Yubu 16 - Ngudradreadrekadhane Ka Sisiu 魯凱語聖經

¹ Twabalre ku Yubu:

² Makalranga ku kilalrali ku miyaiya kai ku vaga; kwi sasasa numi wailukulringa ku upungane.

³ Lri iyaiya numi kai si kai isadrasadra kikai kadrwa ku paluludane ka lavaga? Kai numi lri maka iya kudra bibilrilinga ku vaga?

⁴ Alaiyasi mababalrithita kai takipadradresenganeli, nai mialriaku iya kwi taiyane numi kawriva. La papia numiane vetevete ku awlru, si daedarepe ku vaga la kaelaela numiane.

⁵ Wathingalaku arakai ku mathariri ku vaga si pakalrumale numiane, la arakai ku ngudwi sasa numiane.

⁶ Ai, lu kawrivaku kadrwa ku paluludane; adravane icelrebaku kai lri maka mwalra kai sakwalrialrili.

⁷ Twaumase, pakwaalringasu nakwane turamuru; pakamudusu ki daaneli si lawacekecekeleli.

⁸ Waruthukusu nakwane; kiaecebesu nakwane. Kaiasasanenga lrangicinga ka wacabu ki culraleli sikakathane; kai palrapalra arakai kikai si pasalriu iya nakwane.

⁹ Ku Twaumase yakai ki lisianeini si lita nakwane; papia nakwane apararitaiti. Ku badhali arakai ku lisiane lengethe nakwane;

¹⁰ ku lapalrapalra kawariva mulralrakai nakwane. Kwi lalasu la arakai ku alrima camilrigi nakwane; kwi lalasu walringulu lri kikaruburu nakwane.

¹¹ Ku Twaumase wamalra nakwane si baai pikai ki alrima ki manganga ka umawmase; wacilri nakwane pwa ki alrima ki pasalrisalriu ka umawmase.

¹² Namasulivalivataku panianianiake, ai ku Twaumase pakwalri nakwane; wathere ki lrulrunguli, si bakebake pakababurau nakwane. Wamalra nakwane tudukipi ki lrailini,

¹³ la maececebe papia nakwane lraili; ku lrailini pakai ki taniakaneli, la mwaludru mucakena ku paguli, kadrwa ku natikianenga ku kurwane.

¹⁴ Kwi lasu kai watelrai lrumai pakadula nakwane; kwi lasu mia ki garagarange ka tara kikaruburuburu ka amamamanga dredredre nakwane.

¹⁵ Watubiaku, la sipalimemelre ku kaimadhane; ngwapukwanenga naku nene ikai ki thuvugu ka dae.

¹⁶ Ngwaladhaku ki tatubiane si mubalrake kai lringawli; mabitiraku, la kaicelrenge kai sakubukubuli.

¹⁷ Ai kainaku pasalriu ngukai ki ngikarakacanane; ku inulrili tengatengaane.

¹⁸ Kadaengane, madha kabukabungu ku eraili; kiavuthaku ku taiyaneli ku lingau madha thenethene.

¹⁹ Kaiasasane, kulri pelaela pasikai nakwane yakai subelebelenge; kwi lasu lri ngidrakale si pasikai nakwane kawriva.

²⁰ Maelaela nakwane kai latalrailragili; twavasavase kai lreseli ikai cucubungu ki Twaumase.

²¹ Mwarikaaiyaku ki umawmase ku pwasakai nakwane papia ki Twaumase kawriva, mia ki umawmase lu pusakai ki talragi kawriva.

²² Kai cailili ngiapalai si kawlrau, lri katwasaku ngukakai kwidra kai lri pasiwlringa ka kadalranane.