Yerimia 49 - Ngudradreadrekadhane Ka Sisiu 魯凱語聖經

Ku Tamatama wasaibange ki swa Amune

¹ Ku ngwakai ki swa Amune, ku Tamatama amia kai, “Ku lasawvalalai ki swa Iseraylri yakai inu? Bekace ka kadrwa ku umawmase ku palribulu ki kadaengane lini? Ani pakamani ki lawasukusukubu ki Muleku ku wadrikisi ravase ki kadaengane ki swa Gade ka zuku, si sutelrai ikaikainga kwini?

² Drela, lri kelanga ku vai, kudra yakai Raba ka madradraunga ka cekele ka swa Amune lri kilalra ku lingau ki makakaralealeale itamakakaruburane. Ku Raba lri atawlrakavane, ku lacekeleini kialama amudu. Ku swa Iseraylri ala lri patwalai ki alrima ki wadrikisi liniane sawlri malra ku kadaengane lini.

³ Swa Hesebunge, tubia karaleale, asi lwiyane ku cekele Ai mamudunga! Laababai ki swa Raba, tubia! Silaimadha ku kaimadhane si kalreme, ikai ki malrithavulu la mwa kidruanga mupungupungu! Ku twaumase numi ka Mulece si labarakalaini, latarasangililuku lri kipakarededele kiravase.

⁴ Wabaebaebalre ka laumawmase, anu ngikalrilrilriigu? Ku puku numi arwa sulusuludru; anu ngithanga satalu ki puku numi miakau kadrwa ku umawmase kulri thuru kainganai kikaruburu mucekele?

⁵ Lri thalringulaku numiane ku ukuludrane, lri mawbebere numi makanaelre. Lri ngikakalikaalithinga numi ku auberane sikakathane, kadrwa ku umawmase kulri dulru sarubu kudra ki laamaki ku lakwapingi si tupela tukwapingi.

⁶ “Ai, lri kela ku vai, lri pasiwlriwlriaku ki swa Amune tucekele. Tamatamaku; ka abebeelengenga ki sanaka kwapingi amiaku kai pelaela.”

Ku Tamatama wasaibange ki swa Idume

⁷ Ku ngwakai ki swa Idume, ku Tamatama ka abebeelengenga ki sanaka kwapingi amia kai, “Ikai Idume kai maka kiadringainga ku lrigilane? Ikai liniane ku malrigili ulecege kai lri maka pelaelanga liniane ku apiane ku awngane? Maulrawnga ku lrigilane lini?

⁸ Swa Didange, ngibangula si mubere! Kilepenga! Asi lwiyane wadarurunga ku apathavunganeli ki mwabaibalrithi ki Isau; lri amudaku liniane!

⁹ Lu kibudu ku umawmase lri suru ku bekeelanenga pikai ki cebe; lukamaungu lai lri kainganai ku tarakupawpa, lri kupa ku nau malra iyaini.

¹⁰ Ai lri kulrangicaku patuelre ki mwabaibalrithi ki Isau, si padrelane ku taikaiyaneini kilepenge, lai lri kai dulrunga kilepenge. Ku swa Idume si laretesane, pasiagiagisi lini kiamudu makanaelre, kadrwa ku natangeeanga ku asuru.

¹¹ Ku lapakulrulrulu numi ta badhaili, lri lapwaku liniane; ku lawalibakane ta badhaili pasirapale.”

¹² Ku Tamatama amia kai, “Drela, alaiyasi kudra nakai lri kipathavungu ka umawmase la ungulu makanaelre ku sapathavungane ka kupu, kunumi lri dulru numi kai kipathavungu? Kai lri maka dulru! Lri tara ungulu numi kikai yakupwane.

¹³ Nangiakaketeketenga naku iya kai, ku cekele Buzera lri aubulane, lrika taukulukuludranenga ki umawmase, kitusinalrelrelreme, ka takipusupusuanenga. Ku ngwadadethe ku lacekele lrika palralrawthunga atawlrakavane. Kwaku ka Tamatama ka amia kikai.”

¹⁴ Amiaku kai, “Idume, patwaladhaku ki Tamatama tarumara ku vaeva ku vaga. Ku Twaumase siakawlu ki sasiakawlu mwa ki lakuni, pasarubu liniane ki lakwapingi, padulru ku akikaruburane muswane.

¹⁵ Ku Tamatama lri pakabalrithi muswane ka titikiyanenga turawraamurunga ka kuni; kadrwa ku umawmase kulri tukucingalre muswane.

¹⁶ Ku ngikalrilrigwanesu watavuvulrucunga muswane. Ku patengatengane, kaisu ka ngimiyaiya kudra takidremedremanesu ka matiamukuludru. Adravane ka yakaikaisu ki abebeelengenga ki lregelrege ki tukadrane; adravane ka miyaiyasu ki takanga ka piakai ki abeelenge tulisisuku, ku Tamatama lri mialri alra bilibili muswane pulebe. Ku Tamatama amia kai pelaela.”

¹⁷ Ku Tamatama amia kai, “Ku swa Idume lri kipadradresenge ku matiaukukuludru ku akiamudane; sanaka walribate ku umawmase lri kakiucu makanaelre, si kisidrekase kicilri.

¹⁸ Kunadruma kiakabebetethe kilama ku swa Sudume, swa Gumura, si ngiathalringulu ka lacekele, ku swa Idume lri mialri ka thadaalrane kikabebetethe, kai lri ikainga ku umawmase kulri ikai. Tamatamaku; ka amia kikai pelaela.

