Yubu 11 - Ngudradreadrekadhane Ka Sisiu 魯凱語聖經

¹ Ku Zupare ka swa Nama la tarumara kawriva:

² Kikai pamamama ka kadrwa ku kakudhane ka vaga kadrwa ku lri tubalre? Ku sasaiyaiyane kawriva ku umawmase bekace ka pacengeecenge patuelre?

³ Yubu, lu kidremedremesu kai lri maka tubalre amiasu naiane? Kawarivasu cacapange, kadrwa kulri maka kaelaelathe muswane?

⁴ Lu kidremedremesu pacengecengecenge patuelre kai vagali amiasu, mabulasu ikai cucubungu ki Twaumase.

⁵ Ani ka Twaumasenga ku twabalre muswane; ani ka amaningaini ka kawariva kaelaela muswane.

⁶ Lri arakai ku kaika athingalane ka matiasamaimali ka lrigilane pelaela muswane; yakai kwi ngwadriadringi turamuru, ka kaika amaka pulringalringavane ki umawmase. Ku pathavungu muswane ki Twaumase kaiyana kadali mamamwa ku naika akipangimianesu.

⁷ Lri dulrusu pulringalringau ku kaika athingalane ka matiasamaimali ka Twaumase? Lri maka paladekesu ku kikake ki wadulru sanaka manemane ka Twaumase?

⁸ Mia ki subelebelenge ka kadrwa ku talikaiyane, kadrwa ku adulrwanesu tumane; mia ki swadriadringi ku mwadringane, kadrwa ku thingalesu kuna vaevanga.

⁹ Maadrau turamuru, swadradrau ki kadaengane, ka mwadriadringi ki laveke.

¹⁰ Alaiyasi lri ruthuku emenge muswane ku Twaumase, si saibange muswane, aneane kulri dulru telenge iniane?

¹¹ Wathingale luka aneane ku ngiakathaithaithariri ka umawmase; wadrele pudriadringai ku kanganganga lini.

¹² Ku yaubulane ka ruba sana kitulalake pasalalaadha ki umawmase? Ku kadrwa ku thingale ka umawmase kai lri maka kalrigili.

¹³ Yubu, pikaiya ki kidremedremesu ku madringelrese; silapa kitubi ki Twaumase.

¹⁴ Demedeema sinau kwini pakakudrulru muswane kwi ngialisiane; madha pikaikai pasuru ki daanesu kwini kai madringelrese.

¹⁵ Lu ngimia kikai, lri kagarangesu cubungu kai kawmasane, si kapapedrenge kai talula, kadrwa ku mukuludrane.

¹⁶ Lri karimurusu patuelre kudra sakwalrialrisu, mia ki mwalwaludru ka acilai ka maulrau kai kingulringawnga ki umawmase.

¹⁷ Ku tapanianiakanesu lrika malealedra ki mwalringedele ka vai, adravane ikai ku dradrimitane, lrika miyaiyana ki mialrealre.

¹⁸ Lri kisupilrisu ku sulivatane, suete ku sidramane; ku Twaumase lri palakebe muswane, lai lri isaselebanesu.

¹⁹ Lu apecesu, kaisu lri mukuludru ki badhasu; lri takaalra ku umawmase kulri kela kitubi ku akiparalubane.

²⁰ Ai ku manganga ka umawmase lri malralrikacane, Kai maka kidringai ku angukaiyane mubere ku kadalranane; ku sidrama lini yai kathane ku apacadhane.