Yesua 9 - Ngudradreadrekadhane Ka Sisiu 魯凱語聖經

Walrilrigili ki Yesua ku swa Gibiungu

¹ Ku taakaciane lini ki swa Iseraylri kia mapelaelanga ki swa tali sapakalriwgu lregelrege kadravane Yuredange, swa kalregelregane, si swa tali dratane babiabila ki laveke Miditerania, padaarurwana kela kavai tali dradha ka Lebanungu; la mialri kimapelaela mwa ki calringa ki latalialalai kwini ki laumawmase ki swa Hite, swa Amuri, swa Kanange, swa Perizi, swa Hivi si swa Yebuse.

² Kwini lalasu la maelrelre ku kidremedreme lini si kela pasana kiecebe ki Yesua si swa Iseraylri.

³ Ai, kudra yakai Gibiungu ku swa Hite ka umawmase kialalranga kwidra tapangimiane ki Yesua kwini ki cekele lini ki swa Yeriku si swa Ai,

⁴ la kalritheethe ku alrilrigilane lini ki Yesua. La kirimu malra kwidra supilringa ka puti si cinakupanenga ka lrangici ka tabavane si suragele ku laakaneane, la pasiamece ki ruba,

⁵ la ngiragelane ku papuripuricane ku laimai si cinakupanenga ku kece, mailuku kwidra marudamenga si maubilringanenga ku pange.

⁶ Kwini lalasu la kela ki tasuladhane lini ka Gilegale kikawriva ki Yesua si swa Iseraylri, la iya kai, “Twalai nai adaili turamuru kela kai, kiatutubi nai numiane ku amakaketeketane.”

⁷ Ku swa Iseraylri la kawriva, “Manemane ku akiketeketane nai numiane, alau yakaai numi kai ngudadeethane naiane?”

⁸ Kwini lalasu la kawriva ki Yesua, “Lri kisikawkawlu nai numiane kikai kela nai.” Ku Yesua la kivaga liniane, “Aneane numi? Twalai numi inu kela?”

⁹ Kwini lalasu la kawriva ki Yesua, “Singi adaili nai turamuru, ngwalai ku takilalrane nai ku saniangane ka nagane ki Tamatama ka Twaumase numi; ku tapangimianeini numiane ikai Izipiti patuelre,

¹⁰ si kwidra tapangimianeini patuelre kwini ki swa tali talrawane kadravane Yuredange ki tadrusa ka talialalai ki Amuri—Sihunge ka talialalai ki swa Hesebunge si yakai Asetaruthe ka talialalai ki Uge ka Basane, kialaalranga nai patuelre.

¹¹ Ku tarasangililuku naiane si lamapapangale padulrwa ku akaneane amia naiane, la twalai nai adaili kela kai drele numiane, kilalalra ku apadrekadrekasanane numi, kiatubi nai ku amakaketeketane numi naiane.

¹² Drela kikai iluku nai kai lapange, sa tau mulatalatadre nai maculuculwana, drela kikai, makitwa kamealenga, maubilringanenga.

¹³ Sa pasaelaela nai kai bava, baavaneana kai tabavane, ai kikai makitwa kasupilringa. Kai laimai nai, kece nai la mialri makitu ngwalai ki tasingi adailane nai la kapapuricinga.”

¹⁴ Ku swa Iseraylri la malranga tarumara kwini iluku lini kwini taipiane ku laakaneane, ai kai kiavaga ki Tamatama.

¹⁵ Ku Yesua la cegecegenga ku samakakadalruane ki swa Gibiungu, si palraingi ku kai papacai liniane. Ku latarasangililuku ki swa Iseraylri la mialri tukucingalre kiketekete, lri tara pasusu kikai samakaketeketane.

¹⁶ Saka samakatulrulu ku tamakaketeketane lini, ku swa Iseraylri ala pulringau kikai laumawmase ka swakai adeethe.

¹⁷ Kwini lalasu la katwase mwa kipasilape liniane. Samakatulrulunga, kwini lalasu la mwa kwini ki taikaikaiyane lini, kikwini ki swa Gibiungu, Kepira, Biruthe si Kiriathe Yerime.

¹⁸ Ai, ku swa Iseraylri kai maka papacai liniane, asi lwiyane kudra tarasangililuku liniane napapia ki nagane ki Tamatama ka Twaumase ki swa Iseraylri papia kai ki lalasu kiketekete. Ngwalai kikai, ku lamapapangale la kalisilisinga ki latarasangililuku.

¹⁹ Ai kwini latarasangililuku la kawriva, “Papianga nai ki nagane ki Tamatama ka Twaumase ki swa Iseraylri kiketekete liniane, kikai kaita lri maka papacai liniane.

²⁰ Ngwalai kai ki tapuvaganengata, lri tara palraingita paudripi liniane, lu kai ngimia kwini, ku Twaumase lri pathavungu mitane.

²¹ Papanianiaka liniane, ai kikai lalasu lri pasikaikai mitane bucuku ku sapwangatwane si lalri mwalrwalru.” Kikai yai kidremedreme ki latarasangililuku.

²² Ku Yesua iluka ki swa Gibiungu la iya, la kivaga liniane, “Kunumi anu kirimu lrulrucuku naiane? La thiingale numi ka yakai numi adeethe, anu kirimu twalai nai adaili iya?

²³ Ngwalai ki talrulrucukane numi, ku Twaumase twa pasalrivanenga numiane; lrika palralrawthunga numi aduri, si pasikaikai ki saniange ka taikaikaiyane ki Twaumaseli bucuku ku angatu si mwalrwalru.”

²⁴ Kwini lalasu la kawriva, “Ku kirimu nai talrulrucuku iya numiane amani sa pudriadringai nai thingale, ku Tamatama ka Twaumase numi wacunu ki sasiakawluini ka Musi, lu baai numiane kikai kadaengane, la mudaanenga numi kikai ki kadaengane lri papacai numi demedeme ki sanaka swakai kai ka umawmase. La mukuludru nai ku kiapapacai numiane, lakamani ku pia nai kikai.

²⁵ Kaiasasane kikai yalrimanenga nai numiane, ala singikaiya ku tatumane iya numi naiane!”

²⁶ Ku Yesua la malra palakebe liniane, si kai palraingi ki swa Iseraylri ku papacai liniane;

²⁷ ai kwi lasu twalainga kwini paaduringa ki lalasu, si pasikaikai ki swa Iseraylri si tapatarumaramarane ki Tamatama bucuku ku angatu si mwalrwalru. Pakela kaikameane, kwini lalasu pacungucungulu ikai kwini ki takelretane ki Tamatama ka tasukusukubane marasikaikai kikai awngane.