Yesua 21 - Ngudradreadrekadhane Ka Sisiu 魯凱語聖經

Lacekele ki swa Lrivi

¹ Ku latamatama ki tai Lrivi wamwa kidrele ki barakalai ka Ilriazare, lalake ki Nunge ka Yesua, si lazuku ki swa Iseraylri, si latamatama ki lazuku si ladadaanane,

² Ikai Selu ka Kanange kikawriva liniane, “Ku Tamatama napangwakai ki Musi pakela ku drekase, ani ikai ku lrika naiane ku lacekele, lani ikai ku tapagwagwane ki lalwange nai.”

³ Lakamani, ku swa Iseraylri pangiamia ku drekase ki Tamatama, patwalai kwini ki lakadaengane lini vala ku lacekele si ngwadadethe ka tapagwagwane baai ki swa Lrivi.

⁴ Ku maretetese ki wa Kuhathe ka zuku ki swa Lrivi laka aswalalanga kibaai ku lacekele. Ku barakalai ka tai Arungu kudra lamwabaibalrithi liniane la patwalai kwini ki kadaengane ki swa Yuda, swa Simiune si swa Biniyamingi kibaai ku tai 13 ku cekele.

⁵ Kwini drumane ku wacekecekele ki wa Kuhathe patwalai ki swa Iparaime, swa Dange, si zuku ki swa tali sapakalriwgu ka Manase kibaai ku taimangealane ku cekele.

⁶ Ku maretetese ki wa Geresunane patwalai ki swa Isakare, swa Asere, swa Napetali, si kwini swa tali talrawane ka Manase ka Basane kibaai ku tai 13 ku cekele.

⁷ Ku maretetese ki wa Mirariane patwalai ki zuku ki swa Riwbingi, swa Gade, si swa Zibulungu kibaai ku tai 12 ku cekele.

⁸ Ku swa Iseraylri pangiamia kudra natacunane ki Tamatama ki Musi ku drekase, tinukuzibiki si malra kikai lacekele si ngwadadethe ka tapagwagwane vala ki swa Lrivi.

⁹ Kikai tali lebe kai lacekele amani ku patwalai ki kadaengane ki swa Yuda si swa Simiune vala baai

¹⁰ ki lamwabaibalrithi ki Arungu. Kai Arungu swakai ki maretetese ki wa Kuhathe ka zuku ki swa Lrivi. Kai lalasu aswala kibaai ku cekele.

¹¹ Ku kibaai lini ku cekele amani kai Areba (kai Areba tama ki Anake), kikainga sia Hiburungu, yakai lregelrege Yuda; kwini lalasu mialri kibaai kwini ngiathalringulu ka tapagwagwane.

¹² Ai kudra swakaiyane ki cekele Hiburungu ku angangade si cacekele, nivalanenga ki lalake ki Yepuni ka Kalebe, tucungulu.

¹³ Ku lamwabaibalrithi ki barakalai ka Arungu, ku kibaai lini kaika kathane kai Hiburungu (Mialri ka Tamwane kipalakebe ka cekele), yakaiyana ku kibaai lini kikai lacekele: Libena,

¹⁴ Yatire, Isetimwa,

¹⁵ Hulunge, Dibere,

¹⁶ Aingi, Yuta si Bithe Simise, taibangatane ka twalai ki zuku ki Yuda si Simiune ka cekele, si kwini ngwadadethe ki lacekele ka tapagwagwane.

¹⁷ Kwini lalasu mialri patwalai ki kadaengane ki swa Biniyamingi kivala ku taisupatane, amani kai Gibiungu, Geba,

¹⁸ Anatute, si Alemunge, si kwini ngwadadethe ka tapagwagwane.

¹⁹ Ku lagagane ki barakalai ka Arungu ku kibaai lini ku cekele patuelrenga tai 13, si kwini ngwadadethe ki lacekele ka tapagwagwane.

²⁰ Ku drumane ka wacekecekele ki maretetese ki wa Kuhathe ka zuku ki swa Lrivi patwalai ki kadaengane ki swa Iparaime kibaai ku taipiane ku cekele.

