Yerimia 9 - Ngudradreadrekadhane Ka Sisiu 魯凱語聖經

¹ Anatumane laka dralremedreme kai awlruli, laka berai ka lrese kai macali, la nau ka tatubitubiyane ki vaiane ki maungu pasikai ku takipapacadhane ki sakacekeleli.

² Lu ikaiyaku ubulane ana ikaai ku takipaidringaneli, si dulru mwadaaili mubere ki sakacekeleli. Kwi lalasu yadrepele ka wabaebaebalre. Kadrua ku takapatengatenganane ku kidremedreme.

³ Kwi lalasu watavuvuvulrucu; arakai ku kaika patengatengane si tupatengane ka sabulrwane, si rathudu kai ki kadaengane. Ku Tamatama amia kai: Kai kawkawluli kai watelrai pia ku malisi, la kai tu Twaumase nakwane ka Twaumase lini.

⁴ Sanaka umawmase makanaelre wadradrele si telenge ki laretesane, ku mababetake kai maka masaswadralru; asi lwiyane ku mababetake mia ki Yakubu ka matavuvulrucu makanaelre, ku laretesane makanaelre kawrivariva ku angilisianane ki palrapalra.

⁵ Watavuvuvulrucu ki talrailragi makanaelre; kadrwa ku umawmase ku twakapatengatengane lu kawriva; sanaka umawmase wabulrubulru ku atavuvulrucane ki lridame. Kwi lalasu pacungucungulu pasalriu;

⁶ kwi lalasu apapelaela ngikarakacane ka kadrwa ku ulalengane tavuvulrucu. Ku Tamatama amia kai, ku kawkawluini wacilringa iniane.

⁷ Lakamani, ku Tamatama ka abebeelengenga ki sanaka kwapingi amia kai: Lri pakicawcakwanaku ki kawkawluli, si kilrialringau liniane. Lu kanganga ku kawkawluli, lri dulrwaku kai pathavungu?

⁸ Kwi lridame lini mia ki rangirangisi ka lraili; kwi lalasu kai watelrai tavuvulrucu. Makanaelre ku laumawmase mathaariri lu kawriva ki latalrailragi si lalaliali, ku patengatengane ala ka walrukulruku ku lrubange.

⁹ Lai kainaku lri ngwalai kilakikai si pathavungu liniane? Lai kainaku lri ngwalai kai ki miyaiya kai ku kuni si bilri liniane?

¹⁰ Amiaku kai: Lri pasikaiyaku ki lalrelrelrege tubi tungawngau, pasikai ki maububulu silringau; asi lwiyane kialama si alrangelenga, kadrwanga ku umawmase ku ngwakakai lribate, laka kadrwanga ku lingau ki lalwange si kiu, adravane ka adhadhame ka walrawlrakwane ka waudriwdripi kadruanga.

¹¹ Ku Tamatama amia kai: Lri apatawlrakavanaku Yerusalrime, si acekele ki latawpungu ubulane; lri paubulanaku ki lacekele ki swa Yuda, kadrwanga ku laumawmase ku lri ikai.

¹² La kivagaku, “Tamatama, kikai kadaengane ani awbulane mia ki aenaenai kameameale, kadrwa ku umawmase ku yakaikai? Aneane ku walribate ku lrigilane, si lri dulru pulringau kikai kakudhane? Napapiangasu ki aneane lalrwai, si kwini lasu lai lri dulru papia ki palrapalra swacenge?”

¹³ Ku Tamatama la tubalre, “Kikai yai amani sacilri si baebalre ki sabulrwaneli, la kai kilalra pasalaladha ki vagali, la kai pangimia ki drekaseli.

¹⁴ Kwi lalasu makecenge si ngisasingikaai ku atumanane. Pasalaladha ku sabulrwane ki cucungulane lini si katwase sukubu ki Baale.

¹⁵ Lakamani, kwaku ka Tamatama ka abebeelengenga ki sanaka kwapingi, ka Twaumase ki swa Iseraylri amiaku kai pelaela: Lri pakanaku ki kawkawluli ku mapalili ku madru ki angatu, si paungulu ku duku ka acilai.

¹⁶ Lri paacaicaliaku liniane mwa ki lakuni, lri mwa kudra kaiyana ka kilalra lini si cucungulane lini ka kadaengane. Lri pakisamulaku pakatwase ki kwapingi ki badha kurisi liniane, si malra pakamudu liniane.”

Ku swa Yerusalrime kiatubi ku akiparalubane

¹⁷ Ku Tamatama ka abebeelengenga ki sanaka kwapingi amia kai: Kunumi yai kidremedreema! Dawla ku taratubitubi ka ababai lani kela si tubi, dawla ki tarasilringalringau ka ababai lani kainganai si silringau.

¹⁸ Ku laumawmase la iya kai: Pakirarimwa liniane pakainganai lani pasikai naiane silringau, ani silringau pakela ku akwalriane nai si pakilriingau ku tatubiane, mia ki waudawdale ku lrese!

¹⁹ Kilalalra kwi lingau kwi tatubiane ki cekele ki swa Ziyungu: Kiakabebetethengata! Kiatusinalrelremengata! Lri tara katwaseta ki cekeleta; kiakabebetethenga kai ladaaneta.

²⁰ La iyaku kai: Lalabaibai! Kilalra ku vaga ki Tamatama; kunumi kicacaligira kilalra ku vagaini. Bulrwa ki lalalake numi ka ababai tubi, bulrwa ki latalragilragi laliali numi pasilringau.

²¹ Ku apacadhane twalai ki lribange mudaane, si la mwanga ki daane ki talialalaita; ku apacadhane patwabakebake ki lavavalake ikai kadalranane ki cekele, wamudu ki layacengecenge ka yakai ki tairuburubwane.

²² Ngiasarade ikai kidruanga ku kinawmasane ki wapacai, mia ki lriduku umawma, mia ki sanguketabane ka mugi, ka kadrwa ku umawmase ku sialudu. Ku Tamatama wadrekase nakwane iya kai pelaela.

²³ Ku Tamatama amia kai: Ku ngiathingale madha ngilralrigulrigu ku ngithingalananeini; ku garagarange madha ngilralrigulrigu ku pukuini; ku maesaesaesai madha ngilralrigulrigu ku tacekecekelaneini.

²⁴ Kai umawmase lulri ngikalrilrigu, naika ngiakalrilrigu ku tathingalane nakwane, si pulringalringau nakwane; asi lwiyane Tamatamaku, ka kai lri akabalrithi ku sakialibake. Paiyaku ku aparamaramavane, si paruswadrau ku dringelresane; ku kadalameli amani kilakikai. Kwaku ka Tamatama amiaku kikai pelaela.

^25-26 Ku Tamatama amia kai, “Lri ikai ku minakavalane, ku apathavunganeli ki swa Izipiti, swa Yuda, swa Idume, swa Amune, swa Muabe, si yakai calragulragu kwidra wakaciane tuedreekane ku isiu ka minzuku. Kwi lalasu ikai ki beate kiagelregelrenga tulrisi, ai kwi lalasu si swa Iseraylri ikai ki kidremedreme kai kiagelregelre tulrisi, kai paluludu ku sapatuthingalane ka kiagelregelre tulrisi ka sakiketeketane.”