Yesua 5 - Ngudradreadrekadhane Ka Sisiu 魯凱語聖經

¹ Ku tali sapakalriwgu ki kadravane Yuredange ka latalialalai ki Amuri si ngwababiabila Miditerania ka latalialalai ki swa Kanange kialalra ku Tamatama sa pakameale kadravane Yuredange, la pangukai ki la swa Iseraylri, la makitu ngituluku turamuru ku kidremedreme lini, mianga ki kadrwa ku abake.

Takigelregelrane ka lrisi ikai Gilegale

² Ku Tamatama wacunu ki Yesua, “Kusu arakaiya ku madrunguru ka lrenege si tubakale, la tupela pasikai ki swa Iseraylri gelregelre tulrisi.”

³ Ku Yesua la pia tubakale ku madrunguru ka lrenege, ikai kwini ki “Gelregelre ka lrisi ka lregelrege” pasiakai ki swa Iseraylri gelregelre tulrisi.

^4-6 Sa katwatwase Izipiti ku swa Iseraylri, kiagelregelreenga ku lasawvalai. Ai kwini taikaiyanenga lini calragulragu taramasupatele ka caili acaicali si kudra tulalake lini kudra lasawvalai kadrwana ku kiagelregelre tulrisi. Samaka tara masupatelenga ka caili, sa tau katwase Izipiti si kudra wadulrunga kikaruburu ku lasawvalai makitua pacainga, asi lwiyane kwini lalasu pathaele ki Tamatama. Ku Tamatama nakiaketekete, kai palraingi liniane maka drele kwini kiketeketeini ki lacucungulane lini, ku abaadhane liniane kwini mwalwalwaludru ku mireke si valu ka mathariri ka kadaengane.

⁷ Kikai lamwabaibalrithi ki lalasu kadrwana ku takigelregelrane; ku Yesua la pasikai kikai mwabaibalrithi pakigelregelre tulrisi.

⁸ Samaka pakigelregelrenga, ku mapapangale makanaelre makitu asurwana ikai ki tasuladhane lini, pakeela ku akabasavane kwini dula.

⁹ Ku Tamatama kawariva ki Yesua, “Kaikameane, mwalranga naku ku takitusinalremeane numi aduri ikai Izipiti.” Lakamani, pakela kaikameane, kikwini kadaengane pasia naaganeana pasi Gilegale.

¹⁰ Ku mapapangale ki swa Iseraylri twatasuladhane ikai Gilegale. Kikwini ki dramare saka maka 14 ki maungu, kwini lalasu pasusu ku Takilragavane ka lrisi ikai dratane Yeriku.

¹¹ Sakakaiyane, kwini lalasu tau kane ku taleke ki swa Kanange, yakai ku niakamane ku mugi si kaika nipawsemakane ka pange.

¹² Sakavai kwini, ku mana twalainga kwini kai mulebenga, ku mapapangale ki swa Iseraylri kai wakanekanenga ku mana. Twalainga kwini pathagili, kwini lalasu wakanenga ku taleke ki swa Kanange.

Abebeelengenga ki kwapingi ki Tamatama si Yesua

¹³ Ku Yesua salri padaalrunga si daruru Yeriku, la kirimu drele ku tangea ku umawmase acegecege ikai cucubungu iniane, ku alrimaini waecenge ku nisuudrane ku lrabu. Ku Yesua la mwa aru cucubungu si kivaga iniane, “Lri paralubusu naiane, lri paralubusu ki badha?”

¹⁴ Kwini lasu la kawriva, “Kai ngiamia kwini. Kai kelali lri kamaniaku ku abebeelengenga ki kwapingi ki Tamatama.” Ku Yesua la guruthungane ikai daedae si sukubu iniane, la kawriva, “Tamatamali, sasiakawlaku muswane. Manemane ku acunanesu?”

¹⁵ Kwini abebeelengenga ki kwapingi ki Tamatama la kawriva, “Mwalra kwini kecesu! Asi lwiyane kwini taacegeceganesu saniange ka kadaengane.” Ku Yesua la singikai ku takawrivaneini si pangimia pia.