Yubu 18 - Ngudradreadrekadhane Ka Sisiu 魯凱語聖經

¹ Ku Biledade ka swa Sua avavaaganga:

² Yubu, ala akubekeela kawriva? Isaselebana si kidremedreme, la nai dulru kawriva muswane.

³ Mia ki nilapulapwane ka lawaudriwdripi amiasu naiane? Miyaiya nai ki laadhadhame si lawaudriwdripi kakulrungu?

⁴ Kwi lisianesu twalisilisi muswane; bekace ngwalai ki lisianesu kai kadaengane la aubulane? Bekace kai Twaumase malra patalula kai lalregelrege pakai ku apangulwadhanane muswane?

⁵ Ku ledra ki manganga ka umawmase lri tara kiedrepe; ku kelrabeini kailri maka kudalainga.

⁶ Ku tinaki ikai ki balrawbawini madradrimitinga; ku nikelradhane ka tinaki lai lri mialri kaedrepe.

⁷ Ku papedrengane ku tapudrapalane pathagilinga lridralridrau; kwi lasu kiapatubakebake ki tavuvulrucaneini.

⁸ Ngiakakamani mwadringi ki lravatheini; la kilrepelrepe ku drapaleini.

⁹ Ku tukulru pwatukulrane ki drapaleini; la kiputakebanenga.

¹⁰ Ki kadaengane nisubusubane ku lrubange; ku tadadavacaneini ku kadalranane nipaipadhane ku lravathe.

¹¹ Wakela madredresenge mwa iniane ku matiwkuludrane, si ka tatupapapalrane iniane.

¹² Kwi lasu namaesaesaesai, kikainga la ubaibaisinga; ku amatikurwane taithilane iniane ukalavalava.

¹³ Ku lri papacai iniane ka caemane mwadringinga ki kinawmasaneini palraelre; ku ladrapale si alrimaini maburaburaunga patuelre.

¹⁴ Kwi lasu twalai ki masulivaliivate ikai ki balrawbau si kiverevere pulatadre, kiailuku pucucubungu ki talialalai ki apacadhane.

¹⁵ Ku balrawbawini sa arakainga ku balaru papacai ki la padavake, pamwa ki palrapalra paikaikai.

¹⁶ Ku balaceini marudame; ku vasau ki laricingini la kalraici.

¹⁷ Kai umawmase kawmasane kadrwa kulri ngulringau iniane; ku naganeini la kikarimuru ki sakacekele.

¹⁸ Kwi lasu lri kipatwalai kawmasane kipakatwase, lri twalai ki ledra kipakatwase mwa ki dradrimitane.

¹⁹ Ikai ki zukuini kadrwa ku lalalake ku lagagane; ku taikaiyaneini cekecekele kadrwa ku umawmase ku asuru kuna tangeeanga.

²⁰ Ku swa tali talriwgane ku laumawmase ngwalai ku takilalrane ku tangimianeini la ngituluku kasamali; ku swa tali talrawane ku laumawmase ngwalai ku tathingalane ku takipadradresenganeini si mukuludru.

²¹ Kikai yai amani ku tangimiane ki manganga ka umawmase; kikai yai amani ku tangimiane ki kai mwasakene mukuludru ki Twaumase.