Yesua 19 - Ngudradreadrekadhane Ka Sisiu 魯凱語聖經

Kadaengane ka kibaai ki lazuku ki Simiune

¹ Kudra mwasakadrusa ku sakuzibikane wabaai ki lazuku si wacekecekele ki Simiune. Kwini lalasu ku kadaengane lini wamwa ki kadaengane ki zuku ki Yuda,

² amani kikai Bereseba, Seba, Mulada,

³ Hazaresuale, Bala, Izeme,

⁴ Iletulade, Bethule, Hurema,

⁵ Zikelage, Bithe Marekabuthe, Hazaresusa,

⁶ Bithe Lebuathe, si Saruhenge, paelreelrenga tai 13 ka cekele, si kwini ngwadadethe ka cacekele.

⁷ La ikaiyana ku drumane ka Aingi, Rimungu, Ithere si Asane ka supate ka cekele, si la ngwadadethe ka cacekele.

⁸ Kikai ngiathalringulu ki cekele ka lacacekele, padaruru ka tali lrawdru ki Baala Bire (sia Rama), makitwa kipaelre. Kikai lakadaengane amani ku kibaai lini ki lazuku si wacekecekele ki Simiune ka cungulu lini.

⁹ Asi lwiyane kikai swa Yuda ku kibaai lini ku kadaengane walribate turamuru ki urikai lini, kikai kadaengane lini kiavala si baai ki lazuku ki Simiune.

Kadaengane ka kibaai ki lazuku ki Zibulungu

¹⁰ Kudra mwasakatulru ku nikuzibikane wabaai ki lazuku ki Zibulungu. Ku kadaengane lini wadaruru Saride.

¹¹ Ku tali sapakalriwgu ku pagisane ki kadaengane twalai Saride papia tali sapakalriwgu kela Marile, kicungulu ki kadravane ki tali talrawane ki Dabesethe si Yukeniame.

¹² Ku pagisane ki tali talrawane twalai Saride papia tali talrawane kela pagiagisane ki Kiseluthe Tabure, ala kela Dabirathe, ala papia dradha kela Yapia,

¹³ ala twalai kwini papia tali talrawane Gathe Hepere si Ithekazingi, ala ngibangulu papia kwini sapapia Nia ka Rimungu.

¹⁴ Ku pagisane ki tali dradhane twalai kwini si ngibangulu papia Hanathunge, kadringelrese kela vaalru Ipetahile.

¹⁵ Kwini kadaengane lini paelre kai Katathe, Nahalale, Simerunge, Idala si Bithelrihime, paelreelrenga tai 12 ka cekele, si la ngwadadethe ka cacekele.

¹⁶ Kikai lacekele si cacekele patuelre amani ku kitucungulu ki lazuku si wacekecekele ki Zibulungu.

Kadaengane ka kibaai ki lazuku ki Isakare

¹⁷ Ku mwasakasupate ku nikuzibikane amani ku kadaengane ku abaadhane ki lazuku si lawacekecekele ki Isakare.

¹⁸ Kwini la kadaengane lini amani kai Yezerile, Kesuluthe, Suneme,

¹⁹ Haparaime, Siunge, Anaharate,

²⁰ Rabithe, Kisiunge, Ibeze,

²¹ Remethe, Inganime, Inhada, si Bithepaze.

²² Ku pagisane wamwa si kela Tabure, Sahazuma si Bithe Simise, kadringelrese kela ka kadravane Yuredange, paelrelrenga tai 16 ka cekele, si kwini ngwadadethe ka cacekele.

²³ Kikai lacekele si cacekele amani ku kitucungulu ki lazuku si wacekecekele ki Isakare.

Kadaengane ka kibaai ki lazuku ki Asere

²⁴ Ku mwasakalrima ku nikuzibikane wabaai ki lazuku si wacekecekele ki Asere tucungulu lini.

²⁵ Kwini kadaengane lini amani kikai Hilekathe, Hali, Bitene, Akesape,

²⁶ Alameleke, Amade si Misale. Ku pagisane tali sapakalriwgu pakela kavai Karemele si Sihure Libenathe.

²⁷ Ku pagisane tali talrawane wakela Bithedagunge, kiraisi ka Zibulungu si vaalru Ipetahile, kela tali dradha ka Bithemeke si Niele, ala papia tali dradha kela Kabule,

²⁸ Iberunge, Rihube, Hamungu si Kana, kadringelrese kela Sidune ka maadrau ka cekele.

