Yesua 14 - Ngudradreadrekadhane Ka Sisiu 魯凱語聖經

Tapavalavalane ku kadaengane talikai kadravane Yuredange sapakalriwgu

¹ Kikai lebe amani ku tangimiamiane ku tapavalavalane ku kadaengane ka Kanange si pasi cungulu ki swa Iseraylri tali kadravane Yuredange sapakalriwgu. Ku barakalai ka Ilriazare si lalake ki Nunge ka Yesua, si lakiacapili ki lazuku ki swa Iseraylri wamalra kikai kadaengane si pavavala ki mapapangale.

² Kwini lalasu paluludu ku drekase ki Tamatama ki Musi, pangwakuzibiki ku apangimiane pavavala kwini kadaengane tali kadravane Yuredange sapakalriwgu baai ki taibangate ka zuku si pararamau ka zuku ki Manase.

^3-4 Ku Musi wabaainga kwini tali talrawane kadravane Yuredange ku kadaengane ki drumane ka taidrusa ka zuku si pararamau ka zuku ki Manase. (Ku cucungulane ki Yusepe mawa drwadrusa ka zuku amani kai Manase si Iparaime.) Ku swa Lrivi kai kiabaai ku navaevanga ku kadaengane, ai yakai ku taikaiyane lini ku cekele, ku umawma ku taikaiyane lapu ku lwange si kiu.

⁵ Ku swa Iseraylri paluludu ku drekase ki Tamatama ki Musi apavavala ku kadaengane.

Ku Kalebe kiabaai kavai Hiburungu

⁶ Yakai saka minakavalane, la ikai ku lazuku ka swa Yuda wamwa ka Gilegale kikawriva ki Yesua. Ku tangea sia Kalebe, ka lalake ki Yepuni ka swa Kenizi. Kwini lasu la kawriva ki Yesua, “Sa ikai kavai Kadise Barania, kudra matikai ki Tamatama papia ki umawmase ki Twaumase ka Musi patharukai nakwane si kusu, wathingalesu.

⁷ Sa tara masupatelenga ku cailili, ku sasiakawlu ki Tamatama ka Musi siakawlu nakwane twalai Kadise Barania mwa lrilriu kikai kadaengane; la pudriadriingadhaku pelaela iniane ku tadrelaneli ku la tangimiyaiyane.

⁸ Ai, kudra redelaneli ku laumawmase ku tapelaelane lini kiarimu mukuludru ku mapapangale, ai kunaku pakanaelreaku ku kidremedremeli pasalaladha ki Tamatama ka Twaumaseli.

⁹ Ikai kwini ki vai, ku Musi napwakawnunga nakwane, lubibilrili kunaku si lamwabaibalrithi nakwane lri tara kibaai kikai kadaengane, kwini tapudrapalaneli ka kadaengane, tucungulunga nai, asi lwiyane kwini pakanaelreaku kai kidremedremeli pasalaladha ki Tamatama ka Twaumaseli.

¹⁰ Kaiasasane ani drela, twalai kudra takawrivane ki Tamatama ki Musi kudra lavaga pakelanga kikai, ngialribatenga ku nitara 45 ka caili. Sakamani kwidra ku swa Iseraylri acaicaicaliana ikai calragulragu ubulane. Ku Tamatama pangiamia kudra tapuvaganeini si palakebe nakwane pakela kai, la karakaraakaceanaku, drela! Tara 85 kai cailili.

¹¹ Kaikameane magarangeana naku, ka ngimiyaiyana sa kisikawlaku ki Musi katwase, magarangeana naku, kalri dulrwana kikaruburu kipuawngane ku laawngane.

¹² Kaiasasane, ala baadhaili kwini lregelrege kudra puvaganga nakwane ki Tamatama, ka amani kwini pelaela nai kwini la redelaneli si palrainginga ki Tamatama. Kikwidra mialri ka kialalrasu kikwini kadaengane yakai kudra swa Anake ka tadradradrau ka umawmase, ikai kwini laabelenge ku laalradre ka cekele. Alau lri tapalra nakwane ku Tamatama, lri dulrwaku pakatwase liniane, mia ku tapalrainganenga ki Tamatama.”

¹³ Ku Yesua la subulrubulru ki Kalebe ka lalake ki Yepuni, la baai iniane kwini Hiburungu, tucunguluini.

¹⁴ Kai Hiburungu pakela kaikameane sakamiya ka swatalikaiyane ki Kalebe ka lalake ki Yepuni ka swa Kenizi, asi lwiyane kwini lasu pakaelre ku kidremedremeini pasalaladha ki Tamatama ka Twaumase ki swa Iseraylri.

¹⁵ Ku siaswalane, kai Hiburungu nasia cekele ki Arebe. (Amani ku madradraunga makeceecengenga ki lazuku ki swa Anake ka tadradradrau ka umawmase.) Twalainga kikai, kikai swa talikai kai la kasulivaliivatenga, ka kadrwanga ku makarururuburu.