Yesua 23 - Ngudradreadrekadhane Ka Sisiu 魯凱語聖經

Bibiilrilinga ka vaga ki Yesua

¹ Ku Tamatama pakasulivaliivate ki swa Iseraylri, la kawlainga si kai kiupupungunga ki ngiathalringulu liniane ka labadha. Kikai kwidra ku Yesua laka tarudrawdrangenga;

² La sarubu ki swa Iseraylri, lamarudrange, latamatama, latarasaibaibange si lakiacapili, la kawriva liniane, “Kikai tarudrawdrangenga naku.

³ Ku Tamatama ka Twaumase numi ku tapasikaiyane kikai ki lakuni patuelrenga, wadrelenga numi makanaelre; ku Tamatama ka Twaumase numi pasiakaikaiyana numiane kikaruburu.

⁴ Kunaku wamalranga naku sanaka niravasanenga si kaika niravasaneana ka kadaengane ki lakuni, patwalai talrawane ki kadravane Yuredange si kela sapakalriwgu ki laveke Miditerania—patuelrenga pavavala numiane ka lazuku tucungulu.

⁵ Ku Tamatama ka Twaumase numi lai malra liniane si pamawbebere numiane; lu arwa cucubungu numi lri malra pakatwase liniane. Kunumi lalri singikai numi ki tapuvagane ki Tamatama ka Twaumase numi, si malranga kikwini lakadaengane lini.

⁶ Lakamani kwidra, kunumi kakecenga, tara pasusua singibila kwini pacase pikai ki hulrice ki Musi ka lapadradrekase, madha tudreadreadrekase.

⁷ Kunumi madha maelrelre kwini ki asuru ikai numiane kudra maelane ka zuku; madha matikaikai ki latwaumase lini, ku pangwakai ki nagane kwini ki latwaumase kiketekete; madha pasikaikai kaungu liniane si ku wapidruru sukubu liniane.

⁸ Kunumi pakela kaikameane thadaalraneana ku satukuciacingalre numi ki Tamatama ka Twaumase numi.

⁹ Kunumi pacungucungula papia iniane ku kidremedreme, lu arwa cucubungu numi, ku Tamatama wamalranga liniane kwini ki tadradau si tararakace ka minzuku si pakatwase, pakela kaikameane kadrwa ku nataingeanenga ku kuni ku maka kiaecebe numiane.

¹⁰ Kunumi sanaka aneanenga lri dulru numi kikaruburu si pamalebe ki takudrulu ku umawmase, asi lwiyane ku Tamatama ka Twaumase numi pangiamia ku tapuvaganeini pasikai numiane kikaruburu.

¹¹ Kunumi dradrela, tara kilibaka ki Tamatama ka Twaumase numi.

¹² Lwiyasi la kai numi tukucingalre iniane, la mwa numi maibu kwini ki yakai numiane ka maelane ka zuku, si mathaethareve liniane,

¹³ lu arwa cucubungu numi, ku Tamatama ka Twaumase numi kai lri pakatwasenga kikai ki laminzuku; lri ngibaalrelringa, kai lalasu lri mia ki salravathane, lrubange; mia ki salrumalrumadhane ka walrumai pakai ki drelreke numi, ka waceneke ikai ki maca numi, pakela kudra takamudane kakadrwa kanatangeanga ku asuru ikai kai ki mathariri ka kadaengane ka amani kudra baai numiane ki Tamatama ka Twaumase numi.

¹⁴ “Kaiasasane, kikai lri pacainga naku. Ku kidremedreme numi makitwa thingale numi, ku Tamatama ka Twaumase numi wamalranga baai numiane pakanaelre kudra puvagangaini ku akaesadhane baai numiane. Ku puvagangaini ngiamia patuelre, kadrwa ku navaevanga ku mwacilri kawlrau.

¹⁵ Ai, mararaamau kudra tapangimiane kudra tapuvaganeini numiane baai numiane ku akaesadhane, lri mialrini pakela ku makaelaela ku amatikurwane, pakela ku tamalrane amudu numiane patwalai kwini ki baai numiane ka mathariri ka kadaengane.

¹⁶ Lwiyasi la kai numi paluludu ku drekase numiane ku samakaketeketane ki Tamatama ka Twaumase numi, la katwase marasikai sukubu ki drumane ka twaumase, lri kaelaela pathavungu numiane, lalri padaalru numi twalai kwini ki baaini ka mathariri ka kadaengane kipakamudu.”