Yesua 2 - Ngudradreadrekadhane Ka Sisiu 魯凱語聖經

Ku Yesua siakawlu ku walrilriu kavai Yeriku

¹ Ku lalake ki Nunge ka Yesua la sikawlu patwalai Sitime ku tadrusa ku taralrilriu, ani mwa kavai Kanange kibubuli lrilriu, pawkalrivili mwa Yeriku drele ku tangimiamiane. Kwini lalasu sa darurunga cekele, la sulai ikai kwini ki pairairange ka alisu ka Rahabe.

² Ku talialalai ki swa Yeriku sa kilalra kwini sakamaungu ala ka yakai ku twalai Iseraylri lrilriu ki cekele,

³ la sikawlu ku wamwa ki Rahabe kawriva, “Kikwini yakai ki daanesu kwi wakela lrilriu ku tangimiamiane ki kadaengane palraelre, kusu malra liniane si baai pwakai!”

^4-6 La kawriva ku Rahabe, “Unu yakai ku wakela sulai, ai kainaku ka wathingale luka twalai inu kainganai. Kwini lalasu sakaina lriwgu ku vai, sakaiyana elebe ku taelelebane ki cekele matwaseenga. Kainaku kiavaga liniane ka lri papia inu; lwiyasi la kirarimu numi mwa saladha, lri tara padaali numi.” (Ku tengatengane, ku Rahabe wamalraanga liniane iluku putalrugulrugane, balai liniane puadringi ki nirubwane ka lrekelreke.)

⁷ Kwidra sikawlu ki talialalai mwa silape sa katwase cekele Yeriku, waelebe ku saelelebane ki lrawlrawdru ki cekele. Kwini laumawmase la silape kwini ki walrilriu ka swa Iseraylri, wadaruru kwini tatalubalrebalreane kadravane Yuredange.

⁸ Kwini tadrusa ka taralrilriu sakaiyana apece, ku Rahabe la mwa talrugulrugane,

⁹ kawriva liniane, “Wathingalaku ku Tamatama ka wabaainga kikai kadaengane numiane, kikai swakai kaika laumawmase kadrwa ku kai mwakuludru numiane.

¹⁰ Kialalranga nai, sa katwase numi Izipiti, ku tapangimiane ki Tamatama pakameale cucubungu numiane ki laveke Suize, la mialri kilalra, ku tapangimiane numi amudu ki tadrusa ki yatali talrawane kadravane Yuredange ka talialalai ki swa Amuri ka Sihunge si Uge.

¹¹ Sa kilalra nai kikai la mukuludru nai turamuru, sana kidredreme nai numiane amalreemenga nai, asi lwiyane ku Tamatama ka Twaumase numi amani ku Twaumase ki yabelenge si yakawmasane.

¹² Kaiasasane, ala papia kwini ki Tamatama kiketekete. Kunumi anu kilibake ki wacekecekele nai, mia kai tasirapalananeli numiane. Badhaili ku sapatuthingalane, la nau kituvaga numiane.

¹³ Kiatubiaku pacepa ki marudrawdrangeli, betakaneli ka sawvalai si labaibai si niake ki wacekecekele lini, ku kaika akipapacadhane nai.”

¹⁴ Kwini tadrusa la tubalre, “Lwiyasi tali dulrusu kai paucale kikai tapangimiane nai ki naneeanenga, lri tubalre nai muswane. Lu baainga ku Tamatama naiane kikai kadaengane, lri pudriadriingai nai marasikai numiane. Lwiyasi la kai nai pangimia ku puvaga nai, anika Twaumasenga ku wamalra kai niake nai.”

¹⁵ Ku daane ki Rahabe pia belenge ki alradre ki cekele, lakamani ku arakaini ku calrisi malra kwini ki tadrusa pangukai ki lribange surusuru pulebe.

¹⁶ Kwini alisu la kawriva, “Lu mubera papia tali lregelrege; amani lwiyasi kwini wasaladhaladha numiane lu kidringai numiane. Ikaiya kwini kibalai makatulrulu ku vai, lu siwlri mucekele kwini lalasu ala katwasa ku kadalranane numi.”

¹⁷ Kwini lalasu la kawriva ki Rahabe, “Lri tara pangimiya nai kikai kiketekete nai muswane,

¹⁸ ai kusu tara pangimia ku taiyane nai muswane ku vaga. Lu mucekelenga nai ki kadaengane numi, malranga kikai sarakaiyanesu kikai calrisi si pakerenge pikai ki tapangukaiyanesu pawbere naiane kwini lribange. La malra ki marudrawdrangesu, labetakanesu si wacekecekele ki tamasu makanaelre sarubu pikai numianane.

¹⁹ Lwiyasi ikai ku umawmase ku mwalatadre ki daane, lu kipapacai amanini ka pasalriu, kai nai ka amani ka pasalriu; lwiyasi ikai ku yadaane numianane la kipapacai, kwidra pasalrivane lri papia naiane.

²⁰ Lu pawcalesu kikai balabalai nai, kai nai lri pasusu ku kiketekete nai muswane.”

²¹ Ku Rahabe la palraingi liniane, ala pakatwase liniane. Kwini lalasu sa katwasenga liniane, ku Rahabe la pakerengenga ku duduli ka calrisi pikai ki lribange.

²² Kwini tadrusa ka walrilriu la mwa lregelrege kibalai. Kwidra sikawlu ki talialalai la ikai latadre ki cekele ubulane salraelrelre silasilape liniane, la makatulrulu silape la kai maka kidringai, la siwlri mwa Yeriku.

²³ Kwini tadrusa ka walrilriu la twalai lregelrege mutaluvaivai, la talubalre ki drakerale si mwa kidrele ki Yesua. Kwini lamalala la pelaela iniane kwini tangilribatane lini,

²⁴ la iya kai, “Malritheethe nai kasalru ku Tamatama ka wabaainga mitane patuelre kavai kadaengane. Ka swakai kavai ka laumawmase makitua mwakuludrunga mitane.”