Yerimia 51 - Ngudradreadrekadhane Ka Sisiu 魯凱語聖經

Peaela saibange ki swa Babilunia

¹ Ku Tamatama amia kai kawriva, “Drela, kulri amudu ka valrigi lri papiaku ki Babilunia si laumawmaseini.

² Lri arakaiyaku ki maelane ka kuni amudu ki swa Babilunia, mia ki valrigi ka wapalai ki mugi. Kudra akamudane ka vai sana kela, kwini lalasu lri twalai kidruanga kainganai kikaruburu ki swa Babilunia lai lri aubulane ku kadaengane lini.

³ Kai lri maka pikai ku adulrwane ki tarakikaruburu ka kwapingi lraili, lai kai lri maka pikai liniane ku zikange ku angirarukudrane. Kai lri pacepe ku niake ki yacengecenge lini! Lri amudu patuelre ki kwapingi!

⁴ Kwi lalasu lri ikai ki cekele lini, ikai ki kadadalranane ki cekele lini kipapacai.

⁵ Ku swa Iseraylri si swa Yuda adravane pasalriu nakwane ka sanianiangenga ki swa Iseraylri, ai kwaku ka Tamatama, ka abebeelengenga ki sanaka kwapingi ka Twaumase kainaku lri cilri liniane.

⁶ Mubera, kirarimwa katwase Babilunia! Madha tupapapalra ki pasalrivaneini kamudu. Asi lwiyane kaiasasane yacengecengaku singikaikai ku naika akibilriane ki swa Babilunia pathavungu iniane.

⁷ Kai swa Babilunia takamaniane kudra mia ki yakaai ki alrimali ka kingi ka kupu, la pakabusuku ki kiacaebe ki belenge ka umawmase. Sanaka kuni lu ungulu ku bavaini amamanga.

⁸ Kikai asasane ku swa Babilunia ala pangitutuluku amaki, si kamudunga! Pasikaiya iniane tubi! La silapa ku sasulravane si cabu ki dulaini, alau lri dulrwana pawdringai iniane.

⁹ Ku yakai Babilunia ku maelane ka kuni ku laumawmase amia kai, ‘Tasulrau pawdringai amiamianga naai iniane, ai ngiabalainga. Kikai asasane ila takatwasenga, siwlri mwa ki ceekeleta! Asi lwiyane ku Twaumase pakaelrenga ku pukuini pathavungu ki swa Babilunia si pakisaalrunga amudu iniane.’ ”

¹⁰ Ku Tamatama amia kai, “Ku kawkawluli kiarararagai si iyaiya kai, ‘Ku Tamatama pasiakainga mitane pelaela ku kitupasalrivaneta vutha. Ila tamwa Ziyungu, si ikai kwini pelaelaela ki Tamatama ka Twaumaseta ku tapiane pangimia.’ ”

¹¹ Ku Tamatama pakagarange ki latalialalai ki swa Media, lri arakai liniane amudu ki swa Babilunia, lri ngipapasikai si pasikaai ki kiakabebetethe ka daane ki Tamatama bilri. Ku mabelenge ka taravelevelevele ki kwapingi wadrekase, “Twadrema kwi awlru ki lraili! La malra ku mathariri ku alathare!

¹² La pubelenge ku sapatuthingalane si pangitutuluku kikaruburu ki raedre ki cekele ki swa Babilunia! Aru dradrela ngipapadulrudulru! Si pikai ku wadadadavace dredrele ku kwapingi! Pamamwa pikai ku walepelepenge ku kwapingi!” Ku Tamatama singiakainga ku taiyaneini ku vaga kiecebe ki umawmase ki swa Babilunia.

¹³ Ikai Babilunia makalra ku vaalru, makalra ku tacekecekelane, ai ku alikaiyaneini wakelanga, ku angimianeini nikelretanenga.

¹⁴ Ku Tamatama ka abebeelengenga ki sanaka kwapingi papia ki niakeini kiketekete, ku Twaumase lri sarubu ki madrau ka kwapingi, lri mia ki apapawku kainganai kalrungulrungu, papia ki swa Babilunia kikaruburu. Kwi lalasu lri makakaraleale kiraragai ku taakaciane.

Senai ka sadrengedrengerane ki Twaumase

¹⁵ Ku Tamatama arakai ku maadrau ku pukuini bekace ki kadaengane, arakai ku lrigilane cegecege kawmasane, arakai ku thingalane paipai subelebelenge.

¹⁶ Ku Twaumase sana avavaga drekase, kai acilai subelebelenge malaliwkai; ku Twaumase patwalai ki lebe putaluvaivai ku ememe. Ku Twaumase piakai ki udale paledra ku lrikace, ku Twaumase wamalra ki valrigi si patwalai ki drawsuluini ipi pakatwase.

