Yerimia 48 - Ngudradreadrekadhane Ka Sisiu 魯凱語聖經

Takamudane ki Muabe

¹ Ki ngwakai ki swa Muabe, ku Tamatama ka abebeelengenga ki sanaka kwapingi, ka Twaumase ki swa Iseraylri amia kikai: Ku swa Nibu kiapadradresenge ku amatikurwane; atawlrakavanenga! Ku swa Kiriathaime kiatusinalrelreme, kiadrikisinga kimalra. Ku tasakaiyane kikaruburu kiaburuku, ku laumawmase kiatusinalrelreme.

² Ku ledra ki swa Muabe maulrawnga. Ku badha wamalranga Hesebunge, si madrekadrekadrekase ku amudane ki swa Muabe. Ku Mademingi lri kidredrepete, kai maka avavaga; ku umawmaseini lri kikurisi ki lrabu.

³ Ku laumawmase ki Hurunaime akwadrau tubi: Matiasepelenga, mamudunga!

⁴ Ku swa Muabe mamudunga; ku lingau ka tubi ki lavavalake wadaruru ka Zuare.

⁵ Ikai sawdradradha mwa ka Luhithe, kialaalra madu liniane lu aemememekane tubitubi; ikai sawlrawlrawdru lu mwane ka Hurunaime, wadulru madu kilalra lu dadange ki sakwalrialri.

⁶ Kwi lalasu watawtau: Mubera, kirimwa mawbebere! Mia ki yacalragulragu ka yaubulane ka ruba mubebere!

⁷ Swa Muabe, nasatalusu ki puku ki kwapingisu ki tacekecekelanesu, kaiasasanenga, lri mialrisu kalri kiruthukunga. Ku twaumasesu ka Kemuse lri acaicali; ku labarakalaini, latabebelenge lri mialri kipakarededele kiravase.

⁸ Ku lacekele lri kiamudu patuelre, kadrwa ku navaevanga kulri asuru; ku valrwalru lregelrege lri kidredredrenga kikabebetethe, ku dratane lri kidredredrenga. Tamatamaku; ka amia kikai pelaela.

⁹ Cegecega ku nagane ku takidralrekane ki swa Muabe; kwini cekele kai lri tarathainunga lai lri kiamudu. Ku lacekeleini lri atawlrakavane, lrika kadrwanga ku umawmase kulri ikaikai. (

¹⁰ Ku kai savaeva ku kidremedreme pia ku awngane ki Tamatama ku umawmase lri kipusu! Ku kai wavidrividri ku dramu papacai ki badha ku umawmase lri kipusu!)

Ku lacekele ki swa Muabe kiapakamudu

¹¹ Ku Tamatama amia kai, “Twalai ku tacegecegane ki kuni, kai Muabe masulivaliivate kadrwa ku kwalrialri, kaiyana kiaravase. Kai Muabe mia ki bava ka kiacelrepe pikai ki kindralumu, si kai kigugugu, kawlainga ka tasangulreemane, kai akabalribalrithi ku sangulremane.

¹² “Drela, lri kelanga ku vai, lri sikawlaku ki umawmase si gugu cilri ki Muabe, mia ki wagugu ku bava. Kwi lalasu lri gugu talungungu ku kindralumu, si cilri cacwake ki tabavane ka kindralumu.

¹³ Kai swa Muabe lrika kadrwanga ku salrwane lini ki twaumase ka Kemuse, mia ki swa Iseraylri ka kadrwanga ku salrwane lini ki satalutalu lini ka twaumase ka Bithele.

¹⁴ Swa Muabe, anu ngitatu garagarange? Anu ngitatu magarange kikaruburu ka kwapingi?

¹⁵ Kai swa Muabe si lacekeleini atawlrakavanenga; ku lavavavalake ka tagagagaarangenga ka kwapingi kiamudunga. Talialaladhaku; ku naganeli yai Tamatama ka abebeelengenga ki sanaka kwapingi, Amiaku kikai pelaela.

¹⁶ Ku alikaiyane ki swa Muabe wadethenga, lri atawlrakavanenga.

¹⁷ Kunumi ka ngwadadethe ki swa Muabe ka lakuni, Ku kialalranga ku takimatikaiyaneini ka laminzuku, Lri tubi numi si iya kai: Kudra waelrelre ku puku si rathudu mwakadrulunga! Ku matipathimithimaneini si lriguini maulrawnga!

¹⁸ Kunumi ka yakai Dibune ka laumawmase, twaladha ki lrigu ka taetalane numi kainganai mulebe, la nene ikai ki thuvugu ka dae! Kulri amudu ki swa Muabe wakelanga; kwi lasu mabebetethenga ki tasalikaiyane kikaruburu ka kepale ki cekele Muabe.

¹⁹ Laumawmase ki Arure, lri acegecege numi ikai thili ki kadadalranane si dredredrele, la kivavaga kwini ki lamwabebere ka laumawmase, watumane iya?

²⁰ Kwi lalasu lri tubalre: Kai swa Muabe matialrwalrumale amakinga! Pasikaia iniane tungawngau tubi! Kunumi ikaiya thili kadravane Arenunge pelaela: Ku swa Muabe mamudunga!

²¹ “Ku asaibangane wakelanga kai ki lacekele dratane, amani kai: Hulungu, Yazare, Mipathe,

²² Dibune, Nibu, Bithe Dibelathaime,

²³ Kiriathaime, Bithe Gamule, Bithemiungu,

²⁴ Kiriuthe, si Buzera. Ku asaibangane wakelanga ki ngwadadethe si ngwadadaili ki swa Muabe ka lacekele.

²⁵ Ku puku ki kwapingi ki swa Muabe kiatatithiringa, ku elrelreini ku puku kiakabebetethenga. Tamatamaku; ka amia kikai pelaela.”

