Yesua 15 - Ngudradreadrekadhane Ka Sisiu 魯凱語聖經

Kitudrulru ki Yuda ka zuku ka kadaengane

¹ Kudra kitudrulru lini ka zuku ki Yuda miyaiya kikai: Ku kadaengane lini papia tali lrawdru kela kavai pagisane ki swa Idume, daruru ka salrawlrawdrunga ka calragulragu Zingi.

² Kikai tali lrawdru ka pagisane twalai kwini tali lrawdru ka Titimwane ka laveke,

³ la papia tali lrawdru twalai kwini tangutikiane ka Akerabime kela ka Zingi, ala twalai tali lrawdru ka Kadise Barania papia tali dradha, ngukakai Hezerunge, kadringelrese kela ka Adare, ala ngibangulu papia Kareka,

⁴ kadringelrese daruru ka Azemunge, ala siluludu kwini babiabila ki kadravane ka Izipiti kela ki laveke Miditerania. Kikai amani ku pagisane ki tali lrawdru ki kadaengane ki swa Yuda.

⁵ Ku pagiagisane tali talrawane amani kai Titimwane ka laveke, papwadradradha si siluludu kadravane Yuredange mwa ki tamakakaiyane ki Titimwane ka laveke. Ku talikai tali dradha ku kadaengane twalai kwini ki tamwaludrane mwadringi pathagili,

⁶ si pacungulu kela ka Bithe Hugela, papulelebe drele valrwalru ka kadravane Yuredange kwini ki tali dradha ka lregelrege, papia tali dradha kela ka Buhange (kikai Buhange lalake ki Riwbingi),

⁷ ala twalai “Amatikurwane ka valrwalru” kela ka Dibere, papia tali dradha kela ka Gilegale (kwini Gilegale wacubungu kwini tali lrawdru ka valrwalru ka tangutikiane ka Adumime). Ku pagisane ala segeana kela ka Insemesi, papia ka Inrugele,

⁸ taravalrwalru ka Hinume kela tali lrawdru ka cekele Yebuse (amani Yerusalrime), ala twalai kikai papudradradha mwa valrwalru Hinume ki tali sapakalriwgu ka karingavane ki lregelrege, amani kwini tali dradha ki valrwalru Ripaime,

⁹ ala pakeelana ka tuturu ka Nipetua, kela kwini ngwadadeethe ka cekele ka lregelrege ka Iperungu, ala katwase ngibangulu papia Baala (mialri ka sia Kiriathe Yerime),

¹⁰ ala katwase lragau tali sapakalriwgu ka Baala kela tali lregelrege ka Idume, mararaisi ka lregelrege tali dradha ka Ipirume (mialri ka sia lregelrege Kisalunge), mulrawdru papia Bithe Simise, lribate ka Timena,

¹¹ ala katwase papia lregelrege tali dradha ka Ikerungu, ala ngibangulu papia Sikerunge, ngukakai lregelrege Baala kela Yabinile, daruru ka laveke Miditerania.

¹² Kikai laveke Miditerania amani ku pagisane tali sapakalriwgu ki lazuku ki Yuda. Kikai lawacekecekele ki tai Yuda amani ku yakai talikai kai ki kadaengane.

Ku Kalebe pamaki ki Hiburungu si Dibere

¹³ Ku Yesua paluludu ku drekase ki Tamatama la baai ku taipiane ku kadaengane ki Yuda si vala ki swa Yuda ka lalake ki Yepuni ka Kalebe. Ku Yuda wamalra ka Hiburungu, amani kwini cekele ki Areba ka tama ki Anake.

¹⁴ Kwini lasu wamalra ki mwabaibalrithi ki tatulru ka lalalake ki Anake pakatwase pulatadre ki cekele; kikai laumawmase amani kwidra zuku ki Sesai, zuku ki Ahimane, si zuku ki Talamai.

¹⁵ Ku Kalebe la twalai kwini si kikaruburu ki swakai Dibere ka umawmase; kikai cekele kunadruma sia Kirathe Sepere.

¹⁶ Ku Kalebe kawariva, “Ala ku aneanenga ku pamalebe si maka malra ka Kirathe Sepere, lri pamwaku ki lalakeli ka Akesa iniane karudrange.”

¹⁷ Kudra Uthenile ka lalake ki agini ka Kenaze la maka malra kwini ki cekele; ku Kalebe la malra ki lalakeini ka Akesa si baai ki Uthinile pasi taelrelre.

