Yesua 20 - Ngudradreadrekadhane Ka Sisiu 魯凱語聖經

Tamwane kipalakebe ka cekele

¹ Ku Tamatama la cunu ki Yesua

² kawriva ki swa Iseraylri, “Kunumi pangimia ku tapakawrivaneli ki Musi numiane ku drekaseli, si drele kelrete ku talupiale ku lrika Tamwane kipalakebe ka cekele.

³ Sanaka kaika waranau la pasamali papacai ki umawmase, lri maka dulru mwa kikwini, mubere kwini ki pasana bilribilri ku umawmase.

⁴ Kudra miyaiya kai ku umawmase lu maka mwa kwini ki taingeane ka cekele, lri mwa kwini ki lrawlrawdru ki cekele ki tasaibaibangane, si papia ki laciwru pelaela swacenge kwini tangimiamiane. Kwini laciwru lri pudaane iniane, si baai ku lrika taikaiyaneini, lu ngimia kikai, kwini lasu lri dulru asuru ikai kwini.

⁵ Lwiyasi kwini pasana bilribilri la kelanga kwini saladha, kwini picekelane kai lri maka malra kwini ki umawmase si baai liniane, lri kirimulringa palakebe iniane; asi lwiyane kwini lasu kai waranau ku tapapacadhane kwini ki umawmase, kaika makakabadha.

⁶ Kwini lasu lri dulru ikaikai kwini ki cekele, pakela kudra tatarumaraneini ku akisaibangane pikai ki mapapangale, si lu pacainga ku abebeelengenga ki barakalai lalri maka dulru siwlri mubalriu mwa ki natawberaneini ka cekele.”

⁷ Ala kirimu, ku swa Iseraylri la pikai tali sapakalriwgu kadravane Yuredange tali lregelrege ki swa Napetali Galrilri kelrete pikai ka Kedese, ikai tali lregelrege ki Iparaime la kelrete pikai kwini Sekeme. Ikai ka tali lregelrege ki Yuda la kelrete pikai Hiburungu.

⁸ Kwini lalasu la pikai tali talrawane kadravane Yuredange, si tali talrawane Yeriku ka abelenge ka lregelregane calragulragu, ikai talikai Riwbingi kelrete pikai ka Bizere. Ikai tali Gade ki cekele ka Gileade la kelrete pikai Ramuthe, ikai talikai Manase ki cekele ki Basane la kelrete pikai Gulane, tu Tamwane kipalakebe ka cekele.

⁹ Kikai Tamwane kipalakebe ka cekele nipasikaiyane ki swa Iseraylri si saliakaikai liniane ka singibadhane si cegecege. Sanaka aneanenga kudra kaika waranau papacai ki umawmase, lri dulru ikai kwini kipasilape ku akipalakebane, kibalai kwini ki pasana bilribilri ka umawmase; kwini pasana bilri ku takipatueraeradhane kailri maka papacai iniane, lu kaika nisaibangane pikai ki mapapangale.