Yesua 7 - Ngudradreadrekadhane Ka Sisiu 魯凱語聖經

Pasalriu ku Akange

¹ Ku Tamatama nawadrekase ki swa Iseraylri madha malramalra kudra atara pakamudane ku lalawbubulu, ai yakai ku umawmase ku pathaele ki nidrekasane. Kikai umawmase sia Akange, ka lalake ki Karemi, agane ki Zabedi, ku swa Zera ka swakai ki zuku ki Yuda. Kai lasu kai paluludu kikai drekase, lakamani ku Tamatama papia ki swa Iseraylri kaelaela pakilringau.

² Ku Yesua la sikawlu ku umawmase twalai Yeriku mwa ka talikai kwini ngwadadethe Bithavenge, tali talrawane Bithele ka cekele Ai, la drekase liniane mwa lrilriu kwini talikai kwini. Kwini lalasu samaka lrilriunga,

³ la siwlri pelaela ki Yesua, “Kaita lri makanaelre lu katwaseta mucekele ki swa Ai, sana arakaita ku tadrusa tatulru ka kudrulu lri makakeelrete, asi lwiyane kwini yakai cekele ku sawvalai kai tathainu.”

⁴ Ala kamani ku mwa ki ikai kau ta 3,000 ku swa Iseraylri mwa mucekele Ai, ai kwi lalasu kia pasiwlri.

⁵ Kwini swa Ai ku laumawmase la saladha liniane, twalai taelelebane ki cekele saladha daruru Zebaringi, la pikai kwini ki swa lrawlrawdru papacai ku ta 36 ku umawmase. La ngwalai kikai ku swa Iseraylri laka kadrwanga ku garangane lini.

⁶ Ku Yesua si laciwru ki swa Iseraylri la tubi turamuru si thuriace ku laimai lini, la malra ku abu si ngicacabungu ki awlru, ikai cucubungu ki Langiane ki Tamatama guruthungane idaedae, pakela ki miauawbu.

⁷ Ku Yesua la kawriva, “Abebeelengenga ka Tamatama, asu iluku naiane talubalre Yuredange? Lri baaisu naiane ki swa Amuri, si amudu naiane? Asu kai suru naiane pikai talikai kavai kadravane Yuredange?

⁸ Tamatama, kaiasasane kai swa Iseraylri kiapamalebe ki badha si kipasiwlri, manemaneana ku aiyaneli?

⁹ Kikai swa Kanange si swakaikai kai laumawmase makanaelre sa kilalra kikai tangimiane, lri kela lringulu naiane, si malra papacai naiane demedeme, lu kamani kwidra, lalri pangitumaneanasu palakebe kwini ki lringausu?”

¹⁰ Ku Tamatama la kawriva ki Yesua, “Ngidrakala! Asu guruthungane ikai daedae?

¹¹ Kai swa Iseraylri pasalriunga! Pathaele ku drekaseli, si lrikudru kwidra ki tamakaketeketaneli liniane. Wamalra kwidra kaika amalramalrane ka lalawbubulu, kwi lalasu kwaupa kikai lalawbubulu, la apaelrelre ki lamanemane lini, si sekete balai.

¹² Lakamani, kai swa Iseraylri kai lri maka tumane kiecebe ki badha. Amalebe kai lalasu, asi lwiyane kai lalasu ngiadadawlu ku akamudane ka pasalrivane. Kathaane lu kabebetethe numi kwini la kaika amalramalrane ka lawbubulu, kainaku lri tapalranga numiane!

¹³ Kikai kusu ngidrakala, la bula ki mapapangale, si papadulru liniane, lwiya la kela kai nakwane cucubungu, asi lwiyane kunaku ka Tamatama ki swa Iseraylri lri pelaelaku liniane, ‘Swa Iseraylri, wamalra numi kwini tara amuda iyali drekase kwini niravasane ka lalawbubulu. Lu kai numi mwalra si cilri kikai lamanemane, kunumi kai numi lri maka kidresenge ki labadha!’

