Yerimia 5 - Ngudradreadrekadhane Ka Sisiu 魯凱語聖經

Pasalrivane ki swa Yerusalrime

¹ Swa Yerusalrime, katwasa dadavace salraelre ki kadalranane ki cekele numi! La pudriadringaadha drele! La mwa ki tathathathakadhane silape, la dredrele lulri maka dulru numi kidringai ku natangeanga ku madringelrese ka patengatengane ka umawmase? Lu maka kidringai numi, ku Tamatama lri pacepe ki swa Yerusalrime.

² Ngiapapasudalepe numi ka mwakuludru musakene ki Tamatama, ai ku patengatengane ngudwi sikakathane kadrwa ki kidremedreme.

³ Ku Tamatama patengatengane ka wasilasilape ku madringelrese kapatengatengane ka umawmase. Lu lrumai numiane, kainu twamanemene, lu pathavungu numiane, la kai numi ngwalai si kibulru. Twalrawnga numi kwi kawlukulane numi, si kai mubangalre katwase cilri kwi pasalrivane.

⁴ Lu kidremedremaku, kwi lalasu matiakuru ka kadrwa ku thingale ka laumawmase sikakathane; kwi lalasu kai wathingale ku kadalranane ki Tamatama, kai wathingale ku padradrekase ki Twaumase.

⁵ Lri silapaku ki tarasangililuku liniane si masususu. Kwi lalasu lri tara ka wathingale ku kadalranane ki Tamatama, lri tara ka wathingale ku padradrekase ki Twaumase. Ai kwi lalasu ngiakawlrawlravane ku puku ki Twaumase, si kai mubangalre pasalaladha iniane.

⁶ Lakamani, Ku raiyungu lri twalai ki angatungatu kainganai si lrede liniane; ku tawpungu ubulane lri twalai calragulragu kainganai si baburau liniane; ku lrikulau lri ngithalringulu ki cekele lepenge liniane; ku aneane ku mwalatadre, lrika aneeane ku kiababurau. Asi lwiyane kwi lalasu apapelaela katwase si cilri ki Twaumase; kwi pasalrivane lini kaika amaka asiasipane.

⁷ Ku Tamatama ngiaka kivaga: Anau ngithanga pacepe ku tapasalrivane ki kawkawluli? Kai lalasu matwasenga nakwane si katwase sukubu ki kaika patengane ka twaumase. Pakabucukaku liniane, kai lalasu la katwase pasalriu ki sawvalai si ababai, la karedededele katwase silape ki pairairange.

⁸ Kai lalasu mia ki amani kwidra mabucuku ka rigi la katwase mwa kidruanga, vavavangalre ki taelrelre ki palrapalra.

⁹ Kainaku lri ngwalai kikai si pathavungu liniane? Kainaku lri bilri kudra miyaiya kai ku kuni?

¹⁰ Lri dawlaku ki badha si amudu ku babudubudu ki kawkawluli, ai kainaku lri pakisalru kabebetethe. Lri pacalrigaku pulebe ku ricingi ki angatu ki budu, asi lwiyane kikai laricingi kaika nakwanenga.

¹¹ Kai swa Iseraylri si swa Yuda wabaebalrenga nakwane. Tamatamaku ka amia kikai pelaela.

Ku Tamatama wacilri ki swa Iseraylri

¹² Ku kawkawlu ki Tamatama kai wathingale iniane. Kwi lalasu amia kai, “Ku patengatengane ku Tamatama kai lri thethengete naiane. Ku amatikurwane kai lri kela naiane, ku amakaruruburane si silravane lai kai nai lri kipadradresenge.”

^13-14 Kwi lalasu la iyana kai, “Ku yuginsia lu kawriva wabusabusabusu; kadrwa liniane ku vaga ki Tamatama.” Lakamani ku Tamatama ka abebeelengenga ki sanaka kwapingi amia kai nakwane, “Yerimia, kikai laumawmase kudra amianga kikai kawriva, kai vagali lri pwaku ki ngudwisu. Kai vagali mia ki apwi, kai umawmase mia ki angatu; ku apwi lri lama utu liniane.”