Ku swa Muabe kiatusinalrelreme

²⁶ Ku Tamatama amia kai, “Kunumi yai paungula pakabusuku ki Muabe, asi lwiyane ngiatatwadrau, wabaebalrenga nakwane. Kwi Muabe lri ngisaisalriti ikai ki sanguputaneini, lai lri kimawlralrakai ki laumawmase.

²⁷ Muabe, pwalringawanasu namwalralrakaisu ki swa Iseraylri, sana matikaiyane liniane, wavetevete kwi awlrusu, si tunipwalrane ka sadre kwi lalasu?

²⁸ “Swa Muabe! Lri mubere numi katwase ki cekele, si katwase ikaikai ki barungulu lregelrege! Mia ki tavagu ka yakai ki maecebe ki valru ka alrisapesape tulisisuku!

²⁹ Kai Muabe ngiakalrilrigu turamuru. Kialalranga naku ku ngiakalrilrigu turamuru amia liniane, wacapange ngitatwadrau, mia ki sanianiangenga!

³⁰ Kwaku ka Tamatama wathingalaku ku diracane lini. Ku patengatengane, kwini ngikalrilrilrigu lini kadrwa ku patengatengane patuelre, ku piapia lini patuelre kadrwa ku tangadrane.

³¹ Lakamani, Lri pasikaiyaku ki swa Muabe si swa Kire Hirise tubi.

³² Lri pasikaiyaku ki swa Sibema tubi, ka pakilrialringau ku tatubianeli ki swa Yazere. Cekele Sibema, miasu ki vaeva ka cebe ki budu, ku ricingi walribate ki Titimwane ka laveke, la dawdau mwa ka Yazire. Ai, ku taraamudu mabebetethe ki madrusu ki kaladralrangedrangane si budusu.

³³ Ku takalrangeane ku kadaengane ki swa Muabe kai lri ikainga ku lingau ku kiarararagai. Lri kainaku pamwaludrunga ku mathariri ku bava ki tapepeane tubava; ikai kwini lri kai ikainga ku umawmase ku kiarararagai pepe tubava.

³⁴ “Ku swa Hesebunge si swa Ilriale maralealeale tubitubi. Ku lingau ki tubi lini wadaruru ka Yahaze; kialaalra ku swa Zuare, adravane ka swa Hurunaime si swa Igelathe Selisiya kialaalra makanaelre; asi lwiyane adravane ka acilai vaalru Nimerime madrekare.

³⁵ Lri ruthukaku ki swa Muabe lu ikai tapatarumaramarane si patarumara ku Lama ka lrisi, ku kaika alamane ku sangwalreme ki latwaumase lini. Tamatamaku; ka amia kikai pelaela.

³⁶ “Kai kidremedremeli atalingikaiyane ki swa Muabe si swa Kire Hirise tubi, mia ki umawmase ka arakai ku bulalri silringau, asi lwiyane kwi lalasu kudra pikaai lini patuelre kiasaalrunga.

³⁷ Kwi lalasu wakiritinga makanaelre ku awlru, si kaciane ku ngisingisi. Kwi lalasu ngiadadula ku alrima, la silaimai ku kaimadhane.

³⁸ Ikai ki swa Muabe sanaka daane ku talrugulrugane si kalatadrane, liingawnga ki watubitubi; asi lwiyane wacacwakaku ki swa Muabe, mia ki waciilri cwake kudra kadrwa ku umawmase ku mwarikai kwini didilrungu.

³⁹ Akwadrava tubi, ku swa Muabe kiacacwakenga! Ku swa Muabe kiatudreadrekasenga! Ku swa Muabe atawlrakavanenga; ku ngiathalringulu ka lakuni mwalralralrakai iniane makanaelre. Tamatamaku; ka amia kikai pelaela.”

Kadrwa ku kadalranane mubere ki swa Muabe

⁴⁰ Ku Tamatama amia kai, “Lri ikai ku kuni kulri mia ki takanga paipai ku sapakepake, la makakaai ciwgailri garawcu ki Muabe,

⁴¹ si drikisi ravase ki lacekele si tasakaikaiyane kikaruburu. Sakamani kwidra, ku la tarakikaruburu ka kwapingi ki swa Muabe mia ki twalalalake ka kiangeangeange kathathiburu.

⁴² Ku swa Muabe lri kikabebetethe, kai lrika kuninga, asi lwiyane kwi lasu ngiatatwadrau, wabaebalrenga nakwane.

⁴³ Ku matiwkuludrane, lrubange, thingulru mwakalavalava ki swa Muabe. Tamatamaku; ka amia kikai pelaela.

⁴⁴ Ku kiasanu mubere ki matiaukuludru, lri mulrubangane; lu tabelenge ki lrubange, lri kiputhingulrane; asi lwiyane kwaku ka Tamatama wakelretenga naku ku vai ku apathavungane ki swa Muabe.

⁴⁵ Ku lakiadulrunga ka laumawmase kiasanu mubebere mu Hesebunge si kitubi ku akipalribulane, ai, kikai cekele ka narathudu ki Sihunge ka talialalai aabunga kawtu. Ku apwi walamanga utu ki tasakaiyane kikaruburu si kepale ki cekele ki swa Muabe.

⁴⁶ Ku swa Muabe kiakelanga ki amatikurwane! Ku wasukubu ki twaumase ka Kemuse kiasalrunga! Ku lalalake lini kiaravase si kiiluku.

⁴⁷ “Ai, lri ikai ku vai, kwaku ka Tamatama lri pasiwlriwlriaku ki swa Muabe tucekele.” Kudra patharukai ki asaibangane ki Tamatama ki swa Muabe paliakai kikai.