Yubu 10 - Ngudradreadrekadhane Ka Sisiu 魯凱語聖經

¹ Maupungaku ki niakeli. Lri putaluvaivadhaku kai lisianeli; lri pelaelaku kai kwalrialri ki kidremedremeli.

² Twaumase, madha tupasalrisalrivane nakwane; pelaelaili, manemane ku tapasalrivaneli?

³ Twadrekasesu ki bekacesu ka umawmase, la parangithisu papia ki tamadrekadrekasane ki manganga ka umawmase. Ku matiangeangane lu piasu kai, mamamwa ki kakudhane?

⁴ Bekacaini ku tadrelanesu ka mararamau ki umawmase?

⁵ Bekacaini ku niakesu ka mararamau ki umawmase ku edrekanane?

⁶ Asu ngithanga kirarakete ki pasalrivaneli? Asu silapeenga ku tapamamaneli?

⁷ Wathingalesu ka kadrwa ku pasalrivaneli; la thingalesu ka kadrwa ku umawmase kulri dulru palribulu nakwane pakatwase ki alrimasu.

⁸ Ngiakakamanisu ka wamalra methaelre pakabalrithi nakwane; kaiasasane lai lri ngikakamanisu amudu nakwane.

⁹ Kiatubiaku muswane ngulringava ka arakaisu ku dae bekace nakwane; kaiasasane lri pasiwlrisu nakwane paadae?

¹⁰ Pasapukwanesu ki ama la tulalake nakwane; la paumawmasesu nakwane ikai ki barange ki ina.

¹¹ Arakaisu ku uvace si culrale aparairaisi ki kinawmasaneli patuelre; la arakaisu ku beate si lrangici cabu ki uvace si culraleli.

¹² Patarwamarasu baai nakwane ku niake si migemi; siarapalesu ala panianiakaku.

¹³ Kaiasasane wathingalenga naku ku takidremedremanesu; maulainga ku takidremedremanesu ku akabebetethane nakwane.

¹⁴ Wadredredrelesu lu pasalrivaku lu tumane; kiadremedremengasu ku kaika apacepane nakwane.

¹⁵ Sana pasalrivaku, makakaaiyaku kipathavungu, lu kainaku pasalriu, la mialri kainaku thuru paswabelenge. Kia tusinalremelringa naaku, kwalringa turamuru.

¹⁶ Lu kirararagadhaku, pwalralrasu nakwane, mia lu pwalralra nakwane ku raiyungu; pakelasu ku arakai ku matiasamaimali kabebetethe nakwane.

¹⁷ Tara yakaai ku tapatwaladhanesu lrumai nakwane; ku lisianesu nakwane wadrimadrima sikakathane kai asakivalavalane; waedededesu kai reteretege lrumai nakwane.

¹⁸ Twaumase, asu pakitulalake nakwane? Anau kai nguniakaneenga sa kainaku dreleana kawmasane?

¹⁹ Lu twaladhaku ki barange ki ina la malradaalru katwase mutadralredralrekane, ka thadaalrane ki kadrwa, kaika mathaithariri?

²⁰ Kai tapanianiakaneli kaika lri tulrepengenga? Madha thethengete nakwane, nau ikaiyana kai ki tedraneana ka vai kiraragai.

²¹ Lri padaalrunga naku si katwase, sana katwasaku kainaku lri siwlringa; lri mwaku ki kialrilri ki apacadhane ka madradrimiti.

²² Ikai kavai kathane ku dradrimitane, lrilri ki apacadhane, madrarumadrimi; ikai kwini, adravane ka ledra sumimiringi kadradrimiti.