Yesua 18 - Ngudradreadrekadhane Ka Sisiu 魯凱語聖經

Tapavalavalane kudra tedranenga ku kadaengane

¹ Ku swa Iseraylri samaka malranga si rathudu kikai lakadaengane, ku mapapangale makanaelre ki swa Iseraylri yarubu ikai Selu, pacegecege ku Alrivilrivi ka balrawbau kudra tamakakaiyane mulebe ki Tamatama.

² Taipitwane ku zuku ki swa Iseraylri ku kaiyana kiabaai ku naika kadaengane lini.

³ Lakamani ku Yesua kawriva ki swa Iseraylri, “Lri tarathainuana numi mukalava ala lri mudaane numi drikisi kwini puvaganga ki Tamatama ka Twaumase ki cucungulane numi ka kadaengane?

⁴ Kaiasasane, pilria ku tatulru patwalai numiane lani kela nakwane; lri palrilriuaku liniane salraelre kavai ki kadaengane. Kwini lalasu ku api malra lini ku kadaengane la pacase ku tangimiane ku kadaengane, la siwlri kela kikawriva nakwane.

⁵ Kikai kadaengane lri pau taipitu; kai Yuda lrika sakamia malra kwini tali lrawdru ka kadaengane, ku Yusepe lalri pikaai kwini tali dradha ku kadaengane.

⁶ Kunumi la baadhaili kwini pacase ku nipau pituane; lri pakuzibikaku numiane, si kivaga ki Tamatama ka Twaumaseta.

⁷ Ai kai swa Lrivi kai lri kibaai ku kadaengane, asi lwiyane ku barakalai ki Tamatama, lri marasikai iniane, kikwini amani ku cungulu lini. Ala kikai zuku ki Gade, zuku ki Riwbingi si zuku ki talrawane ka Manase, kai lalasu wamalranga ka tali talrawane kadravane Yuredange ka kadaengane; kikwini amani ku sasiakawlu ki Tamatama ka Musi ka wadrulru liniane.”

⁸ Kikai laumawmase la katwase lrilriu ku tangimiamiane ki kadaengane, si pacase ku tangukakaiyane. Ku Yesua la cunu liniane, “Kunumi salraelrea kwini ki kadaengane, pudriadringadha pacase ku tangukakaiyane, la iluku kela padrele nakwane. Lri ikaiyaku ka Selu pakuzibiki numiane, si kivaga ki Tamatama.”

⁹ Kwini lalasu la salraelre kwini ki kadaengane dadavace, la malra paupituane kwini kadaengane, si patilibi kwini lanagane ki cacekele, ala katwase siwlri mwa ka Selu drele ki Yesua.

¹⁰ Ku Yesua pakuzibiki liniane, si kivaga ki Tamatama, la malra kwini naika akibaadhane lini kwini tedrane ku kadaengane pavalavala liniane.

Kibaai ki swa Biniyamingi ka kadaengane

¹¹ Kwini kibaai ki lazuku ki Biniyamingi amani ku nipaswalane apavalavala. Ku kadaengane lini yakai kabicelrakane ki lazuku ki Yuda si Yusepe.

¹² Ku tali dradha ku pagiagisane twalai kadravane Yuredange kela tali dradha ki lregelrege Yeriku kwini ki sisiane, papia tali sapakalriwgu ngukakai ki lregelrege, lecege kela ka Bithavenge calragulragu,

¹³ ala twalai kwini papia ka tali lrawdru ka sisiane Luze (Luze sia Bithele), papia tali lrawdru Atarute Adare, kela kwini tali lebeanane tali lrawdru ka lregelrege Bithe Hurunu.

¹⁴ Ku pagisane ki kadaengane twalai kikai ngibangulu papia ki talidrumane, twalai sapakalriwgu ki lregelrege papia tali lrawdru, kwini ki cekele ki zuku ki Yuda ka Kiriathe Baale (sia Kiriathe Yerime). Kikai yai pagisane ki sapakalriwgu.

¹⁵ Ku pagisane tali lrawdru twalai babiabila ki Kiriathe Yerime pathagili, kela ka tuturu Nipetua,

¹⁶ ala mulrawdru si mwa kudra ki lregelrege ka paswalebe madu drele valrwalru Hinume, ka amani kwini talikaiyane ki tali dradha Ripaime. Ku pagisane ki kadaengane twalai kikai pathagili si papia tali lrawdru ngukakai vaalru Hinume, tali lrawdru lregelrege Yebuse, kela ka Inrugele,

¹⁷ ala ngibangulu papia tali dradha, kela Insemesi, ala mwa ka balrealreanane ka Gililuthe ka salralriwgu Adumime, ala kela ki lrenege ka Buhange (kwini Buhange lalake ki Riwbingi),

¹⁸ la ngukakai ki lregelrege ki tali dradha, paswalebe vaalru ka kadravane Yuredange, mulebe kela ka vaalru,

¹⁹ la ngukakai tali dradha ka Bithe Hugela, kela kavai tamakakaiyane ki vaalru kadravane Yuredange ki Titimwane ka laveke. Kikai amani ku pagisane ki tali lrawdru.

²⁰ Kikai kadravane Yuredange amani ku pagisane ki tali talrawane. Kikai ala amani ku kadaengane ki zuku ki lawacekecekele ki Biniyamingi ka kitucungulu lini.

²¹ Kudra lacekele ki lazuku cacekele ki Biniyamingi amani kikai: Yeriku, Bithe Hugela, Imeke Kezize,

²² Bithe Araba, Zemaraime, Bithele,

²³ Avime, Para, Upera,

²⁴ Keparamuni, Upeni, si Geba, paelreelrenga tai 12 ka cekele, si la ngwadadethe kwini ki cekele.

²⁵ Yakaiyana Gibiungu, Rama, Biruthe,

²⁶ Mizepa, Kepira, Muza,

²⁷ Rekeme, Irepele, Tarela,

²⁸ Zela, Haelepe, Yebuse (Yerusalrime), Gibia, si Kiriathe Yerime, paelreelrenga tai 14 ka cekele, si la ngwadadethe kwini ki lacekele. Kikai ala amani kudra kitucungulunga ki lazuku si wacekecekele ki Biniyamingi.