Yesua 6 - Ngudradreadrekadhane Ka Sisiu 魯凱語聖經

Takimucekelane ki swa Yeriku

¹ Kwini swa Yeriku pwadriadringai elebe kwini saelelebane ki cekele, la padrima kadrenge, pakai ku kaika amucekelane ki swa Iseraylri. Kadrwa ku umawmase kulri maka masasawlri.

² Ku Tamatama kawariva ki Yesua, “Wamalranga naku ki cekele ki swa Yeriku, paelre ki talialalai si lakwapingi lini, pataelrenga naku pikai ki alrimasu.

³ Kusu sangiluka ki lakwapingi, ki vaivaai ngithalringula apatatuku ngusivale ki cekele, kai isadra makanemele.

⁴ La sikawla ku tapitu ku barakalai, makitu malra savavaeva ku satawtavane ku lawngu ki kiu ka rapa, lri sacucubungu ki Langiane. Luka samakapitulu, lri sangilukusu ki lakwapingi ngithalringulu ki cekele ngusipitulu, ala kwini tapitu ka barakalai lri ngirapa arakai kwini lawngu.

⁵ Ala lri tawtau akuvale akuelrenge; sana kilalra numi kikai niakuelrengane, makitu akwadrava makakaraleale, kwini alradre ki cekele lri mukadrulu kaburuku. Kikwini, ku kwapingi lri makanaelre papia cekele maswararau.”

⁶ Ku Yesua la sarubu ki labarakalai, la kawriva liniane, “Kunumi bulria ki Langiane, ikai kwini ku tapitu lri itali cucubungu ki Langiane ecenge ku rapa.”

⁷ Ala parwakai, kwini lasu la drekase ki kwapingi pathagili ngithalringulu ki cekele. Aswalaala kwini tara sacucucubungu ka kwapingi, aswala kwini ki Langiane ki Tamatama.

^8-9 Ala, kwini Yesua sa kawriva ila iya, kwini tarasacucucubungu la katwase sacucucubungunga, ala kamani kwini tarangirapa ka labarakalai, ala kamani kwini tarabulri ku Langiane ka labarakalai, ala kamani kwini tarasalrilrilrikudru. Kwini tapitu ka tarangirapa ka barakalai latarakadadalranane ngirapapa;

¹⁰ ai ku Yesua wadrekase ki kwapingi ku kaika akaralealane, lu drekase lri makakaraleale.

¹¹ La pia kikai, ku Yesua la drekase liniane bulria ku Langiane iya, si ngithalringulu ki cekele, ala siwlri mwa ki tasuladhane, ikai kwini sulai.

^12-13 Sakakaiyane, ku Yesua sa ngidrakale sa kaliare. Ku labarakalai si lakwapingi saka kingipusale ngithalringulu ki cekele. Kwini lalasu singikai ku tapangimiane lini kwiya masakaikai katwase dadavace; amani ku tarasacucucubungu ka aswala sacucubungu, ala kamani kwini tapitu ka tarangirapapa ka labarakalai, ala kamani ku tarabulribulri ku Langiane ki Tamatama ka barakalai, ku bibiilrilinga lakamani kwini tarasalrilrilrikudru. Kwini tapitu ka tarangirapapa ka barakalai la tara kadadalranane ngirapa.

¹⁴ Kikai nimaka valane, kwini lalasu la ngusivalenga ngithalringulu ki cekele, ala katwase siwlri mwa ki tasuladhane. La pangimia kikai, edeede makanemele, kwini lalasu katwatwase ngithalringulu ki cekele.

¹⁵ Saka samakapitulu, kwini lalasu sa kaliare la ngidrakale, la tuthadaalrane ngithalringulu ki cekele ngusipitulu. Kathane kikai ki vai, kwini lalasu ngwasipitulu ngithalringulu ki cekele.

¹⁶ Sa lrika saka ngusipitulu salri padalrunga si ngirapa kwini tarangirapapa ka labarakalai, ku Yesua la drekase ki kwapingi akwadrava makakaraleale iya, la pelaela liniane, “Ku Tamatama wamalranga kikai cekele baai numiane!

¹⁷ Kwini yakai cekele sanaka lamanemanenga demedeme pwa pakalalisi, malra tusapatarumarane ki Tamatama; ai kathane kwini ki alisu ka pairairange ka Rahabe si wacekecekeleini, kunumi lri tara pacepe numi liniane kwini niake lini, asi lwiyane amanini ka wamalra balai kwidra ki wamwa lrilriu ka sakacekeleta.

¹⁸ Kunumi madha malramalra kwidra lrika atara amudane ku lawbubulu; alaiyasi la malra numi, lri kamani numi ku wadawlu ku apamatikurwane, akamudane ki taikaiyane ki swa Iseraylri.

¹⁹ Kwidra sanaka niarakaiyane ku kingi, gingi, lriwlu si adreme darepe ka lawbubulu tara pakabula si anika Tamatamanenga, la malra si puadringi ki talamanemanane ki Tamatama.”

²⁰ Ala kwini labarakalai la pathagili tawtau, sa kilalra ku mapapangale la makitu karaleale, kwini alradre ki cekele la tupapalra mukadrulu. Ku lakwapingi la makanaelre katwase papia tali cucubungu, drikisi si ravasenga kikwini ki cekele.

²¹ Arakai ku lrabu papacai demedeme kwini ki cekele sanaka umawmase, kai susu ku sawvalai labaibai tarudrawdrange si lavavalake wademedeme papacai. Kwini lalasu la mialri papacai ku lalwange, lakiu si laruba.

²² Ku Yesua la kawriva kwini ki wamwa lrilriu, “Kunumi lu mwa ki daane ki Rahabe, la singikai ku takiketeketane numi iniane, malra ki alisu si wacekecekeleini iluku pulatadre.”

²³ Kwini lalasu la mwa iluku ki Rahabe, la mialri kwini ki marudrawdrangeini, betakaneini, si drumane ka wacekecekeleini iluku pulatadre, si pikai kwidra ki tali latadre ki tasuladhane ki swa Iseraylri ka takilakebane.

²⁴ Ku swa Iseraylri la pwa lama lawbu kwini ki cekele. Kwini lalasu kathane kwini niarakaiyane ku kingi gingi lriwlu si adreme darepe ka lawbubulu, wamalra pwa ki talawbubulane ki Tamatama, ku tedrane la lama patuelre.

²⁵ Ku Yesua palakebe pawdripi ki niake lini ki Rahabe si wacekecekeleini, asi lwiyane amani sa nawamalra balai kwidra sikawlu ki Yesua pamwa Yeriku ku tadrusa ku walrilriu. (Kwini Rahabe si wacekecekeleini twalainga kwini ikainga ki swa Iseraylri.)

²⁶ Kikwini, ku Yesua la puvaga ku taingeane ku tinukucingalrane ka sapakipapawlringavane ka vaga: Ku Tamatama ani pusunga kwidra nau pasiwlri tucekele Yeriku amiamia ka umawmase, Kudra wakarwalai ki cekele ku umawmase, lri kawlrase ku tinueapane ku lalake; kudra pacegecege ku taelelebane ki cekele ku umawmase, lri kawlrase ku lrulai ku lalakeini.

²⁷ Ku Tamatama watapalra ki Yesua; ku Yesua la kimatikainga kimathingathingalenga ki la swa talikai kikwini.