¹⁴ Kusu cuna ki mapapangale, lwiya lukamialrealre, singikaiya ki lazuku isarubu, la tarungangeea ka zuku kainganai. Sana dawlaku ki saneane ka zuku, kwini zuku lri singikai ki maretetese kainganai mucucubungu. Lu dawlaku ki taingea ka maretetese, kwini maretetese lai lri singikai ki dadaanane kainganai mucucubungu. Lu dawlaku ki taingeane ka dadaanane, kwini dadaanane, lri tarungangeea kainganai mucucubungu.

¹⁵ Kwini kiasunagane kwini umawmase, amani kudra wamalra kudra atara lamane ka niravasane ka lamanemane ka umawmase, lri malra numi lama iniane, paelre kwini ki wacekecekeleini si lamanemaneini mialri lama; asi lwiyane kwini lasu wabalre ki takiketeketaneli, si pakiarubwane ki swa Iseraylri.”

¹⁶ Sakakaiyane ki mialrealre, ku Yesua la dawlu ki swa Iseraylri nguvavaeva ki lazuku kainganai mucucubungu, kudra swa Yuda ka zuku la kisunagane.

¹⁷ Kwini lasu la dawlu ki zuku ki swa Yuda, tarungangeea ki maretetese kainganai mucucubungu; ku maretetese ki Zera la kisunagane. La dawlu ki wa Zerane tarungangeea ki dadaanane kainganai mucucubungu, ku tai Zabedi la kisunagane.

¹⁸ Ku bibiilrilinga kwini lasu la dawlu ki tai Zabedi tarungangeea kainganai mucucubungu, kudra agane ki Zabedi, ka lalake ki Karemi ka Akange la kisunagane.

¹⁹ Ku Yesua la iya kai ki Akange, “Lalakeli, tukapatengatengana ngipapelaela ku pasalrivanesu ikai cucubungu ki Tamatama ka Twaumase ki swa Iseraylri. La pelaelaili, watumanesu; madha sesesekete nakwane.”

²⁰ Ku Akange la iya kai, “Unu, pasalrivaku ki Tamatama ka Twaumase ki swa Iseraylri.

²¹ Ikai ki laravaseta ka lamanemane, wadrelaku ku taingea ku mathaariri ka sapakabelebelengane ka laimai ki swa Babilunia, la ikai ku lri ka drusa ka kukingi ku gingi si pararamau ki kukingi ka kingi. La karavaku kikai lamanemane, si malra iluku. Kikai lamanemane nidralrekane piadringi ki daedae ki balrawbauli, ku gingi sadriadringinga.”

²² Ku Yesua la sikawlu ki umawmase katwase mwa kwini ki balrawbau silape, la drele kwini la atara lamane ka lamanemane ka nidralrekane pikai adringi ki daedae. Ku gingi laka sadriadringinga.

²³ Kwini lalasu la malra kwini lamanemane salri pulatadre ki balrawbau, si iluku mwa ki Yesua si swa Iseraylri makanaelre, la sagai picucubungu ki Tamatama.

²⁴ Ku Yesua si mapapangale ki swa Iseraylri la ruthuku ki Akange, malra ku gingi, sapakabelebelengane ka laimai, kingi, paelre ki lalalake ki Akange, lwange, kiu, ruba, balrawbau, si patuelre sanaka maneemaneini iluku mwa kavai, “Amatikurwane ka valrwalru”.

²⁵ Ku Yesua la iya kai ki Akange, “Asu iluku baai naiane kikai amatikurwane ka sapapacai? Kaikameane ku Tamatama lri baai muswane kai amatikurwane ka sapapacai!” Ku mapapangale la arakai ku lrenege cabiri papacai ki Akange si wacekecekeleini makanaelre, lama kudra lamanemaneini demedeme.

²⁶ Kwini lalasu la sarubu ku lrenege pubelenge ki kinawmasane ki Akange. Kikai nirubwane ka lrenege pakeelanga kaikameane yakaaiyana. Lakamani kikai, kwini kadaengane pakela kaikameane sia “Amatikurwane ka valrwalru” iya. Ku Tamatama ala kabasau ku lisianeini.