Yerimia 44 - Ngudradreadrekadhane Ka Sisiu 魯凱語聖經

Ku Tamatama wabaai ku vaga ki acaicali ikai Izipiti ka swa Iseraylri

¹ Ku angimiane ki ngwakai ki laacaicali mwa Izipiti. Ki yakai Migedule, Tapanese, Mimepise, si yakai tali lrawdru ki swa Izipiti ka swa Iseraylri, ku Tamatama papia nakwane kawriva.

² Ku Tamatama ka abebeelengenga ki sanaka kwapingi, ka Twaumase ki swa Iseraylri amia kai, “Wamaca numi drele ku tapulebeaneli ku amatikurwane pikai Yerusalrime si lacekele ki swa Yuda. Pakeela kaikameane, kilakikai cekele sakamiana ka cinilriane, ka kadrwa ku umawmase ku yakaikai;

³ Asi lwiyane kai laumawmase kai ki cekele ngialisiane ku kakwakudhane, pakagirimucunga nakwane. Kwi lalasu patarwamara baai ki drumane ka latwaumase, si sukubu kudra la kaika thingale lini si kunumi si cucungulane numi ka samiamiange.

⁴ Apapelaelaku sikawlu ki sasiakawluli ka layuginsia mwa pakipapawlringau numiane ku kaika apiane ku kavalracevaceli,

⁵ ai kai numi kialalra, la kai numi tuthengete, si kai mubangalre isadra ku apapiane patarumara ki drumane ka twaumase ka ngialisiane ka kakudhane.

⁶ Ngwalai kikai, la gugwaku kai girimucaneli pikai ki lacekele ki swa Yuda si madrau tikiane ki lakadadalranane ki cekele Yerusalrime, la lama pakawtu liniane. Pakelanga kaikameane, kilakikai thadaalraneana ka lri aubulanenga matisepele.

⁷ “Kwaku ka Tamatama ka abebeelengenga ki sanaka kwapingi, ka Twaumase ki swa Iseraylri lri pakabibilriliana naku kivaga numiane: Anu ngidadawdaaulu kikai miyaiya kaika matiaukuludru ka amatikurwane? Lri pakamudu numi makanaelre ki lasawvalalai numi, ki laababai, ki lavavalake, si lalrulai numi, lrika kadrwa ku natangeeanga kulri abalu?

⁸ Anu ikaai Izipiti ka tamwane numi mubere si sukubu ki samiamiange, papia ki drumane ka twaumase patarumara, pakagirimirimucu nakwane? Lri ngidadawlu numi ku akamudane, si kamani ku tarakipusupusu kitusinalrelrelreme ki kiacaebe ki belenge ki lakuni?

⁹ Marimurunga numi ki cucungulane numi, talialalai ki swa Yuda si taelrelre ki talialalai, si kunumi si taelrelre numi sa ikai ki lacekele Yuda si madrau tikiane ki lakadalranane cekele Yerusalrime kudra tapiane ku langialisiane?

¹⁰ Pakeela kaikameane, kainu ngiatatupelana, thadaalraneana numi kai musakene mukuludru nakwane, kai paluludu ku baaili numiane si cucungulane numi ku hulrice si padradrekase.

¹¹ “Lakamani, kwaku ka Tamatama ka abebeelengenga ki sanaka kwapingi, ka Twaumase ki swa Iseraylri lri pathavungaku ki pasalrivane numi, si amudu palraelre ki swa Yuda.

¹² Kudra makeecenge lri mubere mwa ikai Izipiti kudra la abalu ku swa Yuda, lri mialriaku amudu liniane. Kwi lalasu adravane ka abelenge ka alebe ku taetalane lri paacai makanaelre ikai ki tamakakaruburane si silravane. Kwi lalasu lrika amaninga kudra kiakavalracevace, kiakakiwcu, kiatusinalrelreme, kiapusu ki palrapalra.

¹³ Naarakainga naku ku amakakaruburane, silravane, si swalrubu pathavungu ki Yerusalrime, lai lri mialriaku tuthadaalrane pathavungu kudra la wamwa ka Izipiti ku laumawmase.

¹⁴ Ku mwabere mu Izipiti ku swa Yuda makanaelre, kadrwa kulri abalu. Kadrwa ku umawmase kulri dulru siwlriana mu Yuda, siwlri mwa kudra ki sidramadrama lini ikai ka cekele. Kathane kudra tabeekele ka lamwabebere ka laumawmase, kadrwa ku umawmase kulri dulru katwase siwlri.”