¹⁹ Drela, mararaamau ki raiyungu ka twalalai ki angatungatu thili kadravane Yuredange, kela ki masaleese ka ububulane, thadaalrane, lri aru padethaku, vutha ki swa Idume pangitutuluku katwase mubere ki kadaengane ki kuni lini. Ku pilrili kulri rathudu lai lri rathudu kai ki kuni. Aneane kulri dulru kiramau nakwane? Aneane kulri lreme kiecebe nakwane? Aneane ku tararathurathudu kulri lreme baebalre nakwane?

²⁰ Lakamani, kunumi yai kilalra kai apianeli: Lri kiecebaku ki swa Idume, lri madradresengaku ki umawmase ki cekele ki swa Temange. Adravane ka lavavalake lini lri kibilibili kililuku, lri kakiucu makanaelre.

²¹ Lu mukadrulu ka Idume ku elrange lri tedreteedrese kai kadaengane, ku lingau ki mathathiburu si tubi lri daruru ka laveke Suize.

²² Drela, ku badha mia ki takanga ka wapaipai ku sapakepake, kirarimu ciwgailri papulelebe si garawcu ki Buzera. Kwini ki vai, ku lagaragarange ka kwapingi ki swa Idume lri mia ki kiangeangeeange kalri tulalake ku thathiburane.”

Ku Tamatama lri saibange ki swa Damasekuse

²³ Ku ngwakai ki Damasekuse, ku Tamatama amia kai, “Ku laumawmase ki cekele Hamathe si Arepade mathekelre kai kasulivalivate, asi lwiyane kialalra ku malisi ku wakela ku vaga. Ku thekelrane lini mia ki wabikabikaabiki ka laveke, kwi lalasu la kai kasulivalivate.

²⁴ Ku swa Damasekuse maulrawnga ku garangane ki kidremedreme lini, la ngibangulu mubere. Kwi lalasu mia ki lri tulalake ka kiangeangeange, ku sakwalrialri ki thekelrane lu keela inu.

²⁵ Kikai natakirararagadhane ki umawmase, kimatikaikai ka cekele, kikainga matiaseepelenga turamuru.

²⁶ Ikai kai ki cekele ku layacengecenge lri ikai ki lakadalranane ki cekele kipapacai; ku lakiakaruburu ku lakwapingi makanaelre lri ivaivaai kipapacai.

²⁷ Lri ara apudhaku lama ki balingibingi ki cekele ki Damasekuse, si kabebetethe ku kepale ki cekele ki talialalai ka swa Bine Hadade. Tamatamaku ka abebeelengenga ki sanaka kwapingi, amiaku kikai pelaela.”

Wasaibange ki zuku ka Kidare si cekele Hazure

²⁸ Ku ngwakai ki zuku ka Kidare si cekele Hazure si ngiathalringulu ka lacekele ka kiapamaki ki Nibukadenezere ka talialalai ki swa Babilunia, amia kai ku Tamatama, “Ngidrakala, si katwase kikaruburu ki swa Kidare, la amudu ki swa tali talrawane ka lacekele!

²⁹ Ravasa ku daane ka balrawbau si lakiu lini, la malra iluku ku make ki balrawbau si yakai adringi patuelre. Iluka ki lalrakeda lini, la pelaela liniane, ‘Ku matiaukukuludru ngiathalringulu numiane!’

³⁰ “Swa Hazure, kwaku ka Tamatama lri pakipapawlringavaku numiane, mubera! Mubera mwa adaaili, si kilepenge! Ku Nibukadenezere ka talialalai ki swa Babilunia apadrekadrekasenga kalri kikaruburu numiane. Kwi lasu amia kai,

³¹ ‘Ila, ila takikaruburu kwidra ki la masulivalivate ka kadrwa ku akwalriane kidremedreme amiamia kudra ki laumawmase! Kwi cekele ki lalasu kadrwa ku saelelebane ki cekele, laka kadrwa ku sadrukudrukurane, kadrwa ku nipadulrwane ku satelengane ki badha ku namaneemanenga.’

³² “Alra ribici si iluku ku lalrakeda si lalwange lini patuelre! Lri pathirakupaku papia kidruanga kudra ki lawakaciane tuedreekane ku isiu ku laumawmase; lri patwaladhaku ki ngiathalringulu pulebe ku amatikurwane baai liniane.

³³ Ku cekele Hazure lrika palralrawthunga ka tawlrakavane, lri adaane ki latawpungu ubulane, kadrwa ku umawmase ku yakaikai. Tamatamaku; ka amia kikai pelaela.”

Ku Tamatama wasaibange ki swa Ilame

³⁴ Sa pathagithagili atalialalai ki swa Yuda ku Zidikia, ku Tamatama ka abebeelengenga ki sanaka kwapingi papia nakwane matikai ki ngwakai ki swa Ilame.

³⁵ Ku Tamatama ka abebeelengenga ki sanaka kwapingi amia kai, “Lri celraku ku bu si lraili amani ku makuciacingalrenga ka adreme ki swa Ilame.

³⁶ Lri patwaladhaku kidruanga ku valrigi si papia valrigi ki swa Ilame, la pathirakupu papia kidruanga ki lakawkawluini, ikai kidruanga ki lakuni lri ikaai ku lamwabere kwini.

³⁷ Lri pamukuludraku ki swa Ilame kudra ki lakiasanu papacapacai liniane ku badha. Lri ikaiyaku ki elathaneli si amudu ki swa Ilame, arakai ku makaruruburane pakisaalru amudu liniane.

³⁸ Lri mwalraku amudu ki talialalai si latabebelenge lini, ikai kwini cegecege ku taetalaneli.

³⁹ Ai lri ikai ku vai, ku apasiwlrianeli tucekele ki swa Ilame. Tamatamaku; ka amia kikai pelaela.”