Yerimia 7 - Ngudradreadrekadhane Ka Sisiu 魯凱語聖經

Ku Yerimia wasikiu ikai ki daane ki Twaumase

^1-3 Ku Tamatama siakawlu nakwane mwa ki lrawlrawdru ki daane ki Tamatama, acegecega amia nakwane ikai kwini si papia ki swa Yuda pelaela ku vagaini. La mwaku lrawlrawdru ki daane ki Tamatama, si papia ki lri sukubu ka mwadadaane ki daane ki Tamatama ka laumawmase pelaela ku vaga ki Tamatama ka abebeelengenga ki sanaka kwapingi, ka Twaumase ki swa Iseraylri, “Kunumi cilria ki malisi si papia ki madringelrese! Lukamiyaiya kai, lri pacungulaku paikai numiane kai ki kadaengane.

⁴ Madha kipawtengatenga kwidra la watavuvuvulrucu ki umawmase ka vaga, amia kai, ‘Swateelraita, kikai yai daane ki Tamatama; kikai yai daane ki Tamatama; kikai yai daane ki Tamatama!’

⁵ “Kunumi yai cilria ki ngialisiane si papia ki madringelrese, la arakaiya ku aparamaramavane si mapasikaikai.

⁶ Madha karau papia ki wakela iziu si lapakulrulrulu lawalibakane. Isadra ku apapacadhane numi capange ikai kai ki kadaengane. Madha sukubunga ki drumane ka twaumase, si ngipapakamwamudu.

⁷ Alaiyasi ngitatupela numi, lri pacungulaku numiane paikai kikai, ka amani kwidra nabaili ki cucungulane numi ka palralrawthu ka tacekecekelane ka kadaengane.

⁸ “Drela! Kwidra satalutalu numi kwidra vaga ki taratavuvuvulrucu ka laumawmase kadrwa ku paluludane.

⁹ Kwaupa numi, papacai ki umawmase, pasalriu ki sawvalai si ababai, draedrangelre siumi, papia ki Baale patarumara ku sapatarumarane, sukubu ki kaika thingale numi ka twaumase.

¹⁰ Paiya numi kudra kavalracevaceli ku awngane, ala lailai numi mwa ki daaneli, si acegecege ikai cucubungu nakwane, iya kai, ‘Swateelrainga nai!’

¹¹ Lu kidremedreme numi daane ki sadre amia numi kai daaneli? Wadrelaku pudriadriingai ku tangivelevelane numi.

¹² Kunumi lu mwa ka Selu, la drele kudra aswalalanga ka pilrili ka taikaikaiyane sukubu nakwane, lri thingale numi ku tangwaladhaneli ki pasalrivane ki kawkawluli ka swa Iseraylri si kiecebe ki swa kai kwini.

¹³ Kunumi pasalriwnga numi kai thathatha kai pasalrivane; la apapelaelaku bulru numiane, la kai numi makakilalra; lu tawtavaku numiane, kai numi twabalrebalre.

¹⁴ Lakamani, lri kiecebaku kwidra satalutalu numi kudra daaneli, mia sa kiecebaku ku paswalala ki swa Selu. Lri kiecebaku kikai ki kadaengane ka baaili numiane si cucungulane numi, mia sa kiecebaku ku paswalala ki swa Silu.

¹⁵ Lri pakatwasaku numiane si kai dredrelenga, mia kunadruma sa pakatwasaku ki retesane numi ka swa Iseraylri. Tamatamaku ka amia kikai pelaela.”

Ku laumawmase wabaebalre ku drekase

¹⁶ Ku Tamatama amia kai, “Yerimia, madha pasikaikai kai ki laumawmase inulri; la madha pasikaikai liniane kitubi. Madha papiapia nakwane kitubi, asi lwiyane kainaku lri kilalra.

¹⁷ Bekacesu kai dredrele liniane ku latatumatumanane lini ikai ki lacekele Yuda, ikai Yerusalrime?

¹⁸ Ku lalalake lini wasarubu ku angatu, ku tatama la padalai ku apwi, ku tiatina walrevege ku milrikinku si tupange, la patarumara ki ababai ka twaumase lini. Kwi lalasu la mialri papia ki drumane ka twaumase paralikiliki ku bava, waraanau pakagirimucu nakwane.