¹⁷ Kikai tangimiamiane ku umawmase lu kidremedreme ngiamakulrungu ka kadrwa ku thingale; ku taradarepe ki kingi masulri kudra ngipapia lini ku samiamiange, asi lwiyane kudra piaini ku twaumase kaika patengatengane, kadrwa ku niake

¹⁸ kai samiamiange kadrwa ku vai, kai mamamwa ki kakudhane ka matialrupi; ku Tamatama lu kiecebe liniane, ki lakikwini lri kiamudu patuelre.

¹⁹ Ku Twaumase ki Yakubu kaika miyaiya kai ki lasamiamiange; ku Twaumase wabekace ki sanaka manemanenga, la pilri ki swa Iseraylri tukawkawluini. Ku naganeini yai Tamatama ka abebeelengenga ki sanaka kwapingi!

Adreme ka pangulru ki Tamatama

²⁰ Ku Tamatama amia kai: Babilunia, amanisu ku madradrau ka adreme ka pangulruli, ka adremeli. Arakaiyaku muswane tatithiri ki sanaka kuni.

²¹ Arakaiyaku muswane pamaki ki latarakikaruburuburu ka rigi si tarangurigirigi, la kabebetethe ki sakikaruburuburane ka palridingi si latarakikaruburu ka kwapingi.

²² Arakaiyaku muswane papacai ki sawvalai si labaibai tarudrawdrange si lavavalake la amudu ki langukathathabarane si pathagili ngitawvaileleketane.

²³ Arakaiyaku muswane papacai ki taraagwagu si lakiu, la papacai ki tarakawaungu si tarapavilrivilringi ki lwange. Arakaiyaku muswane baburau ki sutu si latabebelenge.

Pathavungu ki swa Babilunia

²⁴ Ku Tamatama amia kai, “Swa Yuda ka laumawmase, lri dredredrele numi lu papiapiaku ki swa Babilunia si laumawmaseini bilri, asi lwiyane kwi lalasu paiya ku ngialisiane kabebetethe ka Ziyungu.

²⁵ Babilunia, amanisu kudra lregelrege ka wamudu ki kadaengane; ai kwaku ka Tamatama yai ecebanesu ka badha. Lri alraku bilibili pulebe muswane, si sadrarate, la lama pakawtu paabu.

²⁶ Ikai ki taulrakavanesu ku lrenege kai lri dulrunga arakai tukarwalai tutangadrane ki raedre. Lrika palralrawthusu anitawlrakavane. Tamatamaku; ka amia kai pelaela.

²⁷ “Pakatwasa ku sapatuthingalane ku amwane kikaruburu! Ikai ki lakuni ngirapa ku rapa ki kwapingi! Sarubwa ki sanaka kuni si papia ki Babilunia kikaruburu! Sarubwa ki Ararate, Mini, si Asekenaze ka lakuni la kainganai kikaruburu. Pilria ku kiacapili ki kwapingi, ani marasikai ki akikaruburane, apakelrekelrete ki mia ki apapawku ku kalrane ku kwapingi si rigi kainganai kikaruburu.

²⁸ Sarubwa ki sanaka kuni, si papia ki swa Babilunia kikaruburu. Sarubwa ki latalialalai ki swa Media, ki siwciu lini, tabebelenge, si lakwapingi ki tarathudane lini ki lakuni kainganai kikaruburu.

²⁹ Kai kadaengane malalingilingi manugiligili, asi lwiyane ku Tamatama paiyaiyanga ku nau pia iyaiyaini, lai atawlrakavanenga kai Babilunia, kadrwanga ku umawmase kulri ikai.

³⁰ Ku garagarange ki swa Babilunia wasararenga ku adreme lini, si kilepenge ikai adringi ki nikepalane ka cekele. Kwi lalasu kadrwanga ku garangane ku kidremedreme, mianga ki ababai ku turamurane. Ku lrawlrawdru ki cekele kiaburukunga! La kudaladalainga ku ladaane!

³¹ Ku tarakisikawkawlu padaruru ku vaga maubalribalribalrithi kainganai pelaela ki talialalai ki swa Babilunia ku takilringulane si kimucekele kimalra kwi tangadrane ka cekele.

³² Ku badha wamalranga ki tangukaikaiyane talubalre ki varukuru, la lamanga ki tasalikaikaiyane kikaruburu ka kepale. Ku tarakikaruburu ka kwapingi ki swa Babilunia kai wathingalenga ku apiane ki saukukuludru!

