Yerimia 52 - Ngudradreadrekadhane Ka Sisiu 魯凱語聖經

Taamakiane ki Yerusalrime

¹ Ku Zidikia satara 21 ku caili atalialalai ki swa Yuda; kwi lasu yakai Yerusalrime rathudu tara 11 ka caili. Ku tinaini sia Hamutale, ka lalake ki Yerimia ka swa Libena.

² Ku talialalai ka Zidikia, mararamau ki talialalai ka Yehuiakime, ka paiya ku ngialisiane iya ki Tamatama.

³ Ku swa Yerusalrime si swa Yuda pakagirimucunga ki Tamatama, ku Tamatama la paacaicali liniane mwa ki maelane ka kuni. Ku Zidikia wabaebalrenga ki Nibukadenezere ka talialalai ki swa Babilunia,

⁴ Lakamani ku Zidikia sa tara bangatenga ka caili ki sakamangeale ki dramare maka mangealenga ki vai ku tarathudane Yuda, ku Nibukadenezere waililuku ki kwapingini si lringulu Yerusalrime. Ku kwapingi ki swa Babilunia yakai latadre ki cekele tutakwapingane, si thalringulu ki cekele ara dae raedre ku tasalikaiyane kikaruburu,

⁵ Walringulu Yerusalrime pakeela ku tatara 11 ka caili ku taatalialaladhane ki Zidikia.

⁶ Saka caili kwini ki sakasupate ki dramare ki samaka bangate ki vai, masilrau turamuru kwini adringi ki cekele, ku laumawmase kadrwa ku taleke,

⁷ Ku raedre ki cekele kiaburukunga. Adravane sa ngithalringulwana Yerusalrime ku kwapingi ki swa Babilunia, ai ku lakwapingi ki swa Yuda takamaungane mubere makanaelre. Kwi lalasu ngwakakai ki adeethe ki babengelradhane ki talialalai ka kadalranane, si ngukakai ki kabicelrakane ki sipusale ka raedre ki cekele ka lrawlrawdru, papia tali valrwalru Yuredange mubere.

⁸ Ai ku kwapingi ki swa Babilunia wakurisi ki talialalai ka Zidikia, la ikai dratane dethe Yeriku pwalra iniane; ku twapapalra ki Zidikia ku lakwapingi la katwasenga iniane makanaelre, si sarau mawbebere.

⁹ La pwalra iniane kwi lalasu, si iluku iniane mwa ki talialalai ka Nibukadenezere; sakamani kwidra, ku Nibukadenezere yakai Ribela talikai Hamathe, kwi lasu la ikai kwini saibange ki Zidikia.

¹⁰ Ikai Ribela, la icucubungu ki Zidikia, papacai nguelre ki lalalake ki Zidikia ku talialalai ki swa Babilunia, la mialri pakarededele papacai ki latamatama ki tarasangililuku ki swa Yuda.

¹¹ La pacungulu, ku talialalai ki swa Babilunia la malra garirungu ku maca ki Zidikia, si arakai ku lriwlu ka kicikici kerenge iniane, la alra iluku iniane mwa ka Babilunia. Si emenge pikai taememengane, pakeela ku tapacadhaneini ka vai.

Mamudu ku daane ki Tamatama

¹² Satara 19 ki sakalrima ka dramare ki samakamangeale ka vai ku taatalialaladhane Babilunia ki Nibukadenezere, ku takivagavagane ki talialalai laka kiacapili ki taradrangalrungalru ka Nibuzaradange mwadaane cekele Yerusalrime.

¹³ Kwi lasu walama ki daane ki Twaumase, si daane ki talialalai, si sanaka daane ki latabebelenge.

¹⁴ Ku kwapingini mabebetethe ki raedre ki cekele.

¹⁵ Ku Nibuzaradange ala malra kwini ki asuru ikai ki cekele ka laumawmase, ka wakusange iniane ka laumawmase, si lasialrima tuhulriu liniane ililuku mwa ka Babilunia.

¹⁶ Ai wamalra kwini ki matikukurunga ka kadrwa ku tacekecekelane ka laumawmase suru pikai Yuda, si pakauawngu liniane tubabudubudu, tuumawmawma.

¹⁷ Ku swa Babilunia watupuru ku lriwlu ka ulrudru ki daane ki Tamatama, taetale ka lriwlu, si dilrungu ka lriwlu, wamalra patueelre ku lriwlu si satedre pwa ka Babilunia.