²¹ Paelrelrenga taisupatane: Iparaime ka lrelrelrege ka Sekeme (taingeane ka Tamwane kipalakebe ka cekele), Gizere,

²² Kibezaime, si Bithe Hurunu, si ngwadadethe ka tapagwagwane.

²³ Kwini lalasu mialri patwalai ki kadaengane ki zuku ki Dange kibaai ku taisupatane ku cekele: Ileteke, Gibethune,

²⁴ Aiyalungu si Gathe Rimungu, si ngwadadethe ka tapagwagwane.

²⁵ Kwini lalasu patwalai ki kadaengane ki swa tali sapakalriwgu ka Manase kibaai ku taidrusane ku cekele: Tanake si Gathe Rimungu, si ngwadadethe ka tapagwagwane.

²⁶ Ku wa Kuhathe ka dadaanane kiabaai ku taimangealane ku cekele, si ngwadadethe ki lacekele ka tapagwagwane.

²⁷ Ku twalai ki swa Lrivi ka maretetese ka wa Geresunane patwalai ki swa tali talrawane ki Manase kibaai ku kadaengane: Basane kavai Gulane (Taingeane ka Tamwane kipalakebe ka cekele) si Bisetera, si ngwadadethe ka tapagwagwane.

²⁸ Kwini lalasu patwalai ki kadaengane ki swa Isakare kibaai ku kadaengane ku taisupatane: Kisiunge, Dabirathe,

²⁹ Yaremuthe, si Inganime, si ngwadadethe ka tapagwagwane.

³⁰ Kwini lalasu patwalai ki kadaengane ki swa Asere kibaai ku kadaengane si kibaai ku taisupatane ku cekele: Misale, Abedunge,

³¹ Hilekathe, si Rihube, si ngwadadethe ka tapagwagwane.

³² Kwini lalasu patwalai ki swa Napetali kibaai ku kadaengane ku taitulruane ku cekele: Kedese ka Galrilri (Taingeane ka Tamwane kipalakebe ka cekele), Hamuthe Dure, si Karetange, si ngwadadethe ka tapagwagwane.

³³ Ku wa Geresunane ka dadaanane paelrelrenga kiatudrulru ku tai 13 ku cekele, si ngwadadethe ka tapagwagwane.

³⁴ Ku drumane ka swa Lrivi, maretetese ki wa Mirariane, patwalai ki kadaengane ki swa Zibulungu kibaai ku taisupatane ku cekele: Yukeniame, Kareta,

³⁵ Demena, si Nahalale, si ngwadadethe ka tapagwagwane.

³⁶ Kwini lalasu patwalai ki kadaengane ki swa Riwbingi kibaai ku taisupatane ku cekele: Bizere, Yazare,

³⁷ Kidimuthe si Mipathe, si ngwadadethe ka tapagwagwane.

³⁸ Kwini lalasu patwalai ki kadaengane ki swa Gade kibaai ku taisupatane ku cekele: Ramuthe ka Gileade (Taingeane ka Tamwane kipalakebe ka cekele), Mahanaime,

³⁹ Hesebunge, si Yazere, si ngwadadethe ka tapagwagwane.

⁴⁰ Ku maretetese ki wa Mirariane paelrelrenga kiabaai ku tai 12 ku cekele.

^41-42 Ku swa Iseraylri patwalai ki lakadaengane lini vala baai ku tai 48 ku cekele, si la ngwadadethe ka tapagwagwane baai ki swa Lrivi.

Kadaenganenga ki swa Iseraylri

⁴³ Ku Tamatama pangiamia kudra tapuvaganengaini ki cucungulane ki swa Iseraylri, wamalranga patuelre kudra kadaengane si baai liniane. Kwini sa maka drikisinga kwini lakadaengane, la ikaikainga kikwini cekecekele.

⁴⁴ Ku Tamatama wabaai liniane ku akasulivalivatane palraelrenga, pangimia ku tapuvaganengaini ki lacucungulane lini. Kwini labadha lini kadrwa ku maka kiaecebe liniane, asi lwiyane ku Tamatama wamalra kwini ki labadha lini si baai pikai ki alrima ki swa Iseraylri.

⁴⁵ Ku Tamatama makecenge pangimia kudra sanaka tapuvaganengaini ki mapapangale ki swa Iseraylri.