Yubu 15 - Ngudradreadrekadhane Ka Sisiu 魯凱語聖經

Mwasaka drusa ka tamatatubalreane (15.1–21.34)

¹ Ku Ilripaze ka swa Temange tarwamara avavaga:

² Yubu, ku ngiathingale ka umawmase kawariva ku ngiakulrungu ku vaga? Kwi iyaiyasu ungawngau ka vaga patuelre!

³ Ku malrigili ka umawmase kai lri iya ku miyaiya kai ku vaga, kai lri arakai ku kadrwa ku paluludane ka vaga ngipapasikai kiecebe kawriva lutumane.

⁴ Ku kangililisianengasu, adravane ka amusakenane mukuludru ki Twaumase ku kidremedremesu kadruanga! La kaisu ubangalre ikai cucubungu iniane inulri!

⁵ Kwi takawrivanesu mwataluvaivai kwi ngilisiananesu; kiasanu arakaikaisu ku mathariri ka vaga ngisasubusu.

⁶ Adravane kai nau matikai ku tapamamanesu; sanaka tapuvaganesu twapasalrivanenga muswane patuelre.

⁷ Aswalalanga naku kitulalake ikai kai kawmasane amiasu? Ku Twaumase sabekabekace kai lalregelrege yainusu?

⁸ Kialalrangasu ku kikake ki Twaumase? Waelrelresu tangeangeea ku lrigilane ki umawmase?

⁹ Yakaiyaini ku manemane, ku thingalesu, si la kai nai thingale? Yakaiyaini ku manemane, ku pulringalringawsu, si la kai nai pulringalringau?

¹⁰ Patwalai nai ki la twaudrasenga ka tarudrawdrange kicawcakwane ku lrigilane; ku caili lini marwarudrange ki tamasu!

¹¹ Lri pasiwlrisu ku sasasane ki Twaumase? Twadrekasesu kai akusulraapele nai saasa?

¹² Asu mia kikai kawpungu turamuru? Ani kadireele kai macasu ki lisiane?

¹³ Papiapiasu ki Twaumase kalisi; sikathurwanengasu arakai kai miyaiya kaika vaga tubaebaebalre iniane.

¹⁴ Kai umawmase lri dulru ka kadrwa ku pasalrivane? Ku tulalake ki ababai, lri dulru ikai cucubungu ki Twaumase ka kadrwa ku pasalrivane?

¹⁵ Kai Twaumase adravane ka sasiakaaulu subelebelenge kai maka madralru; ikai iniane lu drele, kaika mabula makanaelre.

¹⁶ Sikamanianenga kwidra parwa acilai ungulu ku pasalrivane ka umawmase; kai umawmase matiavalracevace turamuru, la ngilisiane turamuru!

¹⁷ Yubu, kilalra kai pakipapawlringawli; peaelaelaku muswane kai tangilribataneli.

¹⁸ Mwalecege ngithingale ka umawmase ku wabulru nakwane ku twalai ki cucungulane ka patengane ka sabulrwane; kadrwa ku manemane ku sesekete lini.

¹⁹ Ku kadaengane lini kai kiarathudwana ki maelane ka zuku; kadrwa ku maelane ka zuku ku kiaelre liniane.

²⁰ Ku manganga ka umawmase ka wadredrepete tusinalreme ki umawmase, ku tapanianianiakaneini lri ngilribate ku akwalriane.

²¹ Ku matiaukuludru ku lingau lrika taikaiyane ki calringaini, lu kidremedremedreme masulivalivataku iyaiya ala sakeela ku sadre.

²² Kadrwa ku matisidramane ku akidailaneini ki dradrimitane, asi lwiyane yakai ku lrabu ku walepelepenge, mukalavalava ku athiabane iniane,

²³ ku segese mwakalavalava kulri kane lu pacainga ku kinawmasaneini. Kwi lasu wathingale cucubungu ka kathane ku dradrimitane;

²⁴ ku amatikurwane akwalriane mia ki tangea ka magarange ka talialalai, ka mwakalavalava ku akikaruburane iniane.

²⁵ Asi lwiyane kwi lasu kiaecebe ki Twaumase, tudreadrekase ki wadulru sanaka manemane ka Twaumase.

²⁶ Kwi lasu ngiakalrilrigu si baebalre, la ciliki ku alathare lri kikaruburu ki Twaumase.

²⁷ Swaete ki lringawini ku sima; ku takilrisaisaneini beeate ku ricurane.

²⁸ Kwi lasu amani kwidra wamalra ki lacekele, la ravase kwidra ki kadrwa ku yakaikai ku umawmase ka ladaane, ai ku amakaruruburane lri kabebetethe kai ki lacekele si ladaane.

²⁹ Ku kalrane ki tacekecekelaneini kai lri dulru kawlai, adravane ka alalinguini lri mialri kawlrau.

³⁰ Kwi lasu kai lri maka ubere ki dradrimitane; kwi lasu lri mia ki ricingi ki angatu kilama; ku bengelraini lri kipalai ki valrigi.

³¹ Kwi lasu satalu ki kaika patengatengane, ngiadradraedraedrangelre; kudra kaika patengatengane lri ka amani kulri bilri iniane.

³² Lu kaiyana kela ku vai, kwi lasu lri aswalaanga karudame, mia ki ricingi karudame, kai pelanga kasalese.

³³ Kwi lasu lri mia ki cebe ki budu, mururu lu kaiyana kalreme, mia ki madru ki ulrive, sana ngipaipai malraicinga.

³⁴ Ku kai mwasakene mukuludru ki Twaumase ku umawmase lri kakadrwa ku lalake; ku satalu ki pavangalre lu tudaane lri kilama ki apwi.

³⁵ Ku kidremedreme kai ki laumawmase swaete ku draedrangelrane; kwi lalasu kiadremedreme ku atulisiane kabebetethe, si pia ku ngialisiane.