Yesua 24 - Ngudradreadrekadhane Ka Sisiu 魯凱語聖經

Ku Yesua yakai Sekeme tupela kiketekete ki mapapangale

¹ Ku Yesua yakai Sekeme sarubu ki lazuku ki swa Iseraylri. Wasarubu ki lamarudrange, latamatama, latarasaibaibange si lakiacapili, kwini lalasu la makitu kela mucucubungu ki Twaumase.

² Ku Yesua kawariva ki mapapangale iya kai, “Ku Tamatama ka Twaumase ki swa Iseraylri amia kikai, ‘Kunadruma, kudra cucungulane numi, ku Tera si lalakeini ka Aberahame si Nahure yakai kavai kadravane Yuparati; kwini lalasu wasukusukubu ki drumane ka twaumase.

³ La ilukaku ki cucungulane numi ka Aberahame twalai kavai si ngukakai kadravane Yuparati, sangiluku iniane dadavace salraelre Kanange, la badhaku iniane ku tapangale ku lamwabaibalrithi. Wabaadhaku ki Isake iniane,

⁴ la baadhaku ki Isake ku tadrusa ku lalake ka sawvalai—Yakubu si Isau. La baadhaku ki Isau tali lregelrege ki Idume, tucunguluini; ai kudra cucungulane numi ka Yakubu si lamwabaibalrithi la katwase mu Izipiti.

⁵ Sakabilrilanenga, la sikawlaku ki Musi si Arungu, la pamatikurwaku paramuru ki swa Izipiti; ai la ilukaku numiane mulatadre.

⁶ Sa ilukaku ki cucungulane numi mulatadre Izipiti; ku swa Izipiti la arakai ku palridingi si ngwarigi ka kwapingi saladha liniane. Ku cucungulane numi la paswalana kela ki laveke Suize,

⁷ kwi lalasu la papia nakwane kitubi. La arakaiyaku ku sivale ku dradrimitane si malra pauvagai liniane si swa Izipiti, arakaiyaku ki laveke renere ki swa Izipiti, si thamukulu amudu liniane. Kikai tapangimianeli ki swa Izipiti, makitwadrelenga numi patuelre. “ ‘La kawlai ku taikaiyane numi calragulragu ubulane,

⁸ sakabilrilanenga, la ilukaku numiane kela ka tali talrawane ki kadravane Yuredange, si kela ki taikaiyane ki kadaengane ki Amuri. Kwini lalasu la kikaruburu numiane; ai wamalraku si baai pikai ki alrima numi, la dulru numi ravase kudra la kadaengane lini. Sa arucucubungu numi, la amudaku liniane.

⁹ Sakabilrilanenga, ku Balake ka lalake ki talialalai ki swa Muabe ka Zipure la kela kikaruburu numiane, la sikawlu padawlu ki lalake ki Biure ka Balame kela, pasana pusu numiane.

¹⁰ Ai kainaku kialalra ku vaga ki Balame, lakamani ku ngibalrelringa subulrubulru numiane; la ngimia kikai, la palribulaku numiane kidaili ki alrima ki Parange.

¹¹ La talubalre numi ka kadravane Yuredange, si kela ka Yeriku. Ku swa Yeriku la kela kikaruburu numiane, mia ki swa Amuri, swa Perizi, swa Kanange, swa Hite, swa Giregasi, swa Hivi si swa Yebuse kela kikaruburu numiane. Ai wamalraku liniane baai ki pikai ki alrima numi.

¹² Sa arwa cucubungu numi, la pakathathiburaku pakalrithavulu liniane, la pakatwasaku ki tadrusa ka talialalai ki swa Amuri; kikai kainu kamani ka wavelevele ku lrabu ku lraili.

¹³ Ku baaili numiane ku kadaengane kaika niarakaiyane ku puku numi si malra; ku baaili numiane ku lacekele kaika tudaane numi. Kikai yakainga numi kwini; ku kanekane numi kaika ngidaduku numi ku labudu si ulrive.’ ”

¹⁴ Ku Yesua la pacungulu kawriva, “Kunumi musakena si sukubu ki Tamatama, tukapatengatengaana ku kidremedreme ku gathimi si marasikai iniane. Kunumi mwalra kudra latwaumase ku sukusukubu ki cucungulane numi sa ikaikaiyana Mesuputamia si Izipiti, salikavaeva marasikai ki Tamatama.

¹⁵ Lwiyasi kai numi palraingi marasikai iniane, ala, kaikameane tara turingaringava, ku apasikaiyane numi kipuawngane luka aneane, luka amani kwini sukusukubu ki cucungulane numi sa ikaiyana Mesuputamia ka latwaumase, luka amani kikai taikaiyane numi ka sukusukubu ki swa Amuri ka latwaumase? Ala kunaku si wacekecekeleli, lri tara kipuawngane nai ki Tamatama.”

