubu, la kai maka thingalenga iniane, sa thingalenga ala ka amanini, la karaleale tubi, si ngipapurici ku laimai, la papia belenge, si ngipapapia ki awlru cabungu ku thuvugu si dae.

¹³ Kwi lalasu ala taelre ki Yubu nene ikai daedae, makapitulu ku vaiyane si maungu kai kawrivariva ku niaku vaalanenga ku vaga, asi lwiyane kwi lalasu wadrele ku sakwalrialri ki Yubu ka maadrau turamuru.