¹⁹ Ku patengatengane, kwi lalasu kaika mabebetethe nakwane, ngiakakamani ngikakabebetethe, ngipapakiarubwane.

²⁰ Lakamani, kwaku ka abebeelengenga ka Tamatama lri gugwaku kai lisianeli pikai kai ki daaneli ka Twaumase, lai lri mialriaku gugu pikai ki laumawmase, ki lawaudriwdripi, ki laangatu, si lataleke belenge.

²¹ “Kawkawluli, lu kidremedreme numi ku lasapatarumarane ku waudriwdripi yakai ku alamane patuelre, yakai ku adulrudulrwane kane ku nipatarumarane. Ai amiaku kaika Tamatama ka abebeelengenga ki sanaka kwapingi, ka Twaumase ki swa Iseraylri: Maesaesai lu kane numi patueelre kwi sapatarumarane kwi labeate.

²² Sa ililukaku patwalai Izipiti ki cucungulane numi, kainaku wadrekase liniane patarumara ku Lama ka lrisi si drumane ku apatarumarane.

²³ Wadrekasaku ku akilalrane si pasalaladha nakwane sikakathane; lu mia kikai, la a Twaumasaku liniane, kwi lalasu la akawkawlu nakwane. Ani paluludu kai kadalrananeli amiaku; lu mia kikai, kwi lalasu lai lri kasulivaliivate sanaka manemane.

²⁴ Ai, kwi lalasu kai kialalra si pasalaladha, la kai tumanemane, singiakaailringa ki takakelrathanane ki kidremedreme lini, lu akabalrithi arwa ngilisiiane.

²⁵ Twalai sa katwase Izipiti kwini ki vai ku cucungulane numi, apapelaelaku sikawlu ki sasiakawluli ka layuginsia papia numiane pelaela ku vaga,

²⁶ ai kadrwa ku umawmase ku twamanemane, la ka kadrwa ku umawmase ku kialalra. Manganganga numi ki cucungulane numi, ka pakilrialringau baebalre.

²⁷ “Lakamani, Yerimia, lri papiasu ki kawkawluli pelaela kikai lavaga, ai kwi lalasu kai kialalra; wadawlusu liniane, ai kwi lalasu kai twabalre,

²⁸ lri kaelaelasu liniane: Kwi kuni lini kai lri tarwamara ku sapathavungane, kai kialalra pasalaladha nakwane ka Tamatama, ka Twaumase lini. Kadrwanga ku takapatengatenganane lini, kwi lalasu adravane ka amatikaiyane kai matiakaikainga!”

Tapasalrivane ikai valrwalru Hinume

²⁹ “Swa Yerusalrime, tubia! Kirita kwi isiu patuelre, si cilri! Mwa belenge lregelrege si silringau! Asi lwiyane kwaku ka Tamatama wacilringa naku kwidra pakagirimucu nakwane ka kawkawluli.

³⁰ “Kai swa Yuda paiya ku taingeane ka malisi ka awngane. Kwi lalasu wamalra kwidra kalraseli ka samiamiange si pikai ki tasukusukubane nakwane ka daaneli, wakudrulrunga ki taikaikaiyaneli.

³¹ Kwi lalasu yakai Hinume valrwalru tutapatarumaramarane ki Tupithe, la malra ki lalalake lini si pibelenge lama patarumara. Kainaku kiatubi liniane pia kai patarumara iya, adravane ka akidredremane kadrwa.

³² Lakamani, yakai ku akelane ku vai, kwini kai lri si Tupithenga kai lri si Hinume ka valrwalru, lri si Tapapacapacadhane ka valrwalru. Asi lwiyane ku tadralredralrekane kai mwakesa, ku umawmase lri ikai Tupithe dralreke ki wapacai.

³³ Ku laadhadhame si lawaudriwdripi lri kainganai si kane ki kinawmasane ki wapacai, kadrwa ku umawmase ku lri dulru pakatwase liniane.

³⁴ Sanaka kadaengane lri pakababitingaku; ku lacekele ki swa Yuda si cekele ki swa Yerusalrime kadrwanga ku kiarararagai si mawlrakalrakalrakai, lai lri kakadrwanga ku marudrarudrange kapeapeaperau ku lingau. Kikai kadaengane lri aubulanenga.”