Yubu 13 - Ngudradreadrekadhane Ka Sisiu 魯凱語聖經

¹ Kilakikai patuelre patakamacamacanga naku drele; la ka kialalranga naku, si pulringalringau patuelre.

² Ku thingalenga numi, mialriaku thingale; kadrwa ku kaika takisasilanganeli numiane.

³ Lri suswaku papia ki wadulru sanaka manemane ka Twaumase, kainaku lri papia numiane susu; lri papiaku ki Twaumase putaluvaivai kai tangimiamianeli.

⁴ Kwi tavuvulrucane numi wasubusubu ki kulrungane numi; amani numi kudra kai maka wasulrau si pamudringai ki caemane ka tarasulrasulrau.

⁵ Alaiyasi icelrebe numi kai avavaga, alau lri ikaai ku umawmase ku malrigili lri iya numiane!

⁶ Kaiasasane kilalra kai sakiecebaneli kawriva; si kirarakete kai kitubili.

⁷ Anu tavuvulrucu? Kwini kaika patengane ka vaga numi yakai ku paluludane papia ki Twaumase?

⁸ Nai pusakai ki Twaumase kawriva amia numi? Nai mwa tasaibaibangane pelaela ku tangimiamianeini amia numi?

⁹ Alaiyasi ngiabaalai drele numiane ku Twaumase, lri dulru kidringai ku mathariri ku manemane? Lu kidremedreme numi kaikatumane tavuvulrucu ki Twaumase, mia lu tavuvulrucane ki umawmase amia numi?

¹⁰ Adravane kibubuli numi pusakai ki umawmase, ku Twaumase lri tara kaelaela numiane.

¹¹ Ku matiwsakenane ki Twaumase kai pakathathiburu numiane si amama numi ku atumanane? Kai numi mwakuludru iniane?

¹² Ku supilri ka kavagavagane numi mia ki thuvugu ka kadrwa ku paluludane; ku takawrivane numi kidrikisi mia ki malubiri ka dulraki ka kadrwa ku puku.

¹³ Icelreba, nau kawriva; ku lrika angimiane, nau ka amaninga ka siamece.

¹⁴ Ku sangitumaneenga, padulrunga naku adravane pacadhane.

¹⁵ Kadrwanga ku sidramaneli, adravane papacai nakwane ku Twaumase lrika tumane? Lri icucubungwana naku iniane ngipapasikai kawriva.

¹⁶ Alau lri dulru palribulu nakwane kai galremegemaneli, asi lwiyane ku manganga ka umawmase kai walreme cucubungu ki Twaumase.

¹⁷ Kaiasasane kilalra kai aiyaneli kawriva, icelreeba la kilalalra kai sakiecebaneli kawriva.

¹⁸ Padulrunga naku kai sakiecebaneli kawriva, asi lwiyane wathingalaku kalri kitukakadrwa ku pasalrivaneli.

¹⁹ Twaumase, lri kukususu nakwane? Alaiyasi ka ngimiyaiya kikai, lri icelrebaku, adravane pacadhaku ikatumane.

²⁰ Kiatubiaku muswane pukawna kai taidrusane kai kitubili, la nau kai twalai cucubungu muswane kilepenge:

²¹ Kiatubiaku muswane madha pathavungu nakwane; kiatubiaku muswane madha kukuludru nakwane.

²² Twaumase, kamania ka wahukuku, la nau kiecebe tubalre; ku lrika amaniaku ku wahukuku, lasu kamani ku kiaecebe tubalre.

²³ Maneemanelringa ku pasalriwli? Watumanaku pamama? Nau thingale ku tapasalrivaneli, ku kitupasalriwli.

²⁴ Asu ubere kai kidrele nakwane? Asu tubadha lu drelesu nakwane?

²⁵ Lri kukuludrusu ki kia valrigi ka vaeva ka mwacilri ka vasau? Lri saladhasu ki vaeva ka marudame ka sangu kimugiane?

²⁶ Pakiangeangesu kukusu nakwane, ku lrika abaneli ku nipasalrivane saka vavalakaku.

²⁷ Arakaisu ku kicikici kerenge ki drapaleli, si dredredrele ku tadadavacaneli, adravane ka tapudrapalaneli wadrelesu.

²⁸ Pangiamiasu nakwane ki vaeva ka macumu ka angatu, mia ki vaeva ka macalumukunga ka laimai.