Yubu 17 - Ngudradreadrekadhane Ka Sisiu 魯凱語聖經

¹ Lri kisaalrunga naku, alikainga kai niake; mwakalavalava nakwane ka tadralredralrekane ku amwaneli mwadringi.

² Ikai kidruanga ku umawmase mwalralralrakai nakwane; waawngaku ku vai icubungu liniane kimangiangiangiace.

³ Twaumase, kiatubiaku muswane pasikaiyaili atalingikaiyane; kathanesu, kadrwa ku umawmase ku mwabangalre pacengecenge iya kai vagali.

⁴ Wacelrepesu ku athingalane lini; kiatubiaku muswane madha paakacikaci liniane.

⁵ Ku sabulrwane kunadruma amia kai: Ku ngwalai ki paisu si kilangai ki latalragilragi ku umawmase, lri kisacepe ku agaganeini

⁶ Kaiasasane kwi lalasu arakai kikai vaga si kikaruburu nakwane; swangalrai ki lringawli kwi lalasu.

⁷ Kai atubiane kiasanu pakamukici ki macali; Kai alrima si drapaleli marilainga mia ki alalingu.

⁸ Kudra la ngiatatu madringelrese ku umawmase lri ngituluku kasamali makanaelre; kwi lalasu maelaela nakwane kai mwasakene iya.

⁹ Kudra la ngiatatu mwalecege ku umawmase arwa ikai ku salrwane; kudra ngiatatu mabula ku umawmase lri aru kagalremegeme.

¹⁰ Ai lu dawlane liniane si acegecege ikai cucubungu nakwane; kadrwa ku natangeanga ku kidringaili ku mwalecege ka umawmase.

¹¹ Ku vaili ngialribateenga, la kasuburunga ku kikakeli; la mialri kamudunga ku sidramadramali.

¹² Ku latalragilragili vaiyane amia ki maungu; kwi lalasu wadethenga ku ledra amia, ai ku patengatengane maungwana kadradrimiti.

¹³ Ku kathane ku sidramadramali yai swadriadringi; ikai kwini, lri dulrwaku ikai ki dradrimitane apecenga ki mawlawlai.

¹⁴ Lri sitamaku ki tadralredralrekane, lai lri sitinaku sibetakane ki pakaburaburau nakwane ka ekai.

¹⁵ Yainu ku sidramadramali? Aneane ku maka wadrele ka yakai ku sidramaneli?

¹⁶ Lu mwangaku swadriadringi, kwini sidramadramali lri tupapalra nakwane mwa?