Yesua 1 - Ngudradreadrekadhane Ka Sisiu 魯凱語聖經

Ku Twaumase wadrekase ki Yesua ku amwane pamalebe ki swa Kanange

¹ Ku sasiakawlu ki Tamatama ka Musi sa pacainga kwidra, la kawriva ku Tamatama kwini ki sasiakawlu ki Musi ka lalake ki Nunge ka Yesua

² iya kai, “Wapacainga ku sasiakawluli ka Musi. Kikai kusu ngipapadulrua ku asangilukanesu patuelre ki swa Iseraylri talubalre kadravane Yuredange, katwase mwa kwini ki apatarumaraneli ka kadaengane.

³ Pangimia ku tapalrainganeli ki Musi, sanaka tangukakaiyane numi, lri baadhaku numiane patuelre.

⁴ Ku pagiagisane numi lri twalai tali lrawdru ki aenaenai si daruru tali dradha lregelrege Lebanungu, twalai tali talrawane kadravane Yuparati, ngukakai ki kadaengane palraelre ki swa Hite, daruru tali sapakalriwgu ki tali laveke Miditerania.

⁵ Yesua, ikai ki tapanianiakanesu, kadrwa ku umawmase ku lri maka pamalebe muswane. Lri tapalraku muswane, mia ku tatapalraneli ki Musi. Kainaku lri sarare muswane, kainaku lri cilri muswane.

⁶ Kagaranga, la kagalremegeme ku kidremedreme, asi lwiyane lri sangilukusu ki mapapangale mwa mucekele kwini ki palraingingali ki cucungulane numi ka kadaengane.

⁷ Sana kagarangesu, si kagalremegeme ku kidremedreme, kapatengatengane paluludu kikai baai ki sasiakawluli ka Musi muswane ka hulrice patuelre, kai tudreadrekase ku navaevanga, lri kasulivatesu papia ki druanga.

⁸ Kusu silrilrilrigua, pivaiyane pimaungu dredrele kikai hungu ka hulrice, lasu maka paluludu kai pacase ki hulrice ka vaga patuelre. Lu mia kikai, kusu lri tara pangiesaisu, si kasulivalivate sanaka awngane.

⁹ Kusu pulringaava kai drekaseli: Kagaranga, kagalremegeme ku kidremedreme! Kai mukuludru, kai kasekelrame; asi lwiyane adravane muinininusu kwaku ka Tamatama ka Twaumasesu lri tara tapalra muswane.”

Ku Yesua padulru ku atalubalreane

¹⁰ Ku Yesua wacunu ki kiacapicapili ki mapapangale,

¹¹ katwase mwa ki la tasuladhane ki mapapangale pelaela, “Padulrua ku la akaneane, asi lwiyane kai ki amakatulrulane lri lribate numi kadravane Yuredange, mwa mucekele malra kwini abadhane ki Tamatama ka Twaumase numi kwi kadaengane.”

¹² Ku Yesua la kawriva ki zuku ki Riwbingi, Gade si pararamau ki Manase iya kai,

¹³ “Kunumi tarapulringava ku tacunane ku vaga ki sasiakawlu ki Tamatama ka Musi, ku Tamatama ka Twaumase numi wamalra kwini tali talrawane ki kadravane Yuredange baai numiane, ku lrika asutelradhanenga numi ikai.

¹⁴ Ku labaibai numi, lalalake si lanilapulapwane lri asusuru ikai kai; ai kudra tarakikaruburu numiane lri aswala ki sakacekele ka swa Iseraylri, lri aswala talubalre kadravane Yuredange. Lri kitilibi numi liniane kikaruburu,

¹⁵ pakeela ku amalrane palraelre ki tali sapakalriwgu kadravane Yuredange, ka amani kudra baai liniane ka kadaengane ki Tamatama ka Twaumase numi. Kwini lalasu lu sutelrainga ikaikai kwini, ala lri maka dulru numi siwlri mwa tali talrawane Yuredange, mwa kwini ki baai ki sasiakawlu ki Tamatama ka Musi ka kadaengane.”

¹⁶ Kwini lalasu la tubalre ki Yesua, “Sana drekasesu naiane tumana iya, lri pangimia nai; lu sikawlusu naiane mwinu, ku lri mwinu nai.

¹⁷ Lri pasalaladha nai muswane, mia ku tapasalaladhane nai ki Musi. Ku Tamatama ka Twaumasesu ani tapalra muswane, mia ku tatapalraneini ki Musi.

¹⁸ Ku aneane ku wabaebalre ku drekasesu, kai kilalra ku tasangilukanesu, lri kamani kudra lri kipapacai. Kusu kagaranga, si kagalremegeme ku kidremedreme!”