Yerimia 47 - Ngudradreadrekadhane Ka Sisiu 魯凱語聖經

Patharukai ki Pelisitine ka vaga

¹ Sa kaiyana kikaruburu ki swa Gaza ku talialalai ki swa Izipiti, ku Tamatama papia nakwane matikai ki ngwakai ki Pelisitine.

² Ku Tamatama amia kai: Drela, kai acilai vaalru tali dradha arwa kadrau, si bawbawnga lriau. Kai lriau lri telebe ki kadaengane si yakai kwini patuelre, lai lri lrenepe ki cekele si yakai ki cekele ka laumawmase. Ku laumawmase lri karaleale ku akipalribulane; makanaelre ku yakai kwini ku laumawmase lri tubi karaleale.

³ Kwi lalasu lri kilalra ku lingau ki drapale ki larigi, ku lingau ki sakikaruburuburane ka palridingi, si lingau ki tangipalridingane! Ku alrima ki tama mamameelre ka kadrwanga ku puku, kai maka siarapalenga ki lalalakeini.

⁴ Ku akiamudane ki swa Pelisitine ku vai wakelanga; kulri kela paralubu amudu ki Tayre si Sidune ku vai wakelanga. Tamatamaku kalri amudu ki swa Pelisitine, la amudu ki twalai Kerete ka kabicelrakane ki laveke ki ngwababiabila ki laveke ka lanisurane ka umawmase.

⁵ Kai swa Gaza swaete ku watubitubi; ku swa Asekelungu matisesepele ka kadrwa ku lingau. Kai abalu ki swa Pelisitine lri tara thainwana daange?

⁶ Lri akwadrau numi kawriva: Dramu ki Tamatama, lri tarathainusu vidrividri si ala idrengere? Sawlria kwi dramu putawbubane, paisadra iniane!

⁷ Ai lri pavidrividraku iniane si calrigi, lri tumane idrengere si kai ngivelevele? Wadrekasaku iniane calrigi papacai ki swa Asekelungu, papacai ki laumawmase ki yakai ki ngwababiabila ki laveke.