Yesua 10 - Ngudradreadrekadhane Ka Sisiu 魯凱語聖經

Pamalebe ki swa Amuri

¹ Ku talialalai ki swa Yerusalrime ka Adunizedike kialalra ku Yesua ka mwa cekelenga ki cekele ki Ai, si papacai ki talialalai ki Ai, mia ku natapangimianeini kwini ki swa Yeriku si talialalaini. La kilalra ku swa Gibiungu si swa Iseraylri sa cegecege ku samakaketeketane ka samakakadalruane, kaiasasane la ikainga liniane.

² Ku swa Yerusalrime la mukuludru turamuru; asi lwiyane kwini Gibiungu kaika tikiane ka cekele, kwini cekele mararamau kwidra ki yakai ku talialalai lini ka cekele madradrauana ki swa Ai kwini swa Gibiungu laka yadrepele ka latamagarange.

³ Lakamani, ku Adunizedike siakawlu ki umawmase mwa pelaela ki talialalai ki swa Hiburungu ka Huhame, swa Yaremuthe ka Pirame ka Yamuthe, swa Lakise ka Yapia si Igelunge ka Dibere, la iya kai,

⁴ “Abwala paralubaili kikaruburu ki Gibiungu, asi lwiyane kikavai makaketekete ki Yesua si swa Iseraylri ku amakakadalrwane.”

⁵ Lakamani ku swa Yerusalrime, Hiburungu, Yaremuthe, Lakise si Igelunge kwini tailrima ka talialalai ki Amuri ngiaelre si kainganai lringulu ki swa Gibiungu.

⁶ Ku swa Gibiungu la padaruru ku vaga ki Yesua ka yakai tasulasuladhane Gilegale, “Madha sathili si dredrele, abwala kikai asasane si paralubu naiane! Palribulu naiane! Kikai yakai tali lregelrege ka latalialalai ka Amuri ngiaelrenga si kela kikaruburu naiane!”

⁷ Ku Yesua la makakai mailuku nguelre kwini ki kwapingi, paelre kwini ki lagaragarange ka lakwapingi, twalai kwini Gilegale kainganainga.

⁸ Ku Tamatama amia kai ki Yesua, “Madha mukulukuludru liniane; wamalranga naku liniane si baai pikai ki alrimasu! Kwini lalasu kadrwa ku lri maka kiecebe numiane.”

⁹ Ku Yesua la mailuku kwini ki lakwapingi takamaungane twalai Gilegale kisaswarau mwa ka Gibiungu, kikaruburu kwini ki swa Amuri.

¹⁰ Ku Tamatama sa padrele kwini ki swa Amuri ki kwapingi ki swa Iseraylri la makitu kasamali kai thingale ku apangimiane lini. Ku swa Iseraylri la papacai liniane ikai Gibiungu, saladha liniane kela kwini tangutikiane ki lregelrege ki Bithe Hurunu, la katwase papia tali lrawdru saladha kela kavai Azeka si Makida.

¹¹ Sa kisaladhaladha ki swa Iseraylri kwini swa Amuri, mwabere papia kwini tangutikiane ki lregelrege, ku Tamatama la pawruru ku kananu tarakadadalranane papacai liniane, daruru kavai Azeka. Ku kiapapacai ki kananu takakalra ki kiapapacai ki kwapingi ki swa Iseraylri.

¹² Ku Tamatama amani ka paakaci ki swa Iseraylri ki Amuri. Ikai kwini ki vai ku Yesua yacucubungu ki swa Iseraylri si papia ki Tamatama inulri: Kusu ka vai, idrengera ikai belenge ki Gibiungu; kusu ka dramare, idrengera ikai vaalru ki Aiyalungu.

¹³ Ku vai la idrengere, ku dramare la kai ngivelevele, pakela kudra tapamalebeane ki badha ki swa Iseraylri. Kikai tangilribatane nipacasane pikai ki Yasare ka Hungu. Ku vai yasadra ikai subelebelenge, turakete kai mulebe.

¹⁴ Ku Tamatama kialalra ku vaga ki umawmase, kunadruma kadrwana ku tangimiane kikaikameane, lubibilrili la lri kai ngimianga. Ku Tamatama pasiakai ki Iseraylri kikaruburu!

¹⁵ Sa ngilribatenga kikai, ku Yesua mailuku ki kwapingi siwlri mwa takwapingane Gilegale.

Pangwa pwalra ki talrima ka talialalai ki Amuri

¹⁶ Kwini talrima ka latalialalai ki Amuri matwasenga mubere, kialepenge ikai kwini ki barungulu ka lregelrege Makida.

¹⁷ La ikai ku kiadringai liniane, la katwase pelaela ki Yesua kwini ki taikaiyane lini kilepenge.

¹⁸ Ku Yesua la kawriva, “Balrutadha ku maadrau ku lrenege si pwa celrepe kwini ki barungulu, la sikawlu ku tapiya ku kwapingi kadrenge.

¹⁹ Ai kunumi madha ikaikai kai, katwasana saladha kwini ki badha, madha pasiwlriwlri liniane mucekele! Ku Tamatama ka Twaumase numi wabaainga liniane pikai ki alrima numi.”

²⁰ Ku Yesua si swa Iseraylri laka kadrwa ku kurwane la pwa papacai liniane, la tabekelenga ku mwabere mwa ki makecenge ka cekele, la kai kipapacai.

²¹ Sakabilrilanenga, ku Yesua la sangiluku kwini ki lakwapingi la kasulivaliivate siwlri mwa takwapingane Makida. Twalainga kikai, kadruanga ku umawmase ku avavaga nau kiecebe iya ki swa Iseraylri.