¹⁸ Saka takarudrangane, ku Uthinile la kakadra ki Akesa ku amwane baadhaili iya ku taluvale ku kadaengane. Sa mulebe ki ruba ku Akesa, ku Kalebe la kivaga iniane manemane ku murikaisu iya iniane,

¹⁹ kwini alisu la iya kai, “Baadhaili ku taingeane ku saceacebe; mwarikaiyaku ku aciacilai, asi lwiyane kwini baaisu nakwane kwini kadaengane kameamealane.” Ku Kalebe la malra kwini acilai ka berai tali dradha si tali lrawdru patuelre baai iniane.

Lacekele ki zuku ki Yuda

²⁰ Kikai lebe amani ku kadaengane ka kitucungulu ki lazuku ki lawacekecekele ki Yuda.

²¹ Kwini salrawlrawdrunga adeethe tali talrawane ki swa Idume ku lacekele amani kikai: Kabezele, Idere, Yagure,

²² Kina, Dimuna, Adada,

²³ Kedese, Hazure, Ithenange,

²⁴ Zipe, Teleme, Bialuthe,

²⁵ Hazure Hadata, Kiriuthe Hezerunge (ku sia Hazure),

²⁶ Amame, Sema, Mulada,

²⁷ Hazare Gada, Hesemunge, Bithepelete,

²⁸ Hazaresuale, Bereseba, Biziuthia,

²⁹ Baala, Ime, Izeme,

³⁰ Iletulade, Kisile, Hurema,

³¹ Zikelage, Mademana, Sanesana,

³² Lebuathe, Silehime, Aingi, si Rimungu, paelreelrenga tai 29 ka cekele, si ngwadadethe ka cacekele.

³³ Ikai kwini ki tali talriwgane ka lrelrelrege ku lacekele amani kikai: Isetawle, Zura, Asena,

³⁴ Zanua, Inganime, Tapua, Iname;

³⁵ Yaremuthe, Adulame, Suku, Azeka,

³⁶ Saraime, Aditaime, Gedera, si Gederuthaime; patuelrenga tai 14 ka cekele, si kwini ngwadadethe ka cacekele.

³⁷ La mia kwini Zenange, Hadasa, Migedalegade,

³⁸ Diliane, Mizepa, Yakethele,

³⁹ Lakise, Buzekathe, Igelunge,

⁴⁰ Kabunge, Lahemase, Kitilisi,

⁴¹ Gederuthe, Bithedagunge, Nama, si Makida, Patuelrenga tai 16 ka cekele, si ngwadadethe ka cacekele.

⁴² La mialri kwini Libena, Ithere, Asane,

⁴³ Ipeta, Asena, Nizibe,

⁴⁴ Kila, Akezibe, si Maresa, Bithedagunge, Nama, si Makida, taibangate ka cekele si ngwadadethe ka cacekele.

⁴⁵ La mialri kwini Ikerungu si ngwadadeethe ka lacekele,

⁴⁶ si kwini twalai Ikerungu kela ka laveke Miditerania, si kwini ngwadadethe ki Asedude ka cacekele.

⁴⁷ La mialri kwini Asedude si Gaza, paelre kwini ngwadadethe ka cacekele, kela talikai ki kadravane ka Izipiti si ngwababiabila ki Miditerania.

⁴⁸ Ku swakai lregelrege: Samire, Yatire, Suku,

⁴⁹ Dana, Kirathe Sepere (ku sia Dibere),

⁵⁰ Anabe, Isetimwa, Anime,

⁵¹ Gusenge, Hulunge, si Gilu, paelrelrenga tai 11 ka cekele, si ngwadadethe ka cacekele.

⁵² La mialri ku Arabe, Duma, Isange,

⁵³ Yanime, Bithe Tapua, Apeka,

⁵⁴ Humeta, Hiburungu, si Ziure, paelreelrenga taibangate ka cekele, si ngwadadethe ka cacekele.

⁵⁵ La mialri ku Maune, Karemile, Zipe, Yuta,

⁵⁶ Yezerele, Yukedime, Zanua,

⁵⁷ Kaingi, Gibia, si Timena, taimangeale ka cekele, si ngwadadethe ka cacekele.

⁵⁸ La mialri ku Halehule, Bithezure, Gedure,

⁵⁹ Marathe, Bithe Anuthe, si Iletekune, taieneme ka cekele, si ngwadadethe ka cacekele.

⁶⁰ La mialri ku Kiriathe Baale (ku sia Kiriathe Yerime) si Raba, taidrusa ka cekele, si ngwadadethe ka cacekele.

⁶¹ Ikai calragulragu yakai ku Bithe Araba, Midingi, Sekaka,

⁶² Nibesange, Timu ka cekele, si Ingidi, taieneme ka cekele, si ngwadadethe ka cacekele.

⁶³ Ku swa Yuda kai maka pakatwase kwini ki yakai Yerusalrime ka swa Yebuse ka laumawmase, lakamani ku swa Yebuse thadalraneana maelre ki swa Yuda ikai kwini, pakelanga kaikameane.