Yubu 1 - Ngudradreadrekadhane Ka Sisiu 魯凱語聖經

Ku Satange kiatuthiathingale ki Yubu

¹ Yakai ku tangea ka sia Yubu, yakai kai tali Uze; kai lasu mathariri ka umawmase, mapapedrenge ku kakwakudhane, si usakene ukuludru ki Twaumase, sanaka maliisi kai paiyaiya.

² Kai lasu tapitu ku lalalakeini ku sawvalai, tatulru ku labaibai.

³ Kwi lasu 7,000 ku kiuini, 3,000 ku lrakeda, kudrulu ku lwange, 500 ku ruba. La ikaiyana ku tathathatha ku sasiakawlu; ikai ki swa tali talrawane, kai lasu yai lri dulru madu satacekecekecekeelanenga iya.

⁴ Ku lalalake ki Yubu maubalribaalrithi ikai ki daane lini pangiakaneane ki badhabadha, la kai telrai dawlu ki tatulru ka betakane lini ka labaibai si taelre kanekane ungungulu.

⁵ Sana ngilribate ku tangiakaneanane lini, ku Yubu sana ngidrakale luka mialrealre, pasiakaai ki lalalakeini nguvavaeeva patarumara ku Lama ka lrisi, si tumabula ka lrisi. Kai lasu paiyaiyaiya kikai, asi lwiyane lu kidremedreme, ku lalalakeini amani lu kai thingathingale la tudrekase pasalriu ki Twaumase amia.

⁶ Yakai sakavaivai, ku lalalake ki Twaumase acegecege ikai cucubungu ki Tamatama, ku Satange la mialri ikai liniane.

⁷ Ku Tamatama la kivaga ki Satange, “Mwaininiinusu?” La tubalre ku Satange, “Wadadadavacaku kawmasane, mwa kidruanga” la iya.

⁸ La kivaga ku Tamatama, “Kiararaketesu drele ki sasiakawluli ka Yubu? Ikai kawmasane kadrwanga ku miyaiya iniane ku umawmase. Kwi lasu mathariri ka umawmase, mapapedrenge ku tangivelevelane, la usakene ukuludru nakwane, kai paiyaiya sanaka kai mathariri.”

⁹ Ku Satange la tubalre, “Ana kai ikai ku amuesadhane, nai usakeneana ukuludru muswane ku Yubu?

¹⁰ Tapalakeebanesu iniane si daaneini si sanaka manemaneini patuelre. Patarwamarasu baai iniane ku akaesadhane, la kasulialialiivate sanaka maneemane; ku lapulapuini ku lawaudriwdripini swaete lregelrege ubulane, kaika asiasipane ku kalrane.

¹¹ Kaiasasane ana malrasu patueelre ku manemaneini, la dredrele iniane lu kai picucubungu muswane kaelaela pusu!”

¹² Ku Tamatama amia kai ki Satange, “Mathariri, ku pikaini patuelre yakainga ki alrimasu, ngisasingikaiya ku nau pia iyasu, ai madha kabebebetethe iniane.” Ku Satange la twalai cucubungu ki Tamatama katwase.

Ku Yubu sakawlrase ki lalalake si tacekecekelane patueelre

¹³ Yakai sakavaivai, ku lalalake ki Yubu yakai makanaelre ki taka lini ngiakanekaneane ungungungulu ku bava kirararagai,

¹⁴ yakai ku walailai kela pelaela ki Yubu, “Ku lwange sa pavilrivilringi ikai angangade, si kanekane ku laruba ki ubulu ikai thili,

¹⁵ ku swa Seba pangiatutuluku kela kikaruburu, la alra ravase si iluku ki lanilapulapwane patueelre, la papacai demedeme ki lasasiakawlusu, kathanengaku ka mwabere, si kainganai pelaela muswane.”

¹⁶ Kwini lasu sakaiyana maka kawriva, ku tangea ka sasiakawlu la kela, si iya kai, “Walrikace si dreredrere, la papacai ki lakiu si la tara agwagu, la kakathanaku ka waudripi, si kela pelaela muswane.”

¹⁷ Kwini lasu sa kawrivarivana, la ikaainga ku tangeea ku sasiakawlu kaiyanganai, si iya kai, “Ku swa Kaledia twa taitulrwane kainganai kikaruburu naiane, la ravase ku lalrakeda patuelre, la papacai ki sasiakawlusu patueelre, kathanaku ka mwabere, si kainganai pelaela muswane.”

¹⁸ Kwini lasu la kaiyana maka kawriva, wakeelanga lailai ku tangeea ka sasiakawlu, si iya kai, “Ku lalalakesu sa ikai ki daane ki taka lini ngiakanekaneane ungungungulu ku bava kirararagai,

¹⁹ yakai ku valrigi ku twalai calragulragu kainganai valrigi, la buruku ki daane, ku yakai ki daane ku laumawmase la kidrepete si pacai makanaelre, tangeangeanga naku ku waudripi, si kainganai pelaela muswane.”

²⁰ La ngidrakale ku Yubu, si tubi thuriace ku laimaini, la kiriti ku isiu, si pidruru guruthungane ikai daedae sukubu ki Twaumase,

²¹ la iya kai, “Kadrwa ku ilukuli kitulalake, lai lri mialriaku lu pacadhaku kadrwa ku ailukaneli siwlri; ku pakalreva ki Tamatama, ku Tamatama lri sawlri. Ku nagane ki Tamatama swadalepe kidrengedrengere!”

²² Adravane ikai kai miyaiya kaika amatikurwane patueelre, ku Yubu kai pasalriu, kai akwalisi ki Twaumase.