²⁹ Ala twalai kikai ngibangulu papia Rama, kela kwini ki nikepalane ka cekele Tayre, ala ngibangulu papia Husa, kadringelrese kela laveke Miditerania. Ku kadaengane lini paelre Mahalabe, Akezibe,

³⁰ Umema, Apeke si Rihube, paelreelrenga tai 22 ka cekele, si ngwadadethe ka cacekele.

³¹ Kikai lacekele si cacekele amani ku kitucungulu ki lazuku si wacekecekele ki zuku ki Asere.

Kadaengane ka kibaai ki lazuku ki Napetali

³² Ku mwasakaeneme ku nikuzibikane amani ku abaadhane ku kadaengane ki lazuku si wacekecekele ki Napetali.

³³ Ku pagisane ki kadaengane lini twalai Helepe kela ki tharialupu ka angatu ka Zananime, ala kela ka Adami Nekebe si Yabinile, daruru Lakume, kadringelrese kela ka kadravane Yuredange.

³⁴ Ku pagisane twalai kikai la ngibangulu papia tali sapakalriwgu, kela Azenute Tabure, ala kela Hukuke, ku tali lrawdru wakela Zibulungu, ku sapakalriwgu wakela Asere, ku tali talrawane wakela kadravane Yuredange

³⁵ Ku nikepalane ku cekele yakai ku Zidime, Zere, Hamathe, Rakathe, Kinerethe,

³⁶ Adama, Rama, Hazure,

³⁷ Kedese, Ideri, Inhazure,

³⁸ Yeriunge, Migedalele, Hurime, Bithe Anathe si Bithe Simise, paelreelrenga tai 19 ka cekele, si kwini ngwadadethe ka cacekele.

³⁹ Kikai lacekele si lacacekele amani ku kitucungulu lini ki lazuku si wacekecekele ki Napetali.

Kadaengane ka kibaai ki lazuku ki Dange.

⁴⁰ Ku mwasakapitu ku nikuzibikane amani ku kadaengane ka abaadhanenga ki lazuku si wacekecekele ki Dange.

⁴¹ Kwini kadaengane ki lalasu amani kikai Zura, Isetawle, Iresemese,

⁴² Salebime, Aiyalungu, Itela,

⁴³ Ilune, Timena, Ikerungu,

⁴⁴ Ileteke, Gibethune, Baala,

⁴⁵ Yehude, Bineberake, Gathe Rimungu,

⁴⁶ Miyarekunge, Rakunge si kwini ngiathalringulu Yupa ka lakadaengane.

⁴⁷ Sa sakawlrau ku kadaengane kwini swa Dange, kwini lalasu la katwase mucekele ki swa Laisi, sa maka drikisinga, la malra papacai kwini yakai kwini ka laumawmase, si ravase ki talikai kwini ku kadaengane. Kwini lalasu la ikaikainga kwini, la arakai kwini nagane ki cucungulane lini ka Dange, si malra tupela pasi Dange kwini ki cekele.

⁴⁸ Kikai lacekele si lacacekele amani ku kitucungulu ki lazuku si wacekecekele ki Dange.

Bibiilrilinga ka nipavavalane ka kadaengane.

⁴⁹ Ku swa Iseraylri samaka pavavalanga ku lakadaengane kwidra, kwini lalasu la baai ki Yesua ka lalake ki Nunge ku taingeane ku kadaengane, kamani ku cunguluini.

⁵⁰ Kwini lalasu paluludu ku tadrekasane ki Tamatama, sanaka kitubini si baai iniane, amani kikai Timenathe Sera ka swakai lregelrege Iparaime. Ku Yesua la pudriadringai kwini alradre ki cekele, si ikainga kwini.

⁵¹ Ku barakalai ka Ilriazare, Yesua ka lalake ki Nunge, si lazuku ki Iseraylri, si lakiacapili ki lawacekecekele la ikai Selu, ikai ki lrawlrawdru ki Alrivilrivi ka balrawbau ki Tamatama la kuzibiki, kitubi ki Tamatama, si apavavala ku kadaengane. Ala pangimianga kikai, kwini lalasu la tulrepengenga apavalavala ku kadaengane.