¹⁶ Ku mapapangale la tubalre, “Kunai pakela lumamilringi kai nai lri kidaili cilri ki Tamatama si katwase sukubu ki drumane ka latwaumase!

¹⁷ Ku Tamatama ka Twaumaseta nawasangiluku ki cucungulaneta si kuta kidaili ki takituduriane ka Izipiti; wadreleta patakamacamaca kudra piaini ku pinangu Twaumasane ka puku. Ikai ki tangukakaiyaneta ki lakuni, adravane ikai ki druanga, tara palakebe mitane pakasulivaliivate.

¹⁸ Sa mudadaneta kikai ki kadaengane, ku Tamatama pakatwase sanaka yakaikai kai ka swa Amuri. Lakamani kwidra, takipuawngane pasikai ki Tamatama; amanini ku Twaumaseta.”

¹⁹ Ku Yesua la kawriva ki mapapangale, “Ai kunumi kiau lulri dulru numi kipuawngane ki Tamatama. Asi lwiyane saniange turamuru ka Twaumase; kai lri maka lreme kudra ki kiaecebe iniane ka latwaumase. Kai lri pacepe kudra kulrungane si pasalrivane numi.

²⁰ Lwiyasi la kidaili numi iniane si kipuawngane ki twaumase ki maelane ka zuku, lri kiecebe numiane, pathavungu numiane. Adravane ka nakialibake numiane, lri malra amudu numiane.”

²¹ Ku mapapangale la kawriva ki Yesua, “Kunai lri tara kipuawngane nai ki Tamatama!”

²² Ku Yesua la kawriva, “Kunumi lri ngisasiwmi numi, pathingale ka malritheethe numi kipuawngane ki Tamatama.” Kwini lalasu la kawriva, “Unu, amani nai ka lri siwmi.”

²³ Ku Yesua ala drekase liniane, “Sanaka miyaiya kikai, kunumi mwalra nguelre sanaka twaumase ki maelanane ka zuku, si kalritheethe tukucingalre tupapalra ki Tamatama ka Twaumase ki swa Iseraylri.”

²⁴ Ku mapapangale la kawriva ki Yesua, “Kunai lri tara kipuawngane nai ki Tamatama ka Twaumase nai; lri pasalaladha nai iniane.”

²⁵ Ikai kwini ki vai, ku Yesua la pasikai ki mapapangale cegecege ku samakaketeketane; la ikai Sekeme baai ki mapapangale ku hulrice si tinukakudhanane.

²⁶ Ku Yesua la pacase kikai nidrekasane pikai ki hulrice ki Twaumase ka hungu, ala ikai kwini ki tailebe ki tharialupu ka angatu ka Alrivilrivi ka taikaikaiyane ki Tamatama cegecege ku vaeva ku maadrau ku lrenege.

²⁷ La kawriva ki lamapapangale, “Drela, kikai lrenege lrika amani ku sapatuthingalane mitane makanaelre; kikai lrenege kialalra patuelre ku takawrivane ku vaga ki Tamatama mitane. Lakamani kwidra, kikai lrenege lrika amani ku isiwmi numiane, amani lwiyasi la baebalre numi ki Twaumase numi.”

²⁸ Ala pakatwase ku Yesua kwini ki mapapangale, si makitu siwlri mwa ki kibaai lini ka kadaengane.

Tapacadhane ki Yesua si Ilriazare

²⁹ Sangilribatenga kikai, ku sasiakawlu ki Tamatama ka lalake ki Nunge ka Yesua wapacai; sa pacai kwidra tara 110 ku cailini.

³⁰ Ku swa Iseraylri la dralreke iniane pikai ki kibaaini ka kadaengane, amani kwini Timenathe Sera ka lregelrege Iparaime ki tali dradha ka lregelrege Gase.

³¹ Ku taikaiyane kawmasane ki Yesua, ku swa Iseraylri kiapuawawngane ki Tamatama; sapacainga, kudra la wadreleana ku tapasikaiyaneini ki swa Iseraylri patuelre ki Tamatama kudra laciwru sapanianianiakeana, ku mapapangale thadaalraneana kipuawawngane ki Tamatama.

³² Kudra mailuku ki swa Iseraylri twalai Izipiti kudra culrale ki Yusepe la mialri dralreke pikai Sekeme, kamani kwidra langai ki Yakubu arakai ku idai ka gingi ki agane ki Hamure ka tama ki Sekeme ka kadaengane. Ku lagagane ki Yusepe mwacungulu kikai kadaengane.

³³ Ku lalake ki Arungu ka Ilriazare la mialri pacai, la dralreke pikai Gibia, kamani kwidra kibaai ki lalakeini ka Pinehase kavai lrelrelrege ka tali lregelrege ka Iparaime.