Yesua 8 - Ngudradreadrekadhane Ka Sisiu 魯凱語聖經

Kiakaruburu malra ka cekele Ai

¹ Ku Tamatama kawariva ki Yesua, “Kusu sangiluka kudra sanaka lri dulru kikaruburu si mwa kavai cekele Ai; madha mukuludru, madha kasulrisulri. Lri paakaciaku muswane ki talialalai ki cekele Ai; ku mapapangaleini, lacekele, kadaengane lrika muswanenga patuelre.

² Kudra natapangimianesu ki cekele Yeriku si talialalaini, lri mialrisu pangimia ki cekele Ai si latalialalaini; ai kikai lri maka ngipapasikai numi malra kudra lalawbubulu si lalwange. Lri singi lrilrikudrusu mwa mucekele Ai.”

³ Alakamani, ku Yesua si la lri dulru kikaruburu ka umawmase la kipadulrunga si mwa kavai cekele Ai. Kwini lasu la pilri ku ta 30,000 ku tagagarange ka kwapingi, pakatwase liniane sakamaungu.

⁴ Kwini lasu wadrekase liniane iya kai, “Kunumi lepenga ikai talikai kavai ki cekele, ai madha daidaili turamuru, kipadulrwa ku apangitutulukane mucekele.

⁵ Kudra maililukuli lri mucekele Ai; lu kela kidresenge naiane ku badha ka swa Ai, lri pangimia nai ku paswalala ngibangulu mubere.

⁶ Kwini lalasu lri saladha naiane, lri lrilrigili nai liniane katwase kidaili kavai cekele. Kwini lalasu lu drele lau lri mia ku paswalala ikai cucubungu liniane mubere lri iya naiane.

⁷ Lukamaninga kwidra, lri mutaluvaivai numi patumiamikace kikaruburu, mwa drikisi kavai cekele. Ku Tamatama ka Twaumase numi lri malra kikai cekele si baai numiane.

⁸ Lu drikisinga numi kikai cekele, la paluluda ku tadrekasane ki Tamatama, pwa lama kwini cekele. Kikai yai amani kudra baaili numiane ka drekase.”

⁹ Ku Yesua la sikawlu liniane mwa, kwini lalasu la daruru tali sapakalriwgu cekele Ai, kabicelrakane ki Bithele si Ai, ikai kwini lepenge ukalavalava. Ku Yesua la taelre ki mapapangale ikai ki takwapingane sulai.

¹⁰ Sakakaiyane ki mialrealre, ku Yesua la ngidrakale, sarubu ki lakwapingi si mapapangale. La karedele ki lamarudrange ki swa Iseraylri sangiluku ki lakwapingi katwase papia cekele Ai.

¹¹ Kudra sangiluku ki Yesua ku lakwapingi la katwase papia ki takadravane ka kadalranane arucucubungu, ikai ki tali dradhane ki cekele si cegecege ku takwapingane; kwini lalasu ku tamadadailane ki cekele Ai laka vaeva ka valrwalru.

¹² Ku Yesua la pakatwase ku lri ikaai kau 5,000 lepenge ikai tali sapakalriwgu ki cekele, ikai ki kabicelrakane cekele Ai si Bithelrihime.

¹³ Ku tapangimiane ku lri ka tasalikayane lini ki lakwapingi; kudra tapapangale ka lakwapingi yakai tali dradha ki cekele, ku walepenge ku kwapingi yakai tali sapakalriwgu. Kwini ki maungu, ku Yesua la sulai ikai kwini ki valrwalru.

¹⁴ Ku talialalai ki swa Ai sadrele ki kwapingi ki Yesua, la makakaai mwa kidresenge kikaruburu. Kwini lasu wasarubu patuelre ki kwapingi, la papia valru Yuredange kwidra nataikaiyane ku paswalala makakaruburu ki swa Iseraylri, lakai thingale ala ka yakai kudra walepelepenge ku singi lrilrikudru ki cekele kela pangitutuluku kikaruburu.

¹⁵ Ku Yesua si kwapingini la ngikawbeberane, si papia calragulragu mawbebere.

¹⁶ Ku lasawvalai ki swa Ai la makitu kidawlu akwapingi katwase saladha ki swa Iseraylri; kwini lalasu lu aru saladha, arwa adaili ki cekele.

¹⁷ Ku laumawmase cekele Ai makanaelre saladhaladha ki swa Iseraylri, la kakadrwa ku yacekele ku umawmase, kadrwa ku wadrangalrungalru.

¹⁸ Sakamani kwidra, ku Tamatama la kawriva ki Yesua iya kai, “Malra kwini idirisu drukange papia cekele Ai; lri baadhaku muswane kikai cekele.” Ku Yesua la pangimia.

¹⁹ Kwini lasu la ciliki ku idirini, kudra walepelepenge ku lakwapingi la mutaluvaivai, malailailai papia cekele Ai, drikisi kwini ki cekele, si lama.

²⁰ Ku swa Ai sa paswalrikudru drele, twaebebebelrenga. Sakamani kai kwidra, kudra namwabebere papia tali calragulragu ku swa Iseraylri la ngibangulu kikaruburu liniane; kwini lalasu laka kadrwa ku tapapiane lini mubere.

²¹ Ku Yesua si lakwapingi la drele kwidra walepelepenge ka kwapingi ka wadrikisinga cekele Ai, ku cekele la kulamalamanga, ala ngibangulu papacai ki labadha.

²² Kikai kwidra, kudra mwa cekele ku swa Iseraylri la kainganai mutaluvaivai kidresenge. Ku laumawmase ki swa Ai la kilringulunga ki swa Iseraylri, kipapacai demedeme, kadrwa ku natangeeanga ku waudripi.

²³ Kathaane kudra talialalai ki cekele Ai, kadrwa ku waudripi ku natangeeanga. Ku talialalai ki swa Ai, la kipwalra, si kiiluku mwa cucubungu ki Yesua.

²⁴ Ku swa Ai la saladha ki swa Iseraylri daruru ki takaububulane; la ikai kwini, ku swa Iseraylri la papacai liniane demedeme. Ala katwase mwa cekele Ai, la mialri papacai demedeme ki yacekele.

^25-26 Ku Yesua la katadrukangane arakai ku idirini papia cekele Ai, pakela kudra takipapacadhane makanaelre kwini laumawmase, ala sarare kwini idirini. Sakavai kwini, ku umawmase ki cekele Ai kiapapacai makanaelre, ku sawvalai si ababai ta 12,000.

²⁷ Ku swa Iseraylri singiakai kudra tacunane ki Tamatama ki Yesua, la malra kwini lalwange si lalawbubulu paasuru.

²⁸ Ku Yesua walama ki cekele Ai; pakela kaikameane ku cekele Ai thadalraneana ka kinaburukane matiisesepele.

²⁹ La malra kwini ki talialalai ki cekele ka Ai tinuthelrece pakelrai pikai ki angatu, la palraingi pikai kwini ki wapacainga ka kinawmasane, pakela ki miauawbu. Sa lrilriugunga ku vai, ku Yesua la drekase ki umawmase malra kwini wapacainga ka kinawmasane, cilri pulatadre ki taelelebane ki cekele. Kwini lalasu la abate ku lrenege pasuete ki wapacainga ka kinawmasane; kikai niabatane ka lrenege pakela kaikameane la ikaaiyana kwini.

Yakai lregelrege Ibale silrigu ku hulrice

³⁰ Ku Yesua yakai lregelrege Ibale pasikai ki Tamatama ka Twaumase ki swa Iseraylri tutapatarumaramarane,

³¹ ka singikai kudra tapelaelane pia kwini iya ki sasiakawlu ki Tamatama ka Musi ki swa Iseraylri darepe; ku hungu ka hulrice ki Musi wapacase, “Arakaiya ku kaika nitulrenegane arakai ku adreme darepe ku tapatarumaramarane.” Kwini lalasu la pikai kwini ki belenge patarumara baai ki Tamatama kudra Lama ka lrisi, la mialri patarumara ku Sulivatane ka lrisi.

³² Ikai kwini, picucubungu ki swa Iseraylri, ku Yesua la malra kudra pacase ki Musi ka hulrice tubavane pacase pikai belenge ki lrenege.

³³ Ku swa Iseraylri si lamarudrange lini, lakiacapili, tarasaibange, si yakaikai liniane ka sakamaelanane ka umawmase mawa drusa, acegecege maecebe ikai ki Langiane ki Tamatama, la cucubungu ki wabulribulri ka labarakalai ka swa Lrivi, kudra apararamau ku umawmase wacucubungu lregelrege Girizime, ku apararamaunga la cucubungu lregelrege Ibale. Ku sasiakawlu ki Tamatama ka Musi nawacununga liniane, kwini lalasu lulri kisubulrubulru yai lri tara pangimia kikai.

³⁴ Ku Yesua la singikaai ku tapacasane ki hungu ka hulrice, akwadrau silrigu patuelre kikai hulrice, paelre ku sasubulrubulrwane si sapuswane.

³⁵ Ikai ki padradrekase ki Musi nguvavaeeva, ku Yesua yakai ki tayelrelreane ki mapapangale silrigunga pelaela; ikai kikai ki laumawmase, paelre ki labaibai, lavavalake, si yakaikai liniane ka sakamaelanane ka umawmase.