Yerimia 46 - Ngudradreadrekadhane Ka Sisiu 魯凱語聖經

Ku swa Izipiti yakai Cacimise amaki

¹ Ku Tamatama papia nakwane matikai ki ngwakai ki lakuni.

² Ku ngwakai ki swa Izipiti: Ku Twaumase matiakai ki kwapingi ki Niku ka talialalai ki swa Izipiti, sa tara supatenga ka caili ku taatalialaladhane ki swa Yuda ku Yehuiakime, kiapamaki ki Nibukadenezere ka talialalai ki swa Babilunia ikai Karekemise ka wadethe Yuparati kadravane. Kwi lasu amia kai:

³ Ku mabelenge ki kwapingi ki swa Izipiti wadrekase: Padulrwa ku alathare! Ngirarukudra si kikaruburu!

⁴ Pwa erece kwi sangurigirigiane, si ngurigi ki sakikaruburuburane ka rigi! Siwga pudriadringai, si sitalrupunu kwi adreme ka tagurungu! Twadrema kwi idiri si lrabu, si silaimai kwi sakikaruburane ka laimai!

⁵ Ai, ku Tamatama kiavaga: Manemane kwi dreleli? Kwi lalasu mwakuludru si aru papulrilrikudru; kwi kwapingi lini amaki, si thirakupu mawbebere, kai walreme paswalrikudru. Ki ngiathalringulu matiaukukuludru!

⁶ Kudra mariaridarenga lailai lri mialri kai maka lailai mubere; adravane ka tarakikaruburu kai lri maka mubere. Ikai tali dradha, thili kadravane Yuparati, kwi lalasu amaakinga.

⁷ Aneane kwini mia ki Nile kadravane aru kadrau ku acilai? Ku mia ki kadravane lriau aneane?

⁸ Swa Izipiti ku mia ki Nile kadravane aru kadrau ku acilai, mia ki kadravane lriau. Ku swa Izipiti amia kai: Lri aru kadravaku lrenepe ki kadaengane; lri amudaku ki lacekele, papacai demedeme ki laumawmase.

⁹ Ku tarangurigirigi aswala kikaruburu, ku tarakikaruburuburu ku palridingi pangiatutuluku kikaruburu! Pakatwase ku mapaangale ku kwapingi kikaruburu: Ku swa Kuse si swa Pute wailuku ku alathare; ku swa Lidia waecenge ku bu si lraili.

¹⁰ Kikai yai vai ki abebeelengenga ka Tamatama ka abebeelengenga ki sanaka kwapingi: Kaikameane, ku Twaumase lri bilringa; kaikameane, ku Twaumase lri pathavungu ki badha. Ku lrabuini lri kabucukunga ku beate ki badha, si vesevese ku erai ki badha. Kaikameane, ku abebeelengenga ka Tamatama ka abebeelengenga ki sanaka kwapingi lri ikai tali dradha thili kadravane Yuparati, si malra ki badha tusapatarumarane.

¹¹ Swa Izipiti, mubelenga mwa ka Gileade, mwa kwini silape ku sasulravane! Kwi sasulravanesu patuelre kadrwa ku paluludane; kadrwa ku mathariri ku sasulravane kulri dulru pawdringai muswane.

¹² Ku lakuni kialalra ku takiarubwananesu; kai kadaengane waelraelrange kwi karalealesu. Ku kwapingi si kwapingi mapapungupungu; tara amaaki kadadula.

Ku Nibukadenezere wakela kikaruburu

¹³ Ku Nibukadenezere ka talialalai ki swa Babilunia sa kikaruburu ki swa Izipiti, ku Tamatama kawariva nakwane. Amia kai:

¹⁴ Ikaiya ki lacekele ki swa Izipiti pelaela, ikaiya Migedule, Mimepise, si Tapanese pelaela: Ngidrakala, si padulru ku akikaruburane! Ku apwi ki tamakakaruburane lri amudu muswane patuelre.

¹⁵ Kwi Apise ka madradrau ka twaumase numi ka lwange ani mukadrulu? Tamatama ka wakadrulu iniane!

¹⁶ Ku kwapingi numi masuburunga kamudu. Kwi lalasu maiyaiya kai: Ngidrakala! La siwlri mubalriu! Mwa ki sakacekele, si kidaili ki dramu ki badha!

¹⁷ Sunanagana ki talialalai ki swa Izipiti! Pasi: Tasakalrabuthane ku mathariri ka busabusu ka talialalai.

¹⁸ Talialaladhaku; ku naganeli yai Tamatama ka abebeelengenga ki sanaka kwapingi. Lri papiaku ki takapalralrawthaneli panianiake kiketekete: Ku wakela kikaruburu ku kwapingi ki Nibukadenezere lri mia ki lregelrege Tabure lriibate sanaka lalregelrege, si watete ikai belenge ki laveke ka lregelrege Karemele.

¹⁹ Swa Izipiti, pudriadringadha erece kwi amece, padulru ku amuberane! Ka Mimepise lri atawlrakavane, ka kadrwanga ku yakai ku umawmase ka ubulanenga.

²⁰ Kai swa Izipiti mia ki vaeva ka maricuru ka tina ka lwange, la kimwa ki twalai tali dradha kainganai ngipalai ka ararekese.

²¹ Ku pasiakai iniane ku kwapingi mia ki yatalwangane ka latatitiki karicuru ka lwange, matwase mubere patuelre, kadrwa ku walreme kikaruburu. Ku amatikurwane ki lalasu ku vai wakelanga; ku akipathavungane ki lalasu ku vai wadarurunga!

²² Sa padethenga ku badha, Izipiti mawabebere, mia ki sulrau sirisiriki. Ku kwapingi ki badha arakai ku kumugu pulebe iniane, mia ki tarapulebelebe ki angatu ka pwalebe ki angatu,

²³ kabebetethenga ki angatungatu. Ku kwapingi lini makakalra ki apapawku, kaika amaka asiasipane.

²⁴ Kai swa Izipiti kiatusinalrelreme turamuru; kiapamaki ki twalai tali dradha ka laumawmase Kwaku ka Tamatama amiaku kikai pelaela.

²⁵ Ku Tamatama ka abebeelengenga ki sanaka kwapingi, ka Twaumase ki swa Iseraylri, amia kai, “Lri pathavungaku ki Amune ka twaumase ki Thibise, la pathavungu ki swa Izipiti si latwaumase ki swa Izipiti si talialalai. Lri malraku ki talialalai ki swa Izipiti si satalutalu iniane makanaelre ku laumawmase

²⁶ si baai ki kiasanu malramalra ki niake lini ka Nibukadenezere ka talialalai ki swa Babilunia si lakwapingini. Ai lu ngilribatenga kudra vai, kai swa Izipiti lri mia ku siaswalalane ikai ku umawmase ku yakaikai. Tamatamaku; ka amia kikai pelaela.”

Ku Tamatama lri palribulu ki kawkawluini

²⁷ Kawkawluli, madha mukuludru; swa Iseraylri, madha ngituluku. Lri twaladhaku ki adaaili ki kadaengane, patwalai ki tamwane numi acaicali ka kuni malra palribulu numiane. Lri siwlri numi mubalriu, si suteelrainga ku tacekecekelane, kadrwanga ku amukuludrane.

²⁸ Kawkawluli, madha mukuludru, asi lwiyane tapalraku numiane. Lri amudaku kudra tapamwaneli paacaicali numiane kudra ki lakuni, ai kainaku lri amudu numiane. Lri singikaaiyaku ku lrika akibulrwane numi bulru numiane, si kai amudu numiane. Tamatamaku; ka amia kikai pelaela.