Yesua 22 - Ngudradreadrekadhane Ka Sisiu 魯凱語聖經

Ku Yesua wasateatedre pubalriu ki swa tali talrawane ka lazuku

¹ Ku Yesua wadawlu sarubu ki zuku ki Riwbingi, ki Gade, si swa tali talrawane ki Manase ka laumawmase,

² la kawriva liniane, “Kikai patwalrepengenga numi singibila ku tadrekasane ki Tamatama ki sasiakawluini ka Musi, la mialri numi pangimia kudra sanaka cunuli numiane.

³ Pakela kaikameane, kunumi kadrwa ku takidailane tacilriane numi ki retesane numi ka swa Iseraylri; kunumi kiapapawlringau numi paluludu ku drekase ki Tamatama ka Twaumase numi.

⁴ Kaiasasane, ku Tamatama ka Twaumase numi pangiamianga kudra tapuvaganeini, la pasutelrainga numiane ka swa Iseraylri. Lakamani kwidra, kunumi lri tara mubalriu numi, siwlri mwa ki talikaikai numi ka kadaengane, kikwini baainga numiane ki sasiakawlu ki Tamatama ka Musi kavai swakai tali talrawane kadravane Yuredange

⁵ Kunumi tara pudriadringadha paluludu kudra patarumara numiane ki Musi ku hulrice: Tara kilibaka ki Tamatama ka Twaumase numi, paluludu ku kidremedremeini, pasalaladha ku padradrekaseini, tukucingalre iniane, si pakaelre ku kidremedreme gathimi marasikaikai iniane.”

^6-8 Ku Yesua ala subulrubulru liniane, si sateatedre liniane pubalriu, si la iya kai, “Kunumi mailuka ku makaalra ku lalwange, kingi, gingi, adreme, si lalaimai, kateelrege mubalriu. La pakisupilri ki laretesane numi ku ravase numi ku lamanemanenga patwalai ki badha numi.” Kwini lalasu la katwasenga siwlri mwa ki cekele lini. Ku Musi wabaai vala kwini kadaengane ka tali talrawane Yuredange kadravane ki pararamau ki Manase; ku Yesua la vala baai ku kadaengane ka tali sapakalriwgu kadravane Yuredange ki thilane ki Manase si drumane ka zuku.

⁹ Ku zuku ki Riwbingi, Gade si tali talrawane ki Manase la mubalriu. Kwini lalasu la ikai kavai Selu ka Kanange mawvagavagainga ki drumane ka swa Iseraylri, si katwasenga papia kwini ki kadaengane lini Gileade, kudra nipasingikaiyane ki drekase ki Tamatama ki Musi mwa mucekele si malra taiyane ka kadaengane.

Yathili kadravane Yuredange ka tapatarumaramarane

¹⁰ Ku Riwbingi, Gade si swa tali talrawane ki Manase la kela Gililuthe, yakaiyana tali sapakalriwgu kadravane Yuredange, kwini lalasu la pikai babiabila ki kadravane cegecege ku taluvale ku maadrau si matiasalru ku tapatarumaramarane ki Twaumase.

¹¹ La ikai ku laumawmase ku peaelaela ki drumane ki zuku ki swa Iseraylri iya kai, “Drela! Ka Riwbingi, Gade si swa tali talrawane ki Manase piakai ka Gililuthe, ki babiabila ki kadravane Yuredange cegecege ka tapatarumaramarane!”

¹² Ku swa Iseraylri sa kilalra kikai vaga, la makanaelre irubu mwa ka Selu, lri mwa kikaruburu kwini ki swa tali talrawane ka zuku.

¹³ Ku swa Iseraylri siakawlu ki barakalai ka Ilriazare ka lalake ki Pinehase, mwa ka Gileade kikawriva ki zuku ki Riwbingi, Gade si swa tali talrawane ki Manase;

¹⁴ yakai ku tamangeale ku kiacapili ku twapalra ki Pinehase. Kwini lalasu ngiatalikaiyane ki swatelrainga ikai tali sapakalriwgu kadravane Yuredange ka vaeva ka zuku, ka amani ku nitutamatamane ki zuku.

¹⁵ Kwini lalasu la kela Gileade, kikawriva ki mapapangale ki zuku ki Riwbingi, Gade si tali talrawane ki Manase,

¹⁶ la ngitalikaiyane ki mapapangale ki Tamatama kawriva liniane, “Kunumi anu pia kikai ngialisiane pasalriu ki Twaumase ki swa Iseraylri? Anu ngipapasikai cegecege kikai tapatarumaramarane, si baebalre ki Tamatama! Kai numi twapapalranga iniane.

¹⁷ Kunumi ngwalringauana numi kudra tapasalrivaneta ikai Piure? Ikai kwini, ku Tamatama arakai ku swalrubu pathavungu ki kawkawluini. Kuta kikai ngwalalaiyanata kwini kipakwalrialri. Laibekace kaiyana makakelrete?

¹⁸ Kunumi kaiasasane lri pasiwlri numi iniane, si kai tupapalra iniane? Kaikameane lu baebalre numi ki Tamatama, lwiya lri kalisi ki swa Iseraylri makanaelre.

¹⁹ Lwiyasi kikai la kaikabula kwi kadaengane numi, si kai sudalepe sukubu ki Tamatama lu mia kwini ala bwala mwa kikai, si mwa ki tapikaiyane paisadra ki Alrivilrivi ka balrawbau ki Tamatama, la papia naiane kitubi ku swatiiki ku kadaengane; kai numi lri baebalre ki Tamatama, lai kai numi maka baebalre naiane. Madha pakitukudhakudha cegecege ku drumane ku tapatarumaramarane ki Tamatama ka Twaumaseta.

