Yerimia 8 - Ngudradreadrekadhane Ka Sisiu 魯凱語聖經

¹ Ku Tamatama amia kai, “Lu kela kwini ki vai, ku badha lri lruku si malra patuelre ku culrale ki latalialalai ki swa Yuda, latabebelenge, labarakalai, layuginsia, si laumawmase ki swa Yerusalrime,

² lai lri putaluvaivai pakuvaivai, ikai tailebe ki dramare, si tariau. Kilakikai yabelenge amani ku kadalame lini, ku pasikaikai lini, ku satulrisilrisiane lini, ku sukusukubu lini sa italuvaivaiyana. Kilakikai culrale kadrwanga ku lri siludu si dralreke, lri alrangenga kai ki kadaengane.

³ Ku abalwana ku umawmase kai ki ngialisiane ka kuni lri ikai ki tapamwaneli paacaicali kitubi ku apacadhane kai lri apipanianiake. Tamatamaku ka abebeelengenga ki sanaka kwapingi; amiaku kikai pelaela.”

Pasalrivane si sapathavungane

⁴ Ku Tamatama peaelaela nakwane papia ki kawkawluini iya kai kawriva, “Ku umawmase lu tubakebake, kai kiadremedreme ku angidrakalane? Ku umawmase lu amama ki kadalranane, kai kiadremedreme ku asiwlriane?

⁵ Kunumi ka lakawkawluli, anu pakisaalru baebalre, si katwase kai siwlringa? Kunumi wagalrimecemece numi ki samiamiange, si kai mubangalre siwlri mwa nakwane kai.

⁶ Kiacacaligiraku kilalalra, ai kai numi kawariva patwalai ki kidremedreme. Kadrwa ku umawmase ku pasiakai ki nganganeini si ngitatupela; kadrwa ku umawmase ku ngiakakidremedreme, ‘Maneemanelringa ku pasalriuli’, sanaka aneane ngiasasingikaikaai pia, mia ki tarakikaruburuburu ka rigi ka papiapia ki tamakarururuburane lailai.

⁷ Adravane ka kwange wathiingale ku kalamanemanane, si singikai ngipalai kainganai; ku tavagu, alralrakici, makavawvawngu mialri tupapalra ki kalamanemanane si talula. Ai kawkawluli, la kai numi maka thingale ku padradrekaseli!

⁸ Anu maka dulru ngitatumalrigili, ngitatuwathingale ki hulriceli? Ku patengatengane, kai hulrice kiatupela ki matavuvulrucu ka tarabulrubulru ki Sisiu.

⁹ Ku talrilrigili numiane ku umawmase kiarubwane, la mukuludru kai thingale ku atumanane. Kwi lalasu wacilri kai vagali, yakaiyana ku manemane ku lrigilane?

¹⁰ Lakamani, lri malraku ki taelrelre lini si baai ki palrapalra, la alra ku kadaengane si baai ki bavane ka tawki. Kwi lalasu adravane ka laabelenge ka laalebe marau makanaelre ku kai madringelrese ku lamanemane, adravane ka layuginsia labarakalai mialri ka watavuvuvulrucu ki laumawmase.

¹¹ Kwi lalasu lu drele ku takadulane ki kawkawluli kai twamanemane. Kwi lalasu amia kai, ‘Kai lri katumane, kai lri katumane’, ku patengatengane pakialringau ka mendai.

¹² Kai lalasu sa pia kikai ngialisiane naithingale kainu, ai kai lalasu kai wathingale kainu, si kadirele ku lringau. Lakamani, kwi lalasu lri mia ki palrapalra tubakebake. Lu pathavungaku liniane, kwi lalasu lri kai maka siwlrianenga. Tamatamaku amiaku kikai pelaela.

¹³ “Lri payelrelreaku ki kawkawluli, mia ki kiataletaleke. Ai kwi lalasu mia ki cebe ka budu kai pumadru ku budu, mia ki icizike ka angatu kai pumadru, adravane ka vasau marudame patuelre. Lakamani, palraingaku ki maelane ka kuni lu kainganai drikisi ki kadaengane lini.”

¹⁴ Ku kawkawlu ki Twaumase kiavaga, “Anai ka taneneeane kai ngivelevelevele? Ngidrakala, si lailai mwa ki niravadrane ka cekele, la pacai ikai kwini! Ku Tamatama ka Twaumaseta twa apacadhanenga kai pasalrivaneta. Paungulu mitane kai yakai ku duku ka acilai, Asi lwiyane pasalriuta iniane.

¹⁵ Mwakalavata ku rathudane, si sidrama ku akipawdringadhane, ai kadrwa ku vai, ngiabalrelringa ka takakiwcane.

¹⁶ Ku badha wakelanga ka cekele Dange, kialalrata kwi tamanianiakane ki tarakikaruburuburu ka rigi. Lu karariau kwi tarakikaruburuburu ka rigi, ku kadaengane ngiavelevele. Ku badha lri kela si kabebetethe ki kadaenganeta si yakai belenge ki kadaengane patuelre; kwi lalasu lri kela si amudu ki lacekeleta si yakai kwini ka laumawmase.”

¹⁷ Ku Tamatama pakiapapawlringau ki kawkawluini, iya kai, “Drela! Lri malraku ku siduduku ka sulrau si pikai numiane kwini, adravane tulrisiane lri kai maka dulru pakatwase liniane; kwini lasulrau lri kace si dula numiane.”

Ku Yerimia watubi ki sakacekeleini

¹⁸ Watubi kai kidremedremeli turamuru; watubi kasakwakua kai kidremedremeli.

¹⁹ Kialalraku ikai kidruanga ku tubi ki sakacekeleli, “Ku Tamatama kaika yakaai Ziyungu? Ku talialalai ki swa Ziyungu kaika yakaai kai cekele?” La tubalre ku Tamatama ka talialalai lini: Kunumi anu sukubu ki samiamiange? Anu sukubu ki kadrwa ku paluludane ka samiamiange ki maelane ka kuni. Dawlu ku akalisianeli?

²⁰ Ku laumawmase watawtau: “Ngialribatenga ki kaladralrangedrangane, malrepengenga ku akitalekane, la kaita kipalribulwana!”

²¹ Ku takadulane ki sakacekeleli masuburu kai kidremedremeli; watubiaku turamuru si mukuludru kwalri turamuru.

²² Bekace ka kadrwa ku sasulravane ikai Gileade? Bekace ka kadrwa kwini ku tarasulrasulrau? Ani kai maka kipawdringai kai sakacekeleli?