¹⁵ Lukamaninga kwidra, yakai ku takaalra ku sawvalai ku wathingale ki lataelrelre lini ka napapianga ki samiamiange lama ku sapatuebebelrane ka sangwalreme, si acegecege ikai kwini ka lalabaibai, paelre kudra yakai tali lrawdru Izipiti ka swa Iseraylri, twabalre nakwane,

¹⁶ “Kai nai lri kilalra ku pangukaisu ku nagane ki Tamatama si kawriva naiane.

¹⁷ Lri tara singikaai nai ku ngikaketekete nai pia. Kunadruma, kunai si cucungulane nai, ku talialalai si tabebelenge nai, yakai Yuda ki lacekele si madrau tikiane ki lakadalranane cekele Yerusalrime papia ki ababai ka twaumase nai lama ku sangwalreme patarumara ku bava; kikai lri mialri nai pangimia pia. Lukamaninga kwidra, lri kanekane nai kabucuku, si kisupisupilri ku akaesadhane, ka kadrwa ku amatikurwane.

¹⁸ Ai, twalai sa idrengere nai papia ki ababai ka twaumase lama ku sangwalreme patarumara ku bava, maurame nai sanaka maneemanenga, kai lasakacekele nai lu kai pacainga itakikaruburane, kiara silravane pacai.”

¹⁹ Kwini lalabaibai la iyana kai, “Ku lataelrelre nai palraingi naiane akame ku pange patwalrau ki ababai ka twaumase, si papia iniane lama ku sangwalreme patarumara ku bava.”

²⁰ Ala kawrivaku papia ki amia kai kawriva makanaelre ka sawvalai ka ababai,

²¹ “Kunumi si cucungulane numi, talialalai si latabebelenge numi, si laumawmase ikai ki lacekele Yuda si madrau tikiane ki lakadalranane ki cekele Yerusalrime walaamanga ku sangwalreme, kai wathingale marimuru amia numi ki Tamatama?

²² Kaikameane, kwi kadaengane numi lri aubulane, ka kadrwa ku umawmase ku yakaikai, amaninga kwidra nikakiwcane nipuswane ki laumawmase, kikai amani sa kai maka beserenga ku Tamatama ki ngangane numi.

²³ Kaikameane ku kipadradresenge numi kai miyaiya kai ku amatikurwane, amani sa papia numi ki maelane ka twaumase lama ku sangwalreme, kai kilalra pasalaladha ku vaga ki Tamatama, la kai paluludu ku padradrekase ki Twaumase, pasalriwnga iniane.”

^24-25 Papiaku ki laumawmase makanaelre, inilringa kudra ki lalabaibai, pelaela patuelre ku takawrivane ki Tamatama ka abebeelengenga ki sanaka kwapingi, ka Twaumase ki swa Iseraylri papia ki mwabere mu Izipiti ka swa Yuda. Ku Twaumase amia kai, “Kunumi si lataelrelre numi napapia numi makanaelre ki ababai ka twaumase kiketekete. Kiaketekete numi ku alamane ku sangwalreme patarumara ku bava iniane. La pangimia numi ku ngikaketekete numi. Mathariri, lu pangimia ku kiketekete numi, si sawlri pangimia ku takiketeketane numi!

²⁶ Kunumi ka mwabere mu Izipiti ka laumawmase ki swa Yuda kikai asasane kilalalra. Kwaku ka Tamatama lri papiaku ki abebeelengenga ka saniange ka naganeli kiketekete numiane: Lri kainaku palrainginga numiane sanaka aneeanenga ku papia ki naganeli si kiketekete iya kai, ‘Lri pangukaiyaku ku nagane ki palralrawthu panianiake ka Twaumase kiketekete.’

²⁷ Lri tara pakipadradresengaku numiane ku akamudane, kaika akisupilrane ku ngiradhekanane. Lri pacai numi makanaelre: Lu kaika kiakaruburu si pacai, macaeme si pacai, pakeela ku akamudane makanaelre.

²⁸ Ai, ikai numiane yakai kwi tabeekele kwi lri dulru panianiake, twalai Izipiti kela mu Yuda. Kikai laabalu kai umawmase lri thingale, luka vagali luka vaga lini ku ngiamia.

²⁹ Kwaku ka Tamatama lri baadhaku numiane ku vaeva ku sapatuthingalane, lanu thingale nakwane ka lri ikaiyaku kikai pathavungu numiane, si kudra pelaelali ku akamudane numi ku vaga lri tara ngimiya.

³⁰ Nawamalranga naku ki Zidikia ka talialalai ki swa Yuda si baai ki kiasanu papacapacai iniane ka badha, ka Nibukadenezere ka talialalai ki swa Babilunia, lai lri mialriaku ka thadaalrane malra ki Hupera ka talialalai ki swa Izipiti si baai ki kiasanu malramalra ku niakeini ka badha. Kwaku ka Tamatama amiaku kikai pelaela.”