²⁰ Kunumi tara pulringava kudra tangilribatane ki agane ki Zera ka Akange. Kwini lasu kai paluludu ku nidrekasane, kai wamalra amudu kwini niravasane ku lawbubulu ki badha, ku mapapangale ki swa Iseraylri la ngwalai kikai makanaelre kipathavungu. Ku tapasalrivane ki Akange, la pacepenga ki druma twapalranga iniane kipapacai.”

²¹ Ku zuku ki Riwbingi, Gade si tali talrawane ki Manase, la tubalre kwini ki tinutamatamane ki lazuku ka yakaikai tali sapakalriwgu.

²² “Ku Twaumase sapupukwanenga ka amani ku Tamatama! Ku Twaumase sapupukwanenga! Amani ku Tamatama! Wathingale ku tapiane nai kikai; ani thingale la iya nai numiane. Lwiyasi ka wabalre nai ki Tamatama, si kai tukucingalre iniane, pwa papacai naiane.

²³ Lwiyasi ka kai nai ka paluludu ki Tamatama, si ngicacegecege kikai tapatarumaramarane, la pibelenge lama patarumara ku Lama ka lrisi, Taleke ka lrisi si Sulivatane ka lrisi, ani ka Tamatama ku pathavungu naiane!

²⁴ Ku tangimiamiane kaika miyaiya kikai. Kudra pangimia nai kikai yai, mwakuludru nai lukabibilrilinga ku lagagane numi lri iya kikai ki lagagane nai, ‘Kunumi manemane ku tamacacapilane numi ki Tamatama ki swa Iseraylri?

²⁵ Arakai ki kadravane Yuredange tusapagisane naiane si kunumi ka Riwbingi si Gade; kadrwa ku tamacacapilane numi ki Tamatama.’ Ikai kwini, ku lagagagane numi amani lwiyasi ruthuku si kai palraingi naiane ku asukubane ki Tamatama.

²⁶ Lakamani kudra cegecege nai kikai taluvale kai tapatarumaramarane, kai nai ka lri patarumara ku Lama ka lrisi si kudra la sapatarumarane ka waudriwdripi,

²⁷ amani ku apikaiyane kusu si kunaku, si la mwabaibalrithinga mitane, tusapatuthingalane, sapadrelane ala ka mialri nai pudriadringai ikai ki Alrivilrivi ka balrawbau ki Tamatama patarumara ku Lama ka lrisi, si drumane ka sapatarumarane si Sulivatane ka lrisi. Wasukubu nai iniane, amani lwiyasi ku lagagane numi la kawriva, kikai lagagane nai kadrwa ku tamacacapilane ki Tamatama iya liniane.

²⁸ Kikai ala amani ku takidremedremane nai. Alaiyasi lukabibilrilinga laka tengane ka ngiamia kikai, ku lagagane nai lri dulru kawriva, ‘Drela! Ku cucungulane nai wacegecege kikai tapatarumaramarane, maramaramau ki tapatarumaramarane ki Tamatama, kaika lri patarumara ku Lama ka lrisi si drumane ku sapatarumarane, kikai pasiakai ku sapatuthingalane ikai nakwane ikai muswane lakakathane.’

²⁹ Lutumane kai nai lri baebalre ki Tamatama, si tutapatarumaramarane la patarumara ku Lama ka lrisi, si Taleke ka lrisi, si drumane ka sapatarumarane, si la baebalre iniane. Kathane kikai kudra yakai ki lrawlrawdru ki Alrivilrivi ka balrawbau ki Tamatama ku tapatarumaramarane, kunai kai nai lri maka pianga ku drumane ku tapatarumaramarane.”

³⁰ Ku barakalai ka Pinehase si kwini redelaneini ku tamangeale ku nitutamatamane ki lazuku, kwini swatelrainga ikai sapakalriwgu kadravane Yuredange, la kilalranga kwini takawrivane ki zuku ki Riwbingi, Gade si tali talrawane ki Manase, la makitu kiraragainga turamuru.

³¹ Ku lalake ki barakalai ka Ilriazare ka Pinehase la kawriva liniane, “Kikai wathingalenga nai, ku Tamatama watapalra naiane; kunumi kai numi wabalre iniane. Lakamani kikai, kunumi palribulunga numi ki swa Iseraylri, lakai kipathavungunga ki Tamatama.”

³² Ala kwidra Pinehase si la redelaneini ku la tinutamatamane la katwasenga Gileade kwini ki Riwbingi si Gade. Si siwlri mu Kanange la pelaela ki mapapangale ki swa Iseraylri.

³³ Ku mapapangale ki swa Iseraylri la makitu kiraragai ngulwadhane turamuru, si drengedrengere ki Twaumase. Kwini lalasu la kai matikaikainga ku amwane kikaruburu ki swa Riwbingi si swa Gade, si kabebetethe ki kadaengane lini.

³⁴ Ku swa Riwbingi si swa Gade ku laumawmase la kawriva, “Kikai tapatarumaramarane sapatuthingalane mitane, ka sapelaelane ku Tamatama ka Twaumase.” Alakamani kikai, kwini lalasu pasia “Sapatuthingalane ka tapatarumaramarane” iya kikai ki tapatarumaramarane.