Yesua 3 - Ngudradreadrekadhane Ka Sisiu 魯凱語聖經

Ku swa Iseraylri talwabalre kadravane Yuredange

¹ Sakakaiyane ki mialrealre, ku Yesua si la swa Iseraylri makanaelre la sara ngidrakaale, si katwase Sitime, kela kwini kadravane Yuredange, la ikai kwini cegecege ku tasuladhane, mukalava ku atalubalreane.

² Sa makatulrulunga, ku tarasangililuku la makitu mwa ki taikaiyane lini,

³ la cunu ki mapapangale, “Lu drele numi ki labarakalai ki swa Lrivi katwatwase bulribulri kwini Langiane ki Tamatama ka Twaumase numi, kunumi lri suburu numi kwini tasuladhane, la kabibilrili liniane katwase.

⁴ Kadrwana ku tadarurane numi kikai, lakamani ku asacucubungane sangililuku numiane. Ai kunumi madha adedethe ki Langiane, salrilrikudra kabibibilrili, ikai kau vaeva ka kunlri ku padailane.”

⁵ Ku Yesua la cunu ki mapapangale, “Kunumi ngibabula, asi lwiyane ku Tamatama lri pia ku pinangu Twaumasane ka puku ikai numiane lwiya.”

⁶ Ala cunu ki labarakalai bulria iya kwini Langiane, sacucubungu ki mapapangale. Kwini lalasu la singibila pangimia.

⁷ Ku Tamatama la kawriva ki Yesua, “Twalai kaikameane, kai swa Iseraylri makanaelre lri makitu musakene tusaniange ka tarasangililuku muswane. Kwini lalasu lri drele ka watapalraku muswane, mia ku siaswalane sa tapalraku ki Musi.

⁸ La cuna kwini ki wabulribulri ki Langiane ka labarakalai, lu darurunga babiabila kadravane Yuredange yai, kwini lalasu lri dadavace mwa ki acilai kadravane, si acegecege ibabiabila kameamealane.”

⁹ Ku Yesua la kawriva ki mapapangale, “Bwala! Kilalra kai vaga ki Tamatama ka Twaumase numi.

^10-11 Lu aru cucubungu numi, ku Twaumase lri tara pakatwase ki swa Kanange, Hite, Hivi, Perizi, Giregasi, Amuri si Yebuse. Kudra amani ka magagemegeme kawmasane ka Tamatama ku Langiane ki Twaumase lu icucubungu numiane talubalre kadravane Yuredange, lri thingale numi ku apalralrawthu ka Twaumase ka watapalra numiane.

¹² Kaiasasane, lri patwalai numi ki tai 12 ka zuku ki Iseraylri pilri ku tangeea ku umawmase, lri ta 12.

¹³ Ku labarakalai lu bulribulri kudra Langiane ki Tamatama ki amani ku wagemegeme kawmasane ka Twaumase si talubalrebalre yai, ku acilai kadravane Yuredange lri idrengere kai mwaludru. Ku singi dradha ku acilai lri abaiyu ikai ki taluvaale, si ngisaelengane.”

^14-15 Kikwini kwidra yacengeecenge ka kalakitalekane, ku acilai la suete kadravane. Ku mapapangale la musuburu ku tasuladhane ku balrawbau, si padulru ku alribatane kadravane Yuredange; ku labarakalai la mabulribulri ku Langiane si aswala katwase. Ku labarakalai sadredre ki acilai,

¹⁶ ku acilai la idrengere kai mwalwaludru, ku singi dradha mwaludru la ikai adeethe Zarethane kwini ki cekele ki Adame isarubu asivale ka saelengane, ku tali lrawdru ku mwalwaludru mwa ki Titimwane ka laveke la karetege. Ku mapapangale la makitu twalai balrealreanane deethe Yeriku lribate.

¹⁷ Sa ngukakaikai ki kameamealane ka drakerale ku mapapangale ki swa Iseraylri, ku labarakalai la mabulribulri ku Langiane ki Tamatama, acegecege ikai kabicelrakane ki kameamealanane ka kadravane Yuredange, mukalava ku alribatane ki mapapangale makanaelre.