¹⁸ Kwi lalasu la mialri iluku ku sabulabulane ki tapatarumaramarane ka kadange si yakange, kaciane ki rusuku, kisi ka tapwapwane ku erai ki waudriwdripi si patarumara, talamalamane ku sangwalreme, si sarakaikaiyane sukubu ka lalriwlu ka takaiyane.

¹⁹ Kwi lalasu la iluku ku laniarakaiyane ku kingi si gingi darepe tumakaelaeela ka takaiyane: Yakai ku tikiyane ka kisi, tapwapwane ku apwi ka lrangele, madradrau ka kisi ka tapwapwane ku erai ki sapatarumaramarane, yakange, tapikaikaiyane ku tinaki, talamalamane ku sangwalreme, si sarakaikaiyane paralikiliki ku bava ka kupu.

²⁰ Ku talialalai ka Sulumungu sa tudaane ku daane ki Tamatama ku nidarepane ku lriwlu: Drusa ka lriwlu ka ulrudru, lriwlu ka taetale, lriwlu ka dilrungu, drapale ki lriwlu ka dilrungu ka 12 ka lriwlu ka lwange; kikai la nitulawbubulane ka lriwlu ku telregane kaika amaka dulrwane tintingi.

^21-22 Ku drusa ka ulrudru ka lriwlu mararamau ku adravane; ku vaeva ku lragiane valru ka mituru, ku ngiathalringulu lrima ka mituru si tulru ka kuncunge. Ku ulrudru lulutu kabicelrakane, ku kudremelrane ki lriwlu 75 ka kunlri. Sanaka ulrudru ki lriwlu ki ringaringau yakaai ku awlru, ku abelengane drusa ka mituru si drusa ka kuncunge, la pangiraeragelane pangithalringulu ka niaralriwlane ka ami si nginanavate ka lriwlu.

²³ Sanaka ulrudru ki ringaringau belenge ki ami yakaai ku idai ku nginanavate, twalai lebe wadrele madu ku 96.

Ku laumawmase ki swa Yuda kiaravase pu Babilunia

²⁴ Ku kiacapili ki tarakadrekadrenge ka Nibuzaradange mialri ravase ki marudrange ki barakalai ka Seraia, mwasakadrusa ki kiacapili ki barakalai ka Zipania, si yakaikai ki daane ki Tamatama ka tatulru ka tabebelenge.

²⁵ Kwi lasu la pwalranga ki tangea ka abelenge ka taraililuku ki kwapingi, si asuru ikai ki cekele ki daane ki talialalai ka tapitu ka takivagavagane, ku tangea taramarasikaikai ku pacase ki kwapingi ka mwasakadrusa ki taraililuku ki kwapingi, si tamanemele ka takuciacingalre ikai ki lacekele ka laumawmase.

^26-27 Ku Nibuzaradange waalra liniane iluku mwa cucubungu ki talialalai ki swa Babilunia; sakamani kwidra, ku talialalai yakai Ribela talikai Hamathe. La ikai kwini, kwi lasu la drekase ki umawmase lrumai liniane, si papacai liniane. Miyaiya kikai, ku swa Yuda kiaravase si katwase ki cekele lini.

²⁸ Kai lebenga yai takathane ku ravase ki Nibukadenezere: Sa tarapitunga ka caili ku taitaetalaneini waravase ku ta 3,023 ku umawmase;

²⁹ satara 18 ka caili patwalai Yerusalrime ravase ku ta 832 ku umawmase;

³⁰ satara 23 ka caili, ku Nibuzaradange waravase ku ta 745 ku umawmase. Lu elrelreeanenga ta 4,600 ku umawmase.

³¹ Ku Ivile Merudake saka taatalialaladhane Babilunia kwini ki caili, kwi lasu twathariri ki talialalai ki swa Yuda ka Yehuiacingi, si pulatadre iniane ki taememengane. Ku tapiane kikai amani satara 37 ka caili saka 12 ka dramare ki samaka 25 ka vai ku takiravasane ki Yehuiacingi.

³² Ku Ivile Merudake twathariri ki Yehuiakime, si baai iniane ku abelenge ku taetalane, kwi lasu laka sabebelenge ki kiaravase mwa Babilunia ki drumane ka latalialalai.

³³ Ku Yehuiakime kiapalraingi ku mwalra mulaimai ku laimai ki kiaemenge, ku tapanianianiakaneini la kalringulringulu ki talialalai ki swa Babilunia.

³⁴ Ku talialalai la patarumara baai iniane ku saarakiyaneini cekecekele lukakaiyaiya, pakeela ku tapacadhaneini ku vai.