Yubu 19 - Ngudradreadrekadhane Ka Sisiu 魯凱語聖經

¹ Ku Yubu twabalre:

² Anungithaanga pia kikai kai paisadrasadra patubi nakwane, apapelaelaela ara vaga pakiangeangeange nakwane?

³ Kai numi yasadrasadra tusinalrelreme nakwane; lu pakiangeange numi nakwane la kai numi kaininu.

⁴ Adravane ka napamamaku, nau ngisasiamecenga ku tapamamaneli.

⁵ Lu kidremedreme numi mathaithariri nai amia numi nakwane, la tusarakaiyane numi tupasalrivane nakwane kai matikurwaneli.

⁶ Kai numi maka wadrele kikai ala ka tapiane ki Twaumase? Pwalebe ku lravatheini si lringulu nakwane.

⁷ Lu karalealaku nau sidruru iya, kadrwa ku umawmase kulri kilalra; nau ki aparamaramau lu iyaku kitubi, kadrwa ku umawmase ku kialalra nakwane.

⁸ Ku Twaumase watelenge nakwane, la kainaku maka lribate; ara dradrimitane kabungu ki angukakaiyaneli ku kadalranane.

⁹ Waribici ku lrigu ka pagamuculi, si kabebetethe kai naganeli.

¹⁰ Twalai kidruanga kainganai kikaruburu nakwane; patala baalace akucu ki sidramaneli.

¹¹ Ku Twaumase papia nakwane kalisi, si tubadha nakwane.

¹² La sikawlu ki lakwapingi kela kikaruburu nakwane, kwi lalasu yakai thili ki balrawbawli abate ku satelengane si lringulu nakwane.

¹³ Ku Twaumase pakalralrase nakwane ki labetakaneli; ku thingathingaleli ku laumawmase la alra tupalrapalranga nakwane lu malribalribatane ikadadalranane.

¹⁴ Ku laretesaneli matuasenga nakwane makanaelre; ku latalragilragili marimurunga nakwane.

¹⁵ Ku yakainga ki daaneli sulai ku badhabadha twa palrapalra nakwane; ku lalabaibai ka sasiakawlu ki daane nai la malra tubadhabadhanga nakwane.

¹⁶ Lu kawrivaku ki sasiakawlu, kai twathengete nakwane; lu kitubiaku iniane ku akiparalubane, la mialri kai tuthengete nakwane.

¹⁷ Kai wabesere ki niakeli ku taelrelreli; la kalrase kela dethe nakwane ku laretesaneli.

¹⁸ Adravane ka lavavalake mwalralraakai nakwane; sana ngidrakalaku twasinalrelreme nakwane kwi lalasu.

¹⁹ Ku katalrailragianengali mavalracevace nakwane; ku kadadalamengali ku umawmase mialri ngidrakale kiecebe nakwane.

²⁰ Kai lrangicili wadakipinga ki culraleli; ku pikaingali kikai sakathaanenga kai niakeli.

²¹ Kunaku talragi numi, la kakuruaili! Ku alrima ki Twaumase patwabakebakenga nakwane.

²² Anu ngialralrau ki Twaumase pathavungu nakwane? Ku babaai numi drima nakwane ku kwalrianeli kaiyana makakelrete ku telregane?

²³ Anatumane la ikai ku umawmase ku pwalringau ku taiyaneli kawriva, si pacase pikai ki hungu ku vagali patuelre!

²⁴ Arakai ku adreme papacase, arakai ku wangetuku gugu, papacase pikai ki alrisapesape.

²⁵ Ai, wathingalaku ku tarapalakelakebe nakwane panianianiake; luka bilrilinga lri pusakai nakwane kawriva.

²⁶ Adravane kipakaburaburau ki caemane kai lrangici si beateli, arakaaiyanaku kikai kinawmasane kidrele ki Twaumase.

²⁷ Lri tara patakamacamaacaku drele iniane, lai kamani kudra kai wathingathingale nakwane. Ngwapukwanenga kai kidremedremeli!

²⁸ Amia numi kai: Lri tumaneta si pakwalri ki lasu? Ku tangadrane ki amatikurwane yakai iniane.

²⁹ Lri pakipapawlringavaku numiane, mukuludra ki lrabu ka dramu; kikai lrabu ka dramu mailuku ku elathane ki Twaumase papia ki pasalrivane. Thingala yakai kudra tangeea kalri saibange ka Twaumase.