Yesua 4 - Ngudradreadrekadhane Ka Sisiu 魯凱語聖經

Sangulrialringavane ka raedre

¹ Samaka talubalrenga kadravane Yuredange makanaelre ku mapapangale ki swa Iseraylri, ku Tamatama la kawriva ki Yesua,

² “Kusu pilria ku ta 12 patwalai ki mapapangale, nguvaeva ki lazuku,

³ la cuna liniane mwa ki kadravane Yuredange, katwase mwa ki taacegecegane ki labarakalai, malra ku 12 ku lrenege, la iluku si pwa ki taikaiyane numi kai maungu sulai.”

⁴ Ku Yesua la sarubu kwini ki lapilrini ku ta 12 ku umawmase,

⁵ si cunu liniane, “Lu mwa kadravane Yuredange, la katwase aswala ki Langiane ki Tamatama ka Twaumase numi, ku tangeea lri patwalai adringi ki acilai malra ku vaeva ku lrenege, si angeale. Kwini vavaeva ka lrenege atalingikaiyane ki lazuku ki swa Iseraylri.

⁶ Kunumi sarubwa kikai lalrenege tusangulrialringavane ka raedre. Lukabibilrili, ku lamwabaibalrithi numi la kivaga numiane, kikai lalrenege sangulringalringavane ki manemane lu iya,

⁷ kunumi pelaela liniane, ku Langiane ki Tamatama sa talubalrebalre kadravane Yuredange yadrengere ku acilai. Kikai lalrenege lrika palralrawthunga ka apangulringavane ki swa Iseraylri ikai kai yakai ku palrealrebane ku tangimiyaiyane.”

⁸ Kwini ta 12 la pangimiana ku cunu ki Yesua. Kwini lalasu paluludu ku tacunane ki Tamatama ku vaga ki Yesua patwalai ki kadravane Yuredange malra ku 12 ku lrenege, kwini vavaeva atalingikaiyane ki vavaeva ka lazuku ki swa Iseraylri, iluku mwa ki tasuladhane lini, si la pikai kwini.

⁹ Ku Yesua la mialri ikai kwini ki kadravane Yuredange, kwini ki taikaiyane ki labarakalai bulri ku Langiane si acegecege, la patukudha raedre kwini 12 ka lrenege. (Kikwini lalrenege yakaaiyana kaikameane.)

¹⁰ Kwini tara bulribulri kwini Langiane ka labarakalai acegecege ikai kabicelrakane ki kadravane Yuredange, pakeela ku tatulrepengane ki mapapangale ku cunu ki Tamatama ki Yesua pangimia kwini iya liniane. Kikai sia tangadrane kwidra tapadrekadrekasane ki Musi pia kwini iya. Ku mapapangale la kirariimu katwase talubalre Yuredange.

¹¹ Sa darurunga balrealreanane, ku labarakalai wabulri ku Langiane ki Tamatama, si lribate ki mapapangale, mwa cucubungu.

¹² Ku zuku ki Riwbingi, Gade kwini taidrusa ka zuku, si pararamau ka zuku ki Manase ka la ngiaragelanenga ka kwapingi, la pangimia ku cunu ki Musi, ka mialri sacucubungu ki mapapangale.

¹³ Lri ikai kau tasupate ka kudrai ku ngiararukudru ka kwapingi yakai cucubungu ki Tamatama talubalre, si mwa dratane Yeriku, padulru ku akikaruburane.

¹⁴ Kwini ki vai, ku Tamatama la pausakene turamuru kwini ki swa Iseraylri ki Yesua ka saniange ka tarasangililuku. Twalainga kikwini, ku Yesua mararamawnga ki Musi, makalautunga kimusakene ki mapapangale.

¹⁵ Ku Tamatama la cunu ki Yesua,

¹⁶ drekase kwini ki wabulribulri ki Langiane ka labarakalai twalai kadravane Yuredange mubelenge.

¹⁷ Ku Yesua la singikaai pangimianga.

¹⁸ Ku labarakalai sadredre mukameamealane, kwini acilai kadravane la pathagili ngivelevele mwaludru, mia ku siaswalane suete ki kadravane.

¹⁹ Ki aswalalanga ki dramare ki samakamangeale ka vai, ku mapapangale walribatenga kadravane Yuredange, la ikai tali talrawane Yeriku kwini ki Gilegale tutasuladhane.

²⁰ Ku Yesua la malra kwini twalai ki kadravane Yuredange ku 12 ku lrenege si cegecege pikai kwini.

²¹ Kwini lasu la iya kai ki swa Iseraylri, “Lubibilrili, ku lamwabaibalrithi lu kivavaga numiane, kikai lalrenege yai pangwalrialringau ki manemane,

²² kunumi pelaela liniane, ku swa Iseraylri nangwakakai dadavace ki kadrwa ku acilai ka kadravane Yuredange.

²³ Ku Tamatama ka Twaumase numi pakameale kwini ki ngiabarate icucubungu numiane ka kadravane Yuredange, pakeela ku takatwasane numi lribate makanaelre, mararaamau sakacaili kwidra pakameale ki laveke Suize, la katwase nai lribate.

²⁴ Ngwalai kikai, ku laumawmase ki kiacaebe belenge la makitu thingale ku puku ki Tamatama ka maadrau turamuru, ala kunumi lrika silrialribate numi apalralrawthu musakene ukuludru ki Tamatama ka Twaumase numi.”