Yerimia 43 - Ngudradreadrekadhane Ka Sisiu 魯凱語聖經

Ku Yerimia kiailuku mu Izipiti

¹ Sa maka iyanga naku patuelre ku vaga ka sikawlu nakwane ki Tamatama ka Twaumase lini pelaela iya liniane.

² Ku Azaria ka lalake ki Husaia, Yuhanane ka lalake ki Karia, si makanaelre kudra la ngiakadiadiadirace ka laumawmase la iya kai nakwane, “Watavuvuvulrucusu! Ku Tamatama ka Twaumase nai kai wacunu muswane pakaicilri naiane mwa ikai ka Izipiti.

³ Kikai yai Baruke ka lalake ki Niria ka pwatata muswane kainganai baebalre naiane, kalri malra naiane si baai ki swa Babilunia, ku lrika apapacadhane ki lalasu, ku lrika aravasane naiane pwa ka Babilunia.”

⁴ Ngwalai kikai, ku Yuhanane, makanaelre ku tabebelenge ki kwapingi, si drumane ka laumawmase kai mwabangalre makanaelre kilalra pasalaladha ku drekase ki Tamatama ku asurane lini ikai Yuda.

⁵ Ku Yuhanane si tabebelenge ki lakwapingi makanaelre kudra ki abalu si ikai Yuda ku laumawmase si twalai ki lakuni siwlri mubalriu ku laumawmase wamalra iluku liniane makanaelre mwa ka Izipiti,

⁶ ikai kwini yakai ku lasawvalai, ku labaibai, ku lavavalake, si lalalake ki talialalai ka lalabaibai. Kwi lalasu kudra sudralru ki kiacapili ki tarakadrekadrenge ka Nibuzaradange si baai ki Gidalria pamarasikai ku laumawmase, paelre ki Baruke si amaniaku, wailuku makanaelre.

⁷ Kwi lalasu kai kialalra pasalaladha ku drekase ki Tamatama, la kainganai mwa Izipiti ka Tapanese.

⁸ Ku Tamatama yakai kwini iya kai nakwane,

⁹ “Ikaiya cucubungu ki swa Iseraylri, la salri ku latadradrau ku lrenege si dralreke pikai lebe ki abu ka dae kalatadrane ki cucubungu ki lrawlrawdru ki daane ki talialalai ikai Tapanese.

¹⁰ Ala papia liniane makanaelre iya kai, ‘Kwaku ka Tamatama ka abebeelengenga ki sanaka kwapingi, ka Twaumase ki swa Iseraylri lri ilukaku ki sasiakawluli ka Nibukadenezere ka talialalai ki swa Babilunia kela mwa kai; ani pikai belenge kudra ki dralrekeli ku lrenege pasutelrai ku taetalaneini amiaku iniane, kwi lasu lri paipai ku daane ka balrawbau ki taitalialalai.

¹¹ Ku Nibukadenezere lri kela, si pamaki ki swa Izipiti. Kudra lri kiara caemane pacai lri kacaeme si pacai; kudra la kinelretanenga ka lri kiravase lri kiravase; kudra la kinelretanenga ka lri pacai ikai ki tamakakaruburane lri kikaruburu si pacai.

¹² Lri pulebeaku ku apwi si lama ki tasamiamiangane ki swa Izipiti. Ku talialalai ki swa Babilunia lri lama ki latwaumase lini, lai lri ravase si iluku liniane. Kwi lasu lri swape mwalra ki swa Izipiti, lai pamalebe si kainganai siwlri, mia ki taraagwagu lu mwalra ki laimai ku thamikulu.

¹³ Kwi lasu lri amudu ku ulrudru ka lrenege ki daane ki vai ka twaumase ki swa Izipiti.’ ”