²² Ku Yesua la kawriva, “Mwalra kwini sacelrepane ki barungulu, la malra kwini talrima ka talialalai padrele nakwane!”

^23-24 Kwini lalasu la muelebe kwini lrawlrawdru ki barungulu, la malra kwini ki latalialalai ki swa Yerusalrime, ki swa Hiburungu, swa Yaremuthe, swa Lakise si Igelunge, iluku mwa ki Yesua. Ku Yesua la sarubu pakanaelre ki swa Iseraylri, la cunu kwini ki palraini kikaruburu ka kiacapili ki lakwapingi, ara drapale tetere kwini ki lre ki talrima ka talialalai, kwini lalasu la pangimia ku takicunane.

²⁵ Ku Yesua la iya kai ki tabebelenge ka kwapingi, “Madha kasulrisulri ukuludru, kecengana, si kagarange, asi lwiyane, ku Tamatama lri pangimia kai papacai patuelre ki badha numi.”

²⁶ Ku Yesua ala papacai kwini ki talrima ka talialalai, si malra kwini kinawmasane lini kelrai pwa ki lrima ka angatu, pakeela ki miauawbu.

²⁷ Sa lriwlriwgu ku vai, ku Yesua la drekase pulebe kwini kinawmasane, la cilri sawlri pwa kwini ki takibaladhane lini ka barungulu, kwini barungulu la arakai ku tadradrau ku lrenege celrepe. Kwini lalrenege pakeelana kaikameane yakaiyana.

Ku Yesua arwa drikisi ku makaakalra ku kadaengane ki Amuri

²⁸ Kwini vai kwini, ku Yesua la mucekele ki swa Makida, la papacai kwini talialalai ki swakai kwini si demedeme kwini ki sakatucekelane, kadrwa ku natangea ku nipasurane, ku tapangimianeini ki talialalai ka Makida mararaamau ku tapangimianeini ki talialalai ka Yeriku.

²⁹ Sa ngilribatenga kikai, ku Yesua si kwapingini twalai Makida mucekele ki Libena.

³⁰ Ku Tamatama wabaai pikai ki alrima ki swa Iseraylri kwini cekele si talialalai lini. Kwini lalasu wademedeme papacai kwini umawmase ki cekele, kadrwa ku nipasurane. Kwini lalasu ku tapangimiane lini ki talialalai ka Libena, pangiamia ku tapangimiane lini ki talialalai ka Yeriku.

³¹ Sa ngilribatenga kikai, ku Yesua wasangiluku ki kwapingi twalai Libena si mwa lringulu ki Lakise.

³² Ki samaka pusale ki takikaruburane, ku Tamatama la baai ki swa Iseraylri kwini ki badha. Ku tapangimiane lini ki Lakise mararamau ku tapangimiane lini ki Libena, wademedeme papacai kwini umawmase ki cekele, kadrwa ku nipasurane.

³³ Kwini talialalai ki Gizere ka Hurame la kela palribulu ki Lakise, ku Yesua la malra papacai iniane, amudu ki kwapingini, kadrwa ku nipasurane.

³⁴ Sakabilrilane, ku Yesua la sangiluku ku kwapingi twalai Lakise lringulu ki Igelunge.

³⁵ Kwini lalasu maka vavale si mucekele, papacai demedeme kwini ki umawmase, mararamau ku taikaiyane lini Lakise.

³⁶ Ku bilrilane, ku Yesua la iluku ki kwapingi twalai Igelunge mwa lregelrege Hiburungu, si lringulu Hiburungu.

³⁷ Kwini lalasu la malra kwini ki cekele, si papacai kwini talialalai si laumawmase, si ngwakakai kwini ku lacekele ka umawmase. Ku Yesua waamudu kikai ki cekele, mararaamau ku tapangimiane ki Igelunge, kadrwa ku natangeanga ku nipasurane.

³⁸ Ku Yesua la katuasenga sangiluku ki kwapingi siwlri kikaruburu ki Dibere,

³⁹ sa mucekelenga kwini ki cekele si ngwadadeethe sanaka cekele, papacai kwini ki talialalai si mapapangale, kadrwa ku nipasurane ku natangeanga ku umawmase. Ku Yesua ku tapangimiane ki Dibere si talialalaini, mararamau ku tapangimianeini ki Hiburungu si Libena si talialalai ki Libena.

⁴⁰ Ku Yesua wamalra rathudu palraelre kwini swakai kwini. Warathudunga ki tali lregelrege, sisiane tali talrawane si lalrelrelrege tali sapakalriwgu, si tali lrawdru ka takameamealane. Kwini lasu pamalebenga nguelre kwini swakai talikai kaika latalialalai, nguelrenga papacai ki laumawmase, kadrwa ku nipasurane ka natangeanga. Kikai drekase ki Tamatama ki swa Iseraylri.

⁴¹ Ku Yesua pamalebe ki labadha, twalai tali lrawdru ka Kadise Barania kela kavai deethe ki laveke ka Gaza, paelre kwini ki swa talikai Gusenge, papia tali dradha kela ka Gibiungu.

⁴² Kai Yesua yakai kwini ki nikingivaalane ki tamakakaruburane pamaki ki latalialalai si malra ki lakadaengane lini, asi lwiyane ku Tamatama ka Twaumase ki swa Iseraylri pasiakai ki swa Iseraylri kikaruburu.

⁴³ Sangilribatenga kikai, ku Yesua la sangiluku ki kwapingi siwlri mwa ka takwapingane Gilegale.