Yesua 11 - Ngudradreadrekadhane Ka Sisiu 魯凱語聖經

Ku Yesua pamalebe ki Yabingi si redelaneini ka lakuni

¹ Ku taakaciane ki swa Iseraylri kia mapelaelanga daruru ki calringa ki Yabingi ka talialalai ki swa Hazure, kwini lasu la sikawlu ku wailuku ku vaga mwa pelaela ki talialalai ki Madunge ka Yubabe, latalialalai ki Simerunge si Akesape,

² si kwini swa tali dradha ka tali lregelrege, tali lrawdru ka valrwalru Yuredange ki baiyu Galrilri, tali lrelrelrege. Si kwini latalialalai ki ngwadadeethe Dure kwini ki ngwababiabila ki laveke.

³ Kwini lasu la sikawlu mwa pelaela kwini ki mababalrealreanane kadravane Yuredange ka swa Kanange, la mialri baai ki swa Amuri, swa Hite, swa Perizi, si swa tali lregelrege ka Yebuse, si kwini yakai lregelrege Heremunge ka kadaengane Mizepa ka swa Hivi.

⁴ Kwini latalialalai makitwa iluku ki kwapingi lini kainganai, ku pangalane lini paramia ki enai ki babiabila ki laveke. Kwini lalasu thathatha ku rigi si palridingi lini.

⁵ Kwini latalialalai ngiaelrenga, la madredresenge ikai kadravane Mirume, pasana kikaruburu ki swa Iseraylri.

⁶ Ku Tamatama la kawriva ki Yesua, “Madha mukulukuludru liniane; lwiya luka miyaiya kai ku vai, lri pasikaiyaku ki Iseraylri pamalebe liniane. Lri calrigisu retege ki drapale ki rigi lini, si lama ki palridingi lini.”

⁷ Ku Yesua la sangiluku nguelre ki kwapingini, pikai kadravane Mirume papacai liniane.

⁸ Ku Tamatama la malra liniane baai pikai ki alrima ki swa Iseraylri. Ku swa Iseraylri la saladha liniane, kela tali dradha Misereputhe Maime, si Sidune, tali talrawane daruru vaalru Mizepa, pakela ku tapapacadhane amudu liniane ala isadra.

⁹ Ku Yesua la singikai ku tadrekasane ki Tamatama marasikai liniane, thiabe ki drapale ki rigi lini, si lama ki palridingi lini.

¹⁰ Ku Yesua ala siwlri, kikaruburu ki Hazure, papacai ki talialalai lini. (Sakamani kwidra kwini Hazure magagaarangenga kwini ki kuni.)

¹¹ Ku kwapingi ki swa Iseraylri la papacai kwini ki laumawmase demedeme, kadrwa ku natangeanga ku nipasurane, la pwa lama kwini ki cekele.

¹² Ku Yesua wamalranga nguelre kikai lacekele, pwalra ki latalialalai lini, nguelre papacai ki laumawmase, mararamau kudra tadrekasane ki sasiakawlu ki Tamatama ka Musi.

¹³ Ku swa Iseraylri kai mabebetethe kwini nitucekelane ikai lrelrelrege ka lacekele; kathane kwini Hazure ka kia lama ki Yesua.

¹⁴ Kai swa Iseraylri laravase kikai lacekele, la malra kwini la tinukucingalrane ku paisu si lalwange ravase, nguelre papacai ki laumawmase, kai pasuru ku natangeanga.

¹⁵ Ku Tamatama wadrekase ki sasiakawluini ka Musi, ku Musi mialri drekase ki Yesua. Kudra drekase ki Tamatama ki Musi sanaka maneemane, ku Yesua ngwavavaeva paluludu.

Ku drikisi ki Yesua ku kadaengane

¹⁶ Ku Yesua wamalranga kwini lakadaengane pakanaelre, paelre kwini ki tali dradha si tali lrawdru ka ngwalralregelrege si lalrelrelrege, palraelre Gusenge si tali lrawdru ka kameamealane, si vaalru kadravane Yuredange.

^17-18 Kwini tangukakaiyane, tali lrawdru twalai adeethe Idume ka lregelrege Halake, tali dradha daruru tali lrawdru ka lregelrege Heremunge vaalru Lebanungu kavai Baale Gade. Ku Yesua maulai ku tamakakaruburane ki latalialalai ki swakaikai, ala maka pwalranga liniane, si malra papacai liniane.

¹⁹ Laka taingeangea ku cekele ku makakadalru ki swa Iseraylri amani kai yakai Gibiungu ka swa Hivi; ku drumane kia pamalebenga.

²⁰ Ku Tamatama pakalritheethe ku kidremedreme kwini lacekele ku kiaecebe ki swa Iseraylri, pakai ku akamudane lini, kipapacai, kai kikakuru, mararamau kudra tadrekasane ki Tamatama ki Musi.

²¹ Kikwini kwidra, ku Yesua waamudu ki yakai tali lregelrege ka tadradradrau ka swa Anake. Kikai zuku kai yakai kai Hiburungu, Dibere, Anabe, si lregelrege ki Yuda si Iseraylri. Ku Yesua wademedemelringa amudu liniane si lacekele lini.

²² Ikai ki cekele ki swa Iseraylri kadrwa ku nipasurane ku natangeanga ku swa Anake, kathane ku yakai ki swa Gaza, Gathe si Asedude ka yakaiyana ku tabeekele ku waudripi.

²³ Ku Yesua singiakai ku drekase ki Tamatama ki Musi ku vaga rathudunga nguelre kwini ki kadaengane. La malra kwini kadaengane pavavala ki swa Iseraylri, savavaeva kwini lazuku. Ala kwini la kasulivalivatenga kwini lacekele si kadaengane, ka kadrwanga ku makaruruburu.