Yubu 12 - Ngudradreadrekadhane Ka Sisiu 魯凱語聖經

¹ Twabalre ku Yubu:

² Unu, amani numi ku malrigili ka umawmase; ai sana pacai numi, ku lrigilane lri tupapalra numiane pacai!

³ Ai miaku numiane kalrigili, kadrwa ku kaika padalili numiane; kwini kawrivariva numi aneane ku kai lri dulru iya?

⁴ Kaiasasane adravane ka latalragilragili mialri mulralraakai nakwane; madringelresaku kabula, kwi lalasu la mulralraakaiyana nakwane; ai ku Twaumase nakialalranga ku inulrili.

⁵ Kadrwa ku amatikurwanesu, la kelasu mulralrakai nakwane; walrumaisu kudra lri padaalrunga si tubakebake ku umawmase.

⁶ Makecengelringa kudra balrawbau ki lasadre; kudra pakagirimucu ki Twaumase ku umawmase twa twaumaselringa ki pukuini.

⁷ Lu kibulrua ki walrawlrawlrakwane ka waudriwdripi, lri bulru muswane; lu kivaga ki ngwababelenge ngipapapalai ka laadhadhame, lri pelaela muswane.

⁸ Kai lapanianianiake ikai ki kadaengane lri bulru muswane; lai lri lalrwai pelaela muswane kai yakai ki laveke kai lakange.

⁹ Kilakikai aneane ku kai wathingale, ala ka alrima ki Tamatama ka wabekace liniane?

¹⁰ Kai niake ki lapanianianiake yakai ki alrima ki Twaumase patuelre; Kai niake ki umawmase la mialri ikai ki alrimaini.

¹¹ Mia ki lridame lu palalava ki akaneane, mia ki calringa lu kilalalra ki lavaga.

^12-13 Kai tarudrawdrange yakai ku lrigilane, ai kai Twaumase yakai ku lrigilane la ikai ku puku. Kai tarudrawdrange yakai ku tadrelanenga lini, ai kai Twaumase yakai ku tadrelanengaini la ikai ku puku pangimia.

¹⁴ Ku burukunga ki Twaumase, aneane kulri dulru tupela tudaane? Ku ruvu ki Twaumase, aneane kulri dulru muruvu?

¹⁵ Kai Twaumase sana paidrengere ki udale, lri keela ku cengelrau; sana muelebe ki tacebeane, lri umuku lriau.

¹⁶ Magarange kai Twaumase, lri tara pamaleebe; ku watavuvulrucu si kiatavuvulrucu, tara yakaai ki alrimaini.

¹⁷ Ku Twaumase waribici ku lrigilane ki lawarathudu; la pakakulrungu ku tangivelevelane ki tarasaibaibange.

¹⁸ Ku Twaumase wasuburu ku takatalialaladhane ki latalialalai, kwi lalasu la amaninga ku kiaemenge.

¹⁹ Ku Twaumase waribici ku lrigilane ki labarakalai; la balre ki la maecenge ku puku ka umawmase.

²⁰ Ku la kiausakesakene ki umawmase la nguvaganenga; Ku Twaumase waribici ku lrigilane ki tarudrawdrange.

²¹ Pakiarubwane kudra ki laabelenge ku taetalane, la pakaulrau ku kindri ki la yakai ku puku.

²² Ku Twaumase patwalai ki dradrimitane padrelane ku kaika athingalane ka matiasamaimali; paledra ki dradrimitane ki apacadhane.

²³ Ku Twaumase pakagarange pangiradhekane ki lakuni, ala pamaki liniane, amudu liniane.

²⁴ Ku Twaumase pakakulrungu ki latamatama ki mapapangale, ku kaika athingalane ku apiane lini;

²⁵ kwi lalasu mia ki waungulu ku bava si kabusuku, la ikai kadradridrimitane lridralridralridrau.