¹⁵ Swa Iseraylri! Ku Tamatama lri patwalai adaili pakainganai ku vaeva ka kuni si lri kela kikaruburu numiane. Kikai kuni sinawladhane ku lrikisi lini, magarange turamuru; ku vaga lini kai numi lri thingale.

¹⁶ Ku tara lrailraili liniane garagarange makanaelre ka tara kikaruburu, kai wakedrakedrape ku maca lu papacai ki umawmase.

¹⁷ Kwini lalasu lri kane ku lataleke numi; kwi lalasu lri papacai ki lalalake numi, si culu ku lakiu si lalwange numi; kwi lalasu lri kane eleme ku budu si icizike numi. Ku kwapingi lini lri buruku ki satalutalu numi ka raedre ka kepale ki cekele numi.

¹⁸ Ku Tamatama amia kai, “Adravane ikai kwini ki amatikurwane, kai nau lri amudu demedeme ki kawkawluli.

¹⁹ Yerimia, alaiyasi kivaga kwi lalasu ani tungimiyaiya kikai mitane iya, pelaela liniane, amani sa katwase numi si cilri nakwane, la ikai numi ki kuni numi pasikaikai ki drumane ka twaumase, lakamani kwi lalasu lri acaicali mwa ki maelane ka kuni, si pasikaikai kaungu ki maelane ka kuni ka umawmase.”

Ku Twaumase pakiapapawlringau ki kawkawluini

²⁰ Ku Tamatama amia kai, “Pelaela ki mwabaibalrithi ki Yakubu, la papia ki laumawmase ki swa Yuda pelaela:

²¹ Kunumi ka makulrungu ka kadrwa ku thingale ka laumawmase, kicacaligira kilalra! Yakai kwi maca numi, ai kai numi maka wadrele; yakai kwi calringa numi, ai kai numi maka kialalra!

²² Kwaku ka Tamatama nau kivaga numiane: Anu kai mukuludru musakene nakwane? Ikai cucubungu nakwane, anu kai ukuludru? Paswatelradhaku ki aenaenai tupagisane ki laveke, ku laveke kai lri maka lribate kai ki pagisane. Adravane ka lriau ki acilai ki laveke kai lri dulru lribate; ku bikabiki ki laveke kai lri maka buruku.

²³ Ai kunumi ka laumawmase ka makelrathe si lawabaebalre! Kunumi wabaebalrenga numi nakwane, wacilringa numi nakwane.

²⁴ Adravane singikaiyaku ki kalamanemanane patarumara baai numiane ku udale ki kalarigarigane kalalidrarane, si picaili pangukalra ku taleke numiane, kadruana ku tamusakenane numi si mukuludru nakwane ka Tamatama ka Twaumase numi.

²⁵ Kwini pasalrivane numi pakalrithavulu ki udale si valrigi; kwini pasalrivane numi lri kamani ku kai pakiataleke numiane.

²⁶ “Ku manganga ka umawmase yakai ki kawkawluli. Kwini lalasu watukutukulru ku akabebetethane lini ki umawmase, mia ki tarapwalralra ki adhadhame ka pwaami.

²⁷ Ku daane lini pakaabatenga ku nikupawpane, mia ki taraalwalupu ka paswaetenga ku pana lini pikai ki rumuku. Lakamani, kwi lalasu yakai ku paisu yakai ku puku,

²⁸ la kabitulru elelethe. Kwi lalasu paramuru ku ngangane, kai pwasakaikai ki lapakulrulrulu, kai sakaikai ki matiakukuru kawriva.

²⁹ “Lakamani, kwaku ka Tamatama lri ngwaladhaku kikai si pathavungu liniane; lri bilriaku kai ki miyaiya kai ku kuni.

³⁰ Ikai kai ki kuni la pacebe ku miyaiya kikai ka matiaukuludru si matiasamali!

³¹ Ku yuginsia atavuvulrucane sikakathane; ku barakalai ngiapapasikaikaai ribici ku puku si akaesadhane sikakathane; kai kawkawluli la kai balrebalre. Ku apathavungane ku vai sana kela, lai lri tumane kwi lalasu?”