³³ Kai lri tarathainunga, ku badha lai lri amudu liniane; ku swa Babilunia lri mia ki lataleke ikai ki tavelavelatane kidredredre. Tamatamaku ka abebeelengenga ki sanaka kwapingi, ka Twaumase ki swa Iseraylri; ka amia kikai pelaela.”

³⁴ Ku Nibukadenezere ka talialalai ki swa Babilunia wamudu Yerusalrime. Kwi lasu mia ki watalungungu ku kindralumu ravase demedeme ki cekele, mia ki maadrau ka baralebale lrungulrungu lrede ku tacekecekelane adringi ki cekele. Kwi lasu wamalra ku nau malra iyaini, la cilri ku tedrane.

³⁵ Ku laumawmase ki swa Ziyungu lri iya kai makanaelre: Ku swa Babilunia pakwalri naiane; nai bilri nai! Ku laumawmase ki Yerusalrime lri iya kai makanaelre: Ku swa Babilunia pamwaludru ku erai nai; nai papia nai iniane kibalrithi ku erai!

Ku Tamatama lri palribulu ki swa Iseraylri

³⁶ Ngwalai kikai, ku Tamatama amia kai ki laumawmase ki Yerusalrime, “Lri pusakaiyaku muswane kawriva ku takitupasalrivanesu vutha. La pasikai muswane bilri. Lri pakadrekaraku ku tacebeane ki acilai ki swa Babilunia, lai kadrekare ku kadravane.

³⁷ Ku swa Babilunia lri atawlrakavane, lai lrika taikaikaiyanenga ki tawpungu ubulane, ka takakikiwcanenga ki laumawmase, ka cinilrianenga ka kadaengane, ka kadrwa ku umawmase ku yakaikai.

³⁸ Ku swa Babilunia lri ngimianga ki twaredededele ka raiyungu ka wagirigiringi, mia ki lalrulai ka raiyungu ka twaredededele si alealeale.

³⁹ Kwi lalasu apiakaekane? Mathariri! Nau padulru liniane ku angitalekane lini, kwi lalasu lani kabusuku, kiraragai, kasipelrenge, si palralrawthunga kai pacununga.

⁴⁰ Lri ililukaku liniane katwase kiculu, mia ki lrulai ka kiu, ka balase ka nikiubawbalane ka kiu, ka balase ka kiu mudaane ki taculuculwane. Tamatamaku; ka amia kikai pelaela.”

Angimiane ki swa Babilunia

⁴¹ Ku ngwakai ki swa Babilunia, Ku Tamatama amia kai, “Ku nilrigulrigwane ki kiacaebe ki belenge ka cekele kiamalranga! Kai swa Babilunia amaninga ku nimukulukuludrane ki sanaka kuni.

⁴² Kai laveke arwa kadrau, ku bikabiki makalrilriugu Babilunia.

⁴³ Ku lacekele aubulanenga, meamealenga ka kadaengane, aenaenai; kadrwa ku umawmase ku yakaikai, la ka kadrwa ku umawmase ku ngwakaikai lribate.

⁴⁴ Lri pathavungaku ki twaumase ki swa Babilunia ka Bile, si vutha iniane baai ku niravasane ku tacekecekelane. Ku lakuni kai lri sukubunga iniane. “Ku raedre ki cekele ki Babilunia mwakadrulunga!

⁴⁵ Swa Iseraylri! Kirimwa mubere kikwini! Mubera, mubera ki lisianeli!

⁴⁶ Madha ngwalalai ku takilalrane ku nipasasaravane ku vaga si mukuludru, kathathiburu. Luka caili tara yakaai ku makaelaela ku wakela ku nipasaravane ku vaga, malrithavulunga kai cekele, kai latangikararakacane ka talialalai maulrulrulrudru maribiribiribici iya.

⁴⁷ Drela! Lri kelanga ku vai, lri kiecebaku ki lasamiamiange ki swa Babilunia. Ki kuni palraelre lri kiarubwane makanaelre, ki kadaengane lri ngisaraade ku kinawmasane ki wapacai.

⁴⁸ Ku taraamudu ki swa dradha lu kabebetethenga ki swa Babilunia, kai belenge kawmasane lri kiraragai makanaelre si akwadradradrau senai.

⁴⁹ Kai swa Babilunia ku tapasalraelreane kawmasane kidruanga ku wapacai, kaiasasane lri ngwalai ku kalrane ku tapapacadhane ki swa Iseraylri si kisaalrunga kawtu. Kwaku ka Tamatama ka amia kikai.”

