Yesua 16 - Ngudradreadrekadhane Ka Sisiu 魯凱語聖經

Kitudrulru ki Iparaime si ki Manase ka zuku ka kadaengane

¹ Ku kidrulru ki lamwabaibalrithi ki Yusepe, ku pagiagisane ki tali lrawdru twalai kwini ki talikai ki kadravane Yuredange ki swa Yeriku, amani kwini twalai ki talrawane ki tuturu Yeriku, mwadringi calragulragu; ala twalai Yeriku papia tali dradha ki lregelrege Bithele,

² ala twalai Bithele mwa ka Luze, la daruru Ataruthe Adare ka taikaiyane ki swa Areki,

³ papia tali sapakalriwgu wakela ka taikaiyane ki swa Yapelite, la mulrawdru pakela kavai Bithe Hurunu, ala twalai kavai Gizere, kela ka laveke Miditerania.

⁴ Ku lamwabaibalrithi ki Yusepe ka Iparaime si tali sapakalriwgu ka Manase kiabaai kikai kadaengane, tucungulu lini.

Iparaime ka zuku

⁵ Ku la pagisane ki kadaengane ki tai Iparaime amani kikai: Twalai Atarute Adare papia ka tali talrawane kela ki sadradradha ka Bithe Hurunu,

⁶ ala mwa ki laveke Miditerania; ku tali dradha amani Mikemethathe; ku pagisane ki tali talrawane twalai Tanathe Selu, padaruru ka tali talrawane ka Yanuha,

⁷ ala cubungu tali lrawdru, twalai Yanuha kela Ataruthe si Nara, ala ngukakai Yeriku, kela ka kadravane Yuredange.

⁸ Ku pagisane ki tali sapakalriwgu twalai Tapua ngukakai kadravane Kana, kela ka laveke Miditerania. Kikai amani ku kibaai lini ki lazuku ki Iparaime, tucungulu ka kadaengane lini.

⁹ Ku drumane, ikai kwini ki lacekele ki Manase, paelre kwini ngwadadethe ka cekele la mialri baai ki swa Iparaime.

¹⁰ Ku swa Iparaime kai wamalra pakatwase kwini yakai Gizere, lakamani kwini ki swa Kanange ikai ki taikaiyane ki swa Iparaime, pakela kaikameane; ai kiavutha kipaaduri ki swa Iparaime.