Yesua 13 - Ngudradreadrekadhane Ka Sisiu 魯凱語聖經

Kaika nidrikisaneana ka kadaengane

¹ Ikai kikai, ku Yesua laka tarudrawdrangenga. Ku Tamatama la kawriva iniane, “Tarudrawdrangengasu, ai swadrawana ku kaika nimalraneana ku kadaengane,

² amani kwini palraelre ki swa talikai ki Pelisitine si Gisure,

³ si kwini tali lrawdru kwini palraelre ka kadaengane ki swa Avime. (Kikai kadaengane twalai lrawdru ka pagisane ki Izipiti ka drakerale Sihure, ku tali dradha wakela ka pagisane Ikerungu, naswa Kanange, amani kwini yakai Gaza, Asedude, Asekelungu, Gathe si Ikerungu ka talrima ka talialalai ki swa Pelisitine.)

⁴ La ikaiyana ku swa Kanange ku kadaengane palraelre, si swa Sidune ka Miara, daruru kavai pagisane ki Amuri ka Apeke;

⁵ la ikaiyana ku kadaengane ki swa Gebale, kwini tali talrawane ki swa Lebanungu, twalai Heremunge tali lrawdru ka Baale Gade kela ka tangutikianane ka Hamathe.

⁶ Kikai swakai kai paelre ki yakai lregelrege Lebanungu si yakai lregelrege ka Misereputhe Maime ka swa Sidune palraelre. Lu kelakelanga ku swa Iseraylri, lri ngikakamaniaku pakatwase kwini ki laumawmase. Lri singikaisu ku drekaseli malra kikai kadaengane si pavavala ki swa Iseraylri.

⁷ Kaiasasane, malra kikai kadaengane pavavala ki drumane ka tabangate ka zuku si apararamau ka zuku ki Manase, tucungulu lini.”

Tapavalavalane ki tali talrawane kadravane Yuredange ka kadaengane

⁸ Ku zuku ki Riwbingi, zuku ki Gade, si pararamau ka zuku ki Manase wamalranga ku pavalavala ki sasiakawlu ki Tamatama ka Musi, yakai tali talrawane kadravane Yuredange kwini kadaengane.

⁹ Ku kadaengane lini twalai pagisane vaalru ka Arenunge ka Arure kela kwini kabicelrakane vaalru ka cekele, paelre kwini tabelengane ka lregelregane Midiba kela ka Dibune;

¹⁰ la kelana ka pagisane ki Amune, paelre kwini yakai Hesebunge ka rathudu ki talialalai ki swa Amuri ka Sihunge.

¹¹ Kikai kadaengane mialri ka paelre ki Gileade, Gisure si Maka, nguelre ki Heremunge, si palraelre kwini Basane, kela ka Saleka;

¹² la mialri paelre kwini lakadaengane ka kadrenge ki bibilrilinga ka Uge ka talialalai ki swa Ripaime—Asetaruthe si Ideri. Ku Musi pamalebenga kikai ki laumawmase, si pakatwase liniane.

¹³ Ai ku swa Iseraylri kai pakatwase kwini ki swa Gisure si swa Maka; kwini lalasu pakela kaikameane yakaikaiyana kwini ki swa talikai ki Iseraylri.

¹⁴ Ku Musi kai wavala ku kadaengane kwini ki swa Lrivi. Ku Tamatama naamia kai ki Musi, kwini lalasu lri kivala kudra nilamane patarumara ki Tamatama ka Twaumase ki swa Iseraylri kudra lamanemane; kikai amani ku kitucungulu lini.

Kitudrulru ki Riwbingi ka zuku ka kadaengane

¹⁵ Ku Musi wamalra ku taingeane ku kadaengane si baai ki Riwbingi ka zuku ki dadaane, sa tucungulane lini.