Wabaai ki swa Iseraylri ki yakai Babilunia ka vaga

⁵⁰ Ku Tamatama amia kai ki yakai Babilunia ka swa Iseraylri, “Malrabuthunga numi ki apacadhane, kaiasasane lu kirarimwa katwase, madha ukalavanga! Adravane ka wadailinga numi ki cekele, ai kunumi ngulringavaili ka Tamatama numi, si kabarengere Yerusalrime.

⁵¹ Amia numi kai, ‘Ngwalai nai ku takilalrane ku nikaelaelane tusinalreme si miakau kiatusinalrelreme, la ngulringavanenga, ngwalai ki maelane ka kuni ku tamalrane si pasalriu ki Alrivilrivi ka taikaikaiyane ki daane ki Tamatama.’

⁵² Lakamani amiaku kai, lri kelanga ku vai, lri pathavungaku ki samiamiange ki swa Babilunia; ikai kwini lri ikai kidruanga ku wadadange ku lamadula ku umawmase.

⁵³ Ku swa Babilunia adravane ka wadulru kapa musubelebelenge, si raedre tukepale, lri mialriaku sikawlu ki taraamudu katwase amudu liniane. Tamatamaku; ka amia kikai pelaela.”

Mamudu ku swa Babilunia

⁵⁴ Ku Tamatama amia kai: Kilalra, ikai Babilunia yakai ku lingau ku watubitubi; yakai ku lingau ki taraamudu ku wakela.

⁵⁵ Yacengecengaku kabebebetethe ki swa Babilunia, paidrengere ku lingau ki marivurivu ikai ki cekele. Ku kwapingi ki badha mia ki bikabiki kainganai mudaane; malalingilingi ku takaralealane lini.

⁵⁶ Kwi lalasu wakela amudu ki swa Babilunia. Ku garagarangeini kiaravasenga; ku bu lini macelranga. Amaniaku ku pathavungu ki pasalrivane ka Twaumase; lri tara bilriaku ki swa Babilunia.

⁵⁷ Lri paungulaku si pakabusuku makanaelre ki tamatama ki tarasangililuku liniane, taradrekadrekase, siwciu, tabebelenge, si lagaragarange; kwi lalasu lri apece ereke, si kai lri pacununga palralrawthu. Talialaladhaku; ku naganeli yai Tamatama ka abebeelengenga ki sanaka kwapingi, amiaku kikai pelaela.

⁵⁸ Ku swadradradrau ka raedre ki cekele ki swa Babilunia lri kiburuku adratane; ku madradrau abelenge ka lrawlrawdru lri kilama kabebetethe. Ku kwalrialrialri ki lakuni kadrwa ku paluludane patuelre; ku kwalrialrialri lini lri kilama patuelre. Tamatamaku; ka abebeelengenga ki sanaka kwapingi ka amia kikai pelaela.

Ku vaga ki Yerimia wadaruru ka Babilunia

⁵⁹ Ku agane ki Mahesia, ka lalake ki Niria ka Seraia yai taratupapapalra ki talialalai ka Zidikia. Saka tarasupate ka caili ku taatalialaladhane ki swa Yuda ki Zidikia, ku Seraia twapapalra ki talialalai mwa ka Babilunia. Sa kamani kwidra, yakai ku lapelaelali iniane.

⁶⁰ Kulri ka akipadradresengane ku amatikurwane ki swa Babilunia lukabibilrili si ngwakai ki Babilunia patuelre pinacasane pikai ki nibalrubalrulane ka hungu. Peaelaelaku ki Seraia, lu mwangasu ka Babilunia, tara malra kikai nibalrubalrulane ka hungu si akwadrau silrigu pakilalalra ki laumawmase ku tapacasane patuelre ku vaga.

⁶¹ Peaelaelaku ki Seraia, “Lumwangasu ka Babilunia, tara malra kikai nibalrubalrulane ka hungu si akwadrau silrigu pakilalalra ki laumawmase ku tapacasane patuelre ku vaga.

⁶² Ala lri inulrisu iya kai, ‘Tamatama! Nangiapapelaelasu kalri kabebetethesu kikai, lai ka palralrawthunga ka cinilriane, lrika kadrwanga ku umawmase, lai lrika kadrwa ku waudriwdripi.’

⁶³ Seraia! Lu maka silrigungasu kikai nibalrubalrulane ka hungu, malranga kikai nibalrubalrulane ka hungu apaelre ki lrenege erece, si cilri pwa ki kadravane Yuparati,

⁶⁴ ala iya kikai, ‘Ku swa Babilunia lri mia kikaai ki nibalrubalrulane ka hungu katwase muthene, si kai lri mubelengenga ipelai, asi lwiyane ku Tamatama lri papia iniane pulebe ku amatikurwane.’ ” Ku vaga ki Yerimia paliakai kikai.