Yubu 14 - Ngudradreadrekadhane Ka Sisiu 魯凱語聖經

¹ Twaramuruta singikalrulai, laka edreekane ku tangilribatane, kwalrialrialri ku tapanianiakane.

² Miata ki ubulu si bengelrai kadrau, kalraici; miata ki alalingu kawlrau, kai idrengere asuru.

³ Twaumase, kunaku ka paramiakai ka umawmase, lri ubangalre drele nakwane, si ililuku nakwane mudaane ki tasaibaibangane si kisaibange?

⁴ Ku makudrulru ka umawmase lri dulru putaluvaivai ku mabula ku lamanemane? Ini, kai lri maka dulru lutumane!

⁵ Kai lragiane ki niake ki umawmase nikelretaneenga; ku cailini ikawmasane amanisu ku marasiakai. Ku tupagisanesu kadrwa ku umawmase kulri dulru lribate.

⁶ Kiatubiaku muswane putalidrumana kwi tadrelanesu, madha thethengete iniane, kwi lasu ani mia ki mwalrawlrau tulrepenge ku awngane ki minakavalane.

⁷ Ku kia pulebe ku angatu yakaiyana ku sidramane; alau lri dulrwana siwlriwlriane cebe, si rigarigi.

⁸ Adravane karudrangenga ku balace ikai adringi ki dae, si kacumunga ku cebe ikai ki daedae,

⁹ sana kipwacilai, wadulrwana rigarigi, la puricingi mia ki tau kilredreke ka angatu.

¹⁰ Ai kai umawmase sana pacai, aliakaainga; kwi lasu lu nguniakanenga yakai inu?

¹¹ Mia ki kadravane ka kadrwa ku mwalwaludru ku acilai, lu kadrekare ku baiyu,

¹² Kai umawmase lu pacainga kai wadulrunga siwlriwlriane panianiake; adravane kamudunga kai kawmasane subelebelenge kai lri maka pacunu, Kai lri aceacanenga pacunu twalai ki tapecane lini.

¹³ Anatumane la seketesu nakwane pikai swadriadringi, la nau kipaidringi, pakeela ku takabasavane kwi lisianesu, si kelrete ku vai ku taka barengerane nakwane.

¹⁴ Sana pacai kai umawmase, wadulrwana siwlri panianiake? Ai lri mukalavaku kwini ki mathariri ka vai, mukalava ku angilribatane ka vai ki matikurwane.

¹⁵ Lukamaninga kwidra, lri tawtausu, lai lri tubalreaku; lri kadalamesu nakwane ka bekacesu.

¹⁶ Lukamaninga kwidra, lri drelesu ku tapudrapalaneli, ai kaisu lri dungudungunga ku tapasalrivaneli.

¹⁷ Lri pacepesu ku tapamamaneli, si mwalra patuelre ku pasalrivaneli.

¹⁸ Mia ki lalrelrelrege ka ngwatukadre si katatithiri, ka latarugutugu lregelrege ka kiapatalula twalai ki nataikaiyane,

¹⁹ warudrawdru pakalisi ki lrenege kai mwalwaludru ka acilai, kai sedreke la drakwase ki dae; lri mialrisu amudu ku sidramane ki umawmase.

²⁰ Wadrepetesu ki umawmase, si palralrawthunga pakatwase iniane; wamalrasu iniane kai pathingalanenga ku tangimiamianeini, si pakatwasenga iniane.

²¹ Lu kilrigulrigu ku lalalakeini, kwi lasu kai wathingale; lu kiaruburubwane la mialri kai thingale.

²² Kathane ku kwalrialri ki kinawmasaneini ku thingale; ngiatatubitubi ku takaumawmasaneini sikakathane.