¹⁶ Ku pagisane ki kadaengane lini wakela kavai pagisane ki vaalru Arenunge ka Arure. Si yavaalru ka cekele, si kwidra ngiathalringulu ki tabelengane ka lregelrege ka Midiba;

¹⁷ la mialri paelre kwini sanaka cekele talikai tabelengane ka lregelregane Hesebunge, amani kwini Dibune, Bamuthe Baale, Bithe Balemiunge,

¹⁸ Yazare, Kidimuthe, Mipathe,

¹⁹ Kiriathaime, Sibema, Zerethe Sahare ka lrelrelrege ikai ki vaalru,

²⁰ Bithepiure, sawdradradha Pisega, si Bithe Yesimuthe.

²¹ Ku kadaengane ki lalasu paelre kwini yakai ki tabelengane ka lregelrege sanaka cekele si palraelre kwini cekele ki swa Hesebunge ka talialalai ki swa Amuri ka Sihunge. Ku Musi pamalebenga ki talialalai ka Sihunge si mialri pamalebenga ki lakiacapili ki swa Midiange: Ivi, Rekeme, Zure, Hure si Riba. Kikai lakiacapili nakiakadrenge ki talialalai ka Sihunge.

²² Ikai kwini ki kiapapacai ki swa Iseraylri pakanaelre ku umawmase, yakai ku lalake ki Biure ka taratulrisi kithingale ka Balame.

²³ Kwini zuku ki Riwbingi talikai sapakalriwgu twa pagisane kwini kadravane Yuredange. Kikai lacekele wabaainga apavavala sudaane ki zuku ki Riwbingi, tucungulunga lini.

Kitudrulru ki Gade ka zuku ka kadaengane

²⁴ Ku Musi mialri baai ku taingeane ku kadaengane ki Gade ka zuku, tucungulu liniane.

²⁵ Kwini pagisane ki kadaengane lini paelre ki Yazere si sanaka cekele ki Gileade, si pararamau ku kadaengane ki swa Amune, daruru tali talrawane ki Raba ka Aruire;

²⁶ la mialri paelre twalai Hesebunge kela Ramuthe Mizepa si Bitunime, twalai Mahanaime kela pagisane Ludibare.

²⁷ Kwini talikai valrwalru Yuredange paelre Bithe Harame, Bithe Nimera, Sukuthe si Zapunu, amani kwini drumane ka kadaengane ki talialalai ki Hesebunge ka Sihunge, ku pagisane tali sapakalriwgu amani kadravane valrwalru Yuredange, papia tali dradha kela ka Baiyu Galrilri.

²⁸ Kikai lacekele wabaai sudaane ki zuku ki Gade, tucungulunga lini.

Kitudrulru ki swa tali talrawane ka Manase ka zuku ka kadaengane

²⁹ Ku Musi wabaai ku taingeane ku kadaengane ki pararamau ka zuku ki Manase, tucungulunga lini.

³⁰ Kudra tangukakaiyane ki kadaengane lini wakela ka Mahanaime, paelre palraelre Basane, kwini palraelre ku kadaengane ki talialalai ki swa Basane ka Uge, si yakai kwini Basane, ki swakai Yaire lacekele ki Yare ka taimanemele.

³¹ La mialri paelre kwini palraelre ki pararamau ki Gileade si talialalai ki swa Basane ka Uge ka tadradrau ka cekele—Asetaruthe si Ideri. Kikai lakadaengane makitwa baainga ki pararamau ka Manase ka zuku; kikai pararamau ka zuku amani ku lamwabaibalrithi ki Makire ka lalake ki Manase.

³² Kikai nipacasane amani kudra sakacaili ku Musi sa ikai ka dratane Muabe waagisi ku kadaengane ka Yeriku si tali talrawane kadravane Yuredange kudra tangimiamiane.

³³ Kai wadrulru ki zuku ki Lrivi; peaelaela liniane, kudra nipatarumarane ki Tamatama ka Twaumase ki swa Iseraylri ku lamaneemanenga amani ku kitudrulru lini